Crop insurance mirage ಹೆಸರು ಬೆಳೆ ವಿಮೆ ಮರೀಚಿಕೆ

ಪಟ್ಟಣ ಸೇರಿದಂತೆ ನರೇಗಲ್ಲ ಹೋಬಳಿಯ ಮುಂಗಾರಿನ ಪ್ರಮುಖ ವಾಣಿಜ್ಯ ಬೆಳೆ ಹೆಸರು ಬೆಳೆ. ಮಳೆ ಕೊರತೆಯಿಂದ ಪೂರ್ವ ಮುಂಗಾರಿನ ಹೆಸರು ಬೆಳೆ ನಾಶವಾಗಿದ್ದು, ವಿಮೆ ಕಂತು ಕಟ್ಟಿರುವ ರೈತರು ಕೆಲ ತಾಂತ್ರಿಕ ಕಾರಣಗಳಿಂದ ಬೆಳೆ ವಿಮೆ ಪಡೆಯಲು ನಾನಾ ರೀತಿಯ ಗೊಂದಲ ಏರ್ಪಟ್ಟಿರುವುದರಿಂದ ಗೊಂದಲ ಮತ್ತು ಸಂಕಷ್ಟಕ್ಕೆ ಸಿಲುಕಿದ್ದಾರೆ.

ಬೆಳೆ ಸಮೀಕ್ಷೆ, ಬೆಳೆ ವಿಮಾ ಸುರಕ್ಷೆಯಲ್ಲಿನ ತಾಂತ್ರಿಕ ಸಮಸ್ಯೆ, ಕೃಷಿ, ತೋಟಗಾರಿಕೆ, ಕಂದಾಯ ಇಲಾಖೆ ಹಾಗೂ ವಿಮಾ ಕಂಪನಿ ನಡುವಿನ ಹೊಂದಾಣಿಕೆ ಕೊರತೆಯಿಂದಾಗಿ ರೈತರು ಅನ್ಯಾಯಕ್ಕೆ ಗುರಿಯಾಗಿದ್ದಾರೆ.

ಮಳೆ ಕೊರತೆಯಿಂದ ಪೂರ್ವ ಮುಂಗಾರಿನಲ್ಲಿ ಶೇ. 20ಕ್ಕೂ ಕಡಿಮೆ ಹೆಸರು ಬಿತ್ತನೆ ಆಗಿದೆ. ನಂತರದ ದಿನಗಳಲ್ಲಿ ಮಳೆ ಬಾರದೆ ಕೆಲವೆಡೆ ಬೆಳೆ ಹಾಳಾಗಿದೆ. ಇನ್ನು ಕೆಲವೆಡೆ ಇಳುವರಿ ಬಾರದೆ ಗಿಡಗಳು ಬೆಳೆದು ಕೊಯ್ಲು ಮಾಡಿದರೆ ಬಿತ್ತಿದ ಬೀಜವೂ ಬಾರದ ಸ್ಥಿತಿ ನಿರ್ಮಾಣವಾಗಿದೆ. ಇದರಿಂದ ರೈತರು ಹೆಸರು ಬಿತ್ತನೆ ಮಾಡಿದ್ದ ಹೊಲಗಳನ್ನು ಮುಂದಿನ ಬೆಳೆ ಬಿತ್ತಲು ಹಸನು ಮಾಡಿದ್ದಾರೆ. ಆದರೆ, ಈಗ ಬೆಳೆ ಸಮೀಕ್ಷೆ ಆರಂಭವಾಗಿದ್ದು, ಹೊಲಗಳಲ್ಲಿ ಬೆಳೆ ಅಥವಾ ಬೆಳೆದಿದ್ದಕ್ಕೆ ಸಾಕ್ಷಿ ಇಲ್ಲವಾಗಿದೆ. ಸಮೀಕ್ಷೆಯಲ್ಲಿ ‘ಪಾಳು ತಾಕು’ ಎಂದು ನಮೂದಾಗುತ್ತಿರುವುದರಿಂದ ಬೆಳೆ ವಿಮೆ ಪಡೆಯಲು ತೊಂದರೆ ಆಗುತ್ತಿದೆ ಎಂದು ರೈತರು ದೂರಿದ್ದಾರೆ.

ಜುಲೈನಲ್ಲಿ ನಡೆಯುವ ಸಮೀಕ್ಷೆಯಲ್ಲಿ ಬೆಳೆಗಳನ್ನು ಪೂರ್ವ ಮುಂಗಾರು ಎಂದೇ ನಮೂದಿಸಲಾಗುತ್ತದೆ. ಬೆಳೆ ಹಾನಿಯಾಗಿದ್ದು ಸಮೀಕ್ಷೆಯ ದತ್ತಾಂಶದಲ್ಲಿ ಪೂರ್ವ ಮುಂಗಾರು ಎಂದು ನಮೂದಾಗಿರುವ ಕಾರಣ ನೀಡಿ ವಿಮಾ ಕಂಪನಿಗಳು ಪರಿಹಾರ ನೀಡಲು ನಿರಾಕರಿಸುತ್ತವೆ.

ವಿಮಾ ಕಂತು ಪಾವತಿಸುವಾಗ ರೈತರಿಗೆ ತಾಂತ್ರಿಕ ವ್ಯತ್ಯಾಸದ ಕುರಿತಂತೆ ಯಾವುದೇ ಮಾಹಿತಿ ನೀಡಿರುವುದಿಲ್ಲ. ಬೆಳೆ ಕಟಾವಿಗೆ ಮುನ್ನವೇ ಬೆಳೆ ಸಮೀಕ್ಷೆ ಕಾರ್ಯ ಪೂರ್ಣಗೊಳಿಸುವುದರ ಜತೆ ಪೂರ್ವ ಮುಂಗಾರು ಮತ್ತು-ಮುಂಗಾರು ಹಂಗಾಮಿನ ತಾಂತ್ರಿಕ ದೋಷ ಸರಿಪಡಿಸಿದರೆ ಮಾತ್ರ ರೈತರಿಗೆ ವಿಮೆ ತಲುಪುತ್ತದೆ.

ಬೆಳೆ ಸಮೀಕ್ಷೆ ತಂತ್ರಾಂಶದಲ್ಲಿ ಬೆಳೆಗಳ ಫೋಟೋ ಕಡ್ಡಾಯವಾಗಿದೆ. ಯಾವುದೇ ಬೆಳೆಯ ಫೋಟೋ ಇಲ್ಲದಿದ್ದರೆ, ಸಮೀಕ್ಷೆಯಲ್ಲಿ ಪಾಳು ತಾಕು ಎಂದು ನಮೂದಾಗುತ್ತದೆ. ಹೆಸರು ಬಿತ್ತನೆ ಮಾಡಿ ಗೋವಿನಜೋಳ ಎಂದು ದಾಖಲಿಸಿದರೂ, ಫೋಟೋಕ್ಕೂ ಬೆಳೆಗೂ ವ್ಯತ್ಯಾಸವಿದೆ ಎಂದು ಬರುತ್ತದೆ. ಆದ್ದರಿಂದ, ಬೆಳೆ ನಾಶ ಪಡಿಸಿದ ರೈತರ ಸಮೀಕ್ಷೆಯಲ್ಲಿ ಪಾಳು ತಾಕು ಎಂದು ನಮೂದಾಗುತ್ತಿದೆ ಎಂದು ರೈತರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಹೆಸರು ಬಿತ್ತನೆ ಮಾಡಿದ್ದೆ. ಫಸಲು ಬರದೇ ಇರುವುದರಿಂದ ಹೊಲದಲ್ಲಿ ಮತ್ತೆ ಉಳುಮೆ ಮಾಡಿದ್ದೇನೆ. ಬೆಳೆ ವಿಮೆ ಪಾವತಿಸಿದ್ದರಿಂದ ಸಮೀಕ್ಷೆಗೆ ಬಂದಿದ್ದಾರೆ. ಜಮೀನಿಗೆ ಭೇಟಿ ನೀಡಿದ ಸಮೀಕ್ಷೆದಾರ ನಿಯಮಗಳ ಪ್ರಕಾರ ಅದನ್ನು ಪಾಳು ತಾಕು ಎಂದು ದಾಖಲಿಸಿದ್ದಾರೆ. ಇದರಿಂದ ವಿಮೆ ಪರಿಹಾರ ಪಡೆಯಲಾಗದೆ ಪಾವತಿಸಿದ ವಿಮಾ ಕಂತು ಕೂಡ ಕೈಬಿಟ್ಟಂತಾಗಿದೆ.

— ರುದ್ರಪ್ಪ ಬೆಡಗಲ್ಲ ರೈತ, ನರೇಗಲ್ಲ

ರೈತರು ಬೆಳೆ ತೆಗೆಯುವ ವೇಳೆ ಸ್ವಲ್ಪ ಕುರುಹಾದರೂ ಉಳಿಸಿಕೊಂಡಿರಬೇಕು. ಸಮೀಕ್ಷೆಯ ನಂತರವೂ ಆಕ್ಷೇಪಣೆ ಸಲ್ಲಿಸಲು ಅವಕಾಶ ವಿರುತ್ತದೆ. ರೈತರು ಆಕ್ಷೇಪಣೆ ಸಲ್ಲಿಸಿದರೆ ಇಲಾಖೆ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ಬೆಳೆ ಬೆಳೆದಿರುವ ಬಗ್ಗೆ ಪರಿಶೀಲಿಸಿ, ನಿಜವಾದ ಫಲಾನುಭವಿ ಆಗಿದ್ದರೆ ವಿಮೆ ಪಡೆಯಲು ಅನುವು ಮಾಡಿಕೊಡುತ್ತಾರೆ.

— ಬಸವರಾಜ ಗದುಗಿನ ಕೃಷಿ ಅಧಿಕಾರಿ, ರೈತ ಸಂಪರ್ಕ ಕೇಂದ್ರ ನರೇಗಲ್ಲ