ಗ್ರಾಪಂಗಳಲ್ಲಿ ಆದಾಯ ಸಂಪನ್ಮೂಲ ಸೃಷ್ಟಿಸುವ ಹಿನ್ನೆಲೆ ಮತ್ತು ಗ್ರಾಮೀಣ ಜನರ ಅನುಕೂಲಕ್ಕಾಗಿ ಸರ್ಕಾರಿ ಸೌಲಭ್ಯಗಳು ಕೈಗೆಟಕುವಂತೆ ಸುಲಭಗೊಳಿಸಲು ಜನನ, ಮರಣ ಮತ್ತು ಮದುವೆ ನೋಂದಣಿ ಅಧಿಕಾರವನ್ನು ಗ್ರಾಪಂಗಳಿಗೆ ವರ್ಗಾಯಿಸಿ 2020ರಲ್ಲೇ ರಾಜ್ಯ ಸರ್ಕಾರ ಆದೇಶ ಹೊರಡಿಸಿದೆ. ಆದೇಶವು ಪತ್ರ ವ್ಯವಹಾರಕ್ಕೆ ಮಾತ್ರ ಸೀಮಿತವಾಗಿದೆ. ಯೋಜನೆ ಜಾರಿಯಾಗದ ಹಿನ್ನೆಲೆ ಜಿಲ್ಲೆಯ 123 ಗ್ರಾಪಂ ವ್ಯಾಪ್ತಿಯ ಗ್ರಾಮೀಣ ಪ್ರದೇಶದ ಜನರು ವಿಧಿಯಿಲ್ಲದೇ ನಗರ ಪ್ರದೇಶಕ್ಕೆ ಅಲೆದಾಡುವ ಸ್ಥಿತಿ ಎದುರಾಗಿದೆ. ಉದ್ಯೋಗ, ನೇಮಕಾತಿ, ಸ್ಥಳಿಯ ವಿಳಾಸ ಪತ್ರ, ಪರಿಹಾರ ಸೇರಿದಂತೆ ನಾನಾ ಪ್ರಕ್ರಿಯೆಗೆ ಅಗತ್ಯ ಇರುವ ಜನನ, ಮರಣ ಪ್ರಮಾಣ ಪತ್ರ ಪಡೆಯಲು ನಗರ ಪ್ರದೇಶಕ್ಕೆ ಬರುವಂತಾಗಿದೆ.
