dog dog shelter: ಇನ್ನೂ ಆರಂಭವಾದ ನಾಯಿಗಳ ಆರೈಕೆ ಕೇಂದ್ರ!

ಸಾಂದರ್ಭಿಕ ಚಿತ್ರ

Published on:

25 Feb 2026, 10:07 am

ನರಗುಂದ: ಬೀದಿ ನಾಯಿಗಳ ನಿಯಂತ್ರಣಕ್ಕೆ ತುರ್ತು ಕ್ರಮ ಕೈಗೊಳ್ಳುವಂತೆ ಸುಪ್ರೀಂ ಕೋರ್ಟ್ ರಾಜ್ಯದ ಎಲ್ಲ ಸ್ಥಳೀಯ ಸಂಸ್ಥೆಗಳಿಗೆ ಸ್ಪಷ್ಟ ಆದೇಶ ಹೊರಡಿಸಿದೆ. ಆದರೆ, ತಾಲೂಕಿನ ಬೀದಿ ನಾಯಿಗಳ ನಿಯಂತ್ರಣಕ್ಕೆ ಒಂದೆಡೆ ಸಂಪನ್ಮೂಲ ಕೊರತೆಯಾದರೆ ಮತ್ತೊಂದೆಡೆ ಟೆಂಡರ್ ಪ್ರಕ್ರಿಯೆ ಕೂಡ ವಿಳಂಬಗೊಂಡಿದೆ. ಪರಿಣಾಮ ನಾಯಿಗಳ ಸಂತಾನಶಕ್ತಿ ಹರಣ ಚಿಕಿತ್ಸೆ, ಆರೈಕೆ ಕೇಂದ್ರಗಳ ಪ್ರಾರಂಭಕ್ಕೆ ಹಿನ್ನೆಡೆ ಉಂಟಾಗಿದೆ.

ಪುರಸಭೆ ಸರ್ವೇ ಪ್ರಕಾರ ನರಗುಂದದ 23 ವಿವಿಧ ವಾರ್ಡ್‌ಗಳ ವ್ಯಾಪ್ತಿಯ ಶಾಲೆ, ಕಾಲೇಜ್, ಆಸ್ಪತ್ರೆ, ದೇವಸ್ಥಾನ ಮುಂತಾದ ಸ್ಥಳಗಳಲ್ಲಿ ಒಟ್ಟು 378 ಬೀದಿ ನಾಯಿಗಳಿವೆ. ಸುಪ್ರೀಂಕೋರ್ಟ್ ಆದೇಶದಂತೆ ಸರ್ವೇ ಮಾಡಿರುವ ಪ್ರತಿಯೊಂದು ನಾಯಿಗಳನ್ನು ಸುರಕ್ಷಿತವಾಗಿ ಸೆರೆ ಹಿಡಿದು ಪ್ರತ್ಯೇಕ ಶೆಡ್ ನಿರ್ಮಿಸಬೇಕು. ಆಫರೇಷನ್, ಆರೈಕೆ ಕೇಂದ್ರಗಳನ್ನು ತೆರೆದು 1650 ರೂಪಾಯಿ ವೆಚ್ಚದಲ್ಲಿ ಗುಣಮಟ್ಟದ ಚಿಕಿತ್ಸೆ, ನೀರು, ಆಹಾರ ನೀಡುವುದರ ಜತೆಗೆ ಆರೈಕೆ ನಂತರ ನಾಯಿಗಳನ್ನು ಮೂಲ ಸ್ಥಳಗಳಿಗೆ ಸಾಗಾಟ ಮಾಡಬೇಕೆಂದು ತಿಳಿಸಿದೆ. ಬೀದಿ ನಾಯಿಗಳ ನಿಯಂತ್ರಣಕ್ಕೆ ಪುರಸಭೆ ಹಾಗೂ ತಾಲೂಕಿನ ಗ್ರಾಪಂ ಕಚೇರಿಗಳಲ್ಲಿ ಯಾವುದೇ ರೀತಿಯ ಪ್ರತ್ಯೇಕ ಅನುದಾನ ಇರುವುದಿಲ್ಲ. ಪ್ರತಿಯೊಂದು ಖರ್ಚು-ವೆಚ್ಚಗಳನ್ನು ಸಾಮಾನ್ಯ ನಿಧಿಯಲ್ಲಿ ಭರಿಸಿಕೊಳ್ಳುವಂತೆ ಸೂಚಿಸಿದ್ದರಿಂದ ಬೀದಿ ನಾಯಿಗಳ ನಿಯಂತ್ರಣಕ್ಕೆ ಪುರಸಭೆಯಿಂದ ಈಗಾಗಲೇ 2 ಬಾರಿ ಟೆಂಡರ್ ಕರೆಯಲಾಗಿತ್ತು. ಆದರೆ, ನರಗುಂದದಲ್ಲಿ ನಾಯಿಗಳ ಸಂಖ್ಯೆ ಕಡಿಮೆ ಇರುವ ಕಾರಣ ನೆಪವೊಡ್ಡಿ ತಜ್ಞ ವೈದ್ಯರು, ಸಿಬ್ಬಂದಿಗಳ ತಂಡ ಟೆಂಡರ್ ಪ್ರಕ್ರಿಯೆಯಲ್ಲಿ ಪಾಲ್ಗೊಂಡಿಲ್ಲ. ಪರಿಣಾಮ ನಗರದಲ್ಲಿ ಬೀದಿ ನಾಯಿಗಳ ನಿಯಂತ್ರಣಕ್ಕೆ ಭಾರಿ ಹಿನ್ನಡೆ ಉಂಟಾಗಿದೆ.

ಗ್ರಾಪಂಗಳಲ್ಲಿ ಟೆಂಡರೇ ಆಗಿಲ್ಲ: ನರಗುಂದ ತಾಲೂಕಿನ ಬನಹಟ್ಟಿ ಗ್ರಾಪಂ ವ್ಯಾಪ್ತಿಯಲ್ಲಿ 33, ಬೆನಕನಕೊಪ್ಪ-35, ಭೈರನಹಟ್ಟಿ 15, ಚಿಕ್ಕನರಗುಂದ-29, ಹದ್ಲಿ-22, ಹಿರೇಕೊಪ್ಪ-50, ಹುಣಸೀಕಟ್ಟಿ-29, ಕಣಕೀಕೊಪ್ಪ-30, ಕೊಣ್ಣೂರ-30, ರಡ್ಡೇರನಾಗನೂರ-43, ಶಿರೋಳ-39, ಸುರಕೋಡ-10, ವಾಸನ ಗ್ರಾಪಂನಲ್ಲಿ-32 ಸೇರಿ ಗ್ರಾಮೀಣ ಪ್ರದೇಶದಲ್ಲಿ ಒಟ್ಟು 397 ಬೀದಿ ನಾಯಿಗಳಿವೆ. ನಿಯಮಾನುಸಾರ ಒಂದು ನಾಯಿಗೆ ತಗಲುವ 1650 ರೂಪಾಯಿ ಖರ್ಚು-ವೆಚ್ಚವನ್ನು ಸ್ಥಳೀಯ ಸಂಸ್ಥೆಗಳಿಂದ ಭರಿಸಬೇಕು. ಆದರೆ, ಹಳ್ಳಿಗಳಲ್ಲಿ ಕರ ವಸೂಲಾತಿಯೇ ಕಷ್ಟಕರವಾಗಿರುವುದರಿಂದ ಅನಿವಾರ್ಯ ಕಾರಣಗಳಿಂದ ಪ್ರತಿ ಗ್ರಾಪಂನಿಂದ ಕೇವಲ 10 ಸಾವಿರದಂತೆ ಒಟ್ಟು 1.30 ಲಕ್ಷ ರೂ. ನಗದು ಸಂಗ್ರಹಿಸಲಾಗಿದೆ. ಆದರೆ, ನಾಯಿಗಳ ನಿರ್ವಹಣಾ ವೆಚ್ಚ ಅಧಿಕವಾಗುವ ಕಾರಣಕ್ಕೆ ನಾಯಿಗಳ ನಿಯಂತ್ರಣಕ್ಕೆ ಈವರೆಗೆ ಯಾವುದೇ ರೀತಿಯ ಟೆಂಡರ್ ಕರೆದಿಲ್ಲ

775 ನಾಯಿಗಳ ಹಿಡಿಯಲು ಒಂದೇ ಟೆಂಡರ್?: ಪುರಸಭೆ ವ್ಯಾಪ್ತಿಯಲ್ಲಿ 378 ಮಾತ್ರ ಇರುವ ಕಾರಣಕ್ಕೆ ಎರಡು ಬಾರಿ ಟೆಂಡರ್ ಕರೆದರೂ ಯಾರು ಬಂದಿಲ್ಲ. ಇನ್ನೂ ಗ್ರಾಪಂಗಳಲ್ಲಿ ನಿರ್ವಹಣಾ ವೆಚ್ಚ ಅಧಿಕವಾಗುವ ಕಾರಣಕ್ಕೆ ಟೆಂಡರ್ ಕರೆದಿಲ್ಲ. ಹೀಗಾಗಿ ಪುರಸಭೆ ಹಾಗೂ ಗ್ರಾಪಂ ಸೇರಿ 775 ನಾಯಿಗಳ ಹಿಡಿಯಲು ಟೆಂಡರ್ ಕರೆಯಬೇಕು ಎಂಬ ಚರ್ಚೆ ನಡೆಯುತ್ತಿದೆ. ಇದಷ್ಟೇ ಅಲ್ಲದೇ, ಎಲ್ಲ ನಾಯಿಗಳೂ ಸೇರಿ ಒಂದೇ ಕಡೆ ಶೆಡ್ ನಿರ್ಮಾಣ ಮಾಡಿ ಶಸ್ತ್ರ ಚಿಕಿತ್ಸೆ ನಡೆಸಲು ಪ್ಲಾೃನ್ ಕೂಡಾ ನಡೆದಿದೆ.

ಬೀದಿ ನಾಯಿಗಳ ನಿಯಂತ್ರಣಕ್ಕೆ ಈಗಾಗಲೇ ಎರಡು ಬಾರಿ ಟೆಂಡರ್ ಕರೆಯಲಾಗಿತ್ತು. ನಾಯಿಗಳ ಸಂಖ್ಯೆ ಕಡಿಮೆ ಇರುವುದರಿಂದ ಯಾರೊಬ್ಬರೂ ಟೆಂಡರ್ ಪ್ರಕ್ರಿಯೆನಲ್ಲಿ ಪಾಲ್ಗೊಂಡಿಲ್ಲ. ಸರ್ಕಾರದಿಂದ ಎನಿಮಲ್ ಬರ್ಥ್ ಕಂಟ್ರೋಲ್ ಸೆಂಟರ್ ನಿರ್ಮಾಣಕ್ಕೆ 7.88ಲಕ್ಷ ರೂ. ಅನುದಾನ ಬಿಡುಗಡೆಯಾಗಿದೆ. ಜಿಲ್ಲಾಧಿಕಾರಿಗಳ ನಿರ್ದೇಶನದಂತೆ ಒಂದು ತಿಂಗಳಲ್ಲಿ ಪಟ್ಟಣದ ಎಪಿಎಂಸಿ ಅಥವಾ ಪುರಸಭೆ ತ್ಯಾಜ್ಯ ವಿಲೇವಾರಿ ಘಟಕದಲ್ಲಿ ಸಂತಾನ ಹರಣ ಶಸ್ತ್ರ ಚಿಕಿತ್ಸೆಯ ಆರೈಕೆ ಕೇಂದ್ರ ಪ್ರಾರಂಭಿಸಲಾಗುವುದು. ಸಂಗಮೇಶ ಬ್ಯಾಳಿ

ನರಗುಂದ ತಾಲೂಕಿನಲ್ಲಿ ಬೀದಿ ನಾಯಿಗಳ ಸಂಖ್ಯೆ ಕಡಿಮೆ ಇವೆ ಎಂಬ ಕಾರಣಕ್ಕೆ ಟೆಂಡರ್ ಪ್ರಕ್ರಿಯೆಗೆ ಹಿನ್ನೆಡೆ ಉಂಟಾಗಿದೆ. ಪರ್ಯಾಯವಾಗಿ ನರಗುಂದದಲ್ಲಿಯೇ ಎಬಿಸಿ ಆರೈಕೆ ಕೇಂದ್ರ ಪ್ರಾರಂಭಿಸಿ ಸಂತಾನ ಹರಣ ಶಸ್ತ್ರಚಿಕಿತ್ಸೆ ನೀಡುವ ತೀರ್ಮಾನ ಮಾಡಲಾಗಿದೆ.

Nargund