c.c. patil: ಹಾಲುಮತದೊಂದಿಗೆ ಸಿ.ಸಿ. ಪಾಟೀಲ ಉತ್ತಮ ಬಾಂಧವ್ಯ

ನರಗುಂದ: ಶಾಸಕ ಸಿ.ಸಿ. ಪಾಟೀಲ (c.c. patil) ಹಾಲುಮತ ಸಮಾಜದವರ ಬಗ್ಗೆ ವಿಶೇಷ ಕಾಳಜಿ ಹೊಂದಿದ್ದಾರೆ. ನಮ್ಮ ಸಮಾಜಕ್ಕೆ ಅವಕಾಶ ಸಿಕ್ಕಾಗಲೆಲ್ಲ ರಾಜಕೀಯ ಸ್ಥಾನಮಾನ ನೀಡಿ ಬೆಳೆಸುವುದರ ಜತೆಗೆ ಸಮಾಜದ ಸರ್ವಾಂಗೀಣ ಅಭಿವೃದ್ಧಿಗೆ ಶ್ರಮಿಸಿದ್ದಾರೆ. ಆದರೆ, ಅವರ ಬಗ್ಗೆ ಕೆಲವರು ಸಾಮಾಜಿಕ ಜಾಲತಾಣಗಳಲ್ಲಿ ಅಪಪ್ರಚಾರ ಮಾಡುವುದು ಸರಿಯಾದ ಕ್ರಮವಲ್ಲ ಎಂದು ಕರ್ನಾಟಕ ಪ್ರದೇಶ ಕುರುಬ ಸಂಘದ ಜಿಲ್ಲಾ ಕಾರ್ಯಾಧ್ಯಕ್ಷ ಚಂದ್ರು ದಂಡಿನ ಹೇಳಿದರು.

ತಾಲೂಕು ಕುರುಬರ ಸಂಘದಿಂದ ಪಟ್ಟಣದಲ್ಲಿ ಬುಧವಾರ ಆಯೋಜಿಸಿದ್ದ ಸುದ್ಧಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಬಾಗಲಕೋಟೆಯಲ್ಲಿ ಇತ್ತೀಚೆಗೆ ಆಯೋಜಿಸಿದ್ದ ಉಪ ಚುನಾವಣೆ ಪ್ರಚಾರ ಸಂದರ್ಭದಲ್ಲಿ ನರಗುಂದ ಶಾಸಕ ಸಿ.ಸಿ.ಪಾಟೀಲ ಕುರುಬ ಸಮಾಜದವರಿಗೆ ಟುರ್ ಎಂಬ ಪದ ಬಳಸಿದ್ದಾರೆ. ಈ ಪದ ಉದ್ದೇಶ ಪೂರ್ವಕವಾಗಿ ಬಳಸಿದ್ದಲ್ಲ. ಆದರೆ, ಈ ಬಗ್ಗೆ ನಮ್ಮ ಸಮಾಜದ ಕೆಲವರು ಸಾಮಾಜಿಕ ಜಾಲತಾಣಗಳಲ್ಲಿ ಇಲ್ಲಸಲ್ಲದ ಟೀಕೆ-ಟಿಪ್ಪಣೆಗಳನ್ನು ಮಾಡುತ್ತಿರುವುದು ಸರಿಯಾದ ಕ್ರಮವಲ್ಲ. ನರಗುಂದ ಮತಕ್ಷೇತ್ರದಲ್ಲಿ ಲಿಂಗಾಯತ ಮತ್ತು ಹಾಲುಮತ ಸಮಾಜದವರ ಸಂಬಂಧ ಅವಿನಾಭವದಿಂದ ಕೂಡಿದೆ. ಕುರುಬ ಜನಾಂಗದವರೊಂದಿಗೆ ಸಿ.ಸಿ.ಪಾಟೀಲ ಬಹಳಷ್ಟು ಪ್ರೀತಿ, ವಿಶ್ವಾಸ ಬೆಳೆಸಿಕೊಂಡಿದ್ದಾರೆ. ನರಗುಂದದ ಕನಕ ಭವನ ನಿರ್ಮಾಣಕ್ಕೆ ಸರ್ಕಾರ ಹಾಗೂ ತಮ್ಮ ವೈಯಕ್ತಿಕ ಅನುದಾನ ನೀಡಿದ್ದಾರೆ. ನಮ್ಮ ಸಮಾಜದ ಸರ್ವಾಂಗೀಣ ಅಭಿವೃದ್ಧಿಗೆ ಸಾಕಷ್ಟು ಪರಿಶ್ರಮ ವಹಿಸಿದ್ದರಿಂದ ಕುರುಬ ಸಮಾಜದವರು ಇನ್ಮೇಲೆ ಯಾವುದೇ ರೀತಿಯ ಅನೌಪಚಾರಿಕ ಹೇಳಿಕೆ ಕೊಡುವುದು, ಟೀಕೆ-ಟಿಪ್ಪಣೆಗಳನ್ನು ಮಾಡಬಾರದು ಎಂದು ಮನವಿ ಮಾಡಿದರು.

ಕರ್ನಾಟಕ ಕುರುಬ ಕಲ್ಯಾಣ ಕ್ಷೇಮಾಭಿವೃದ್ದಿ ಸಂಘದ ಅಧ್ಯಕ್ಷ ಫಕೀರಪ್ಪ ಸವದತ್ತಿ, ಕುರುಬ ಸಂಘದ ತಾಲೂಕಾಧ್ಯಕ್ಷ ನೀಲಪ್ಪ ಗುಡದನ್ನವರ, ಸುನೀಲ ಕುಷ್ಟಗಿ, ಅನಿಲ ಧರೆಯಣ್ಣವರ, ಮಂಜುನಾಥ ಮೆಣಸಗಿ, ಬೀರಪ್ಪ ದುಂಡಿ, ಭೀರಪ್ಪ ಕಲಹಾಳ, ಅಶೋಕ ಹೆಬ್ಬಳ್ಳಿ, ಮಹಾದೇವಪ್ಪ ಗುದಗಿ, ರಾಣಪ್ಪ ದರಗಾದ, ಬಸವರಾಜ ಕೊಳಲದ, ಮಲ್ಲಪ್ಪ ಗೋನಾಳ, ನೀಲಪ್ಪ ಬೆಳಹಾರ,ರಂಗಪ್ಪ ಕಲಕೇರಿ,ಚಳ್ಳಪ್ಪ ನಾಯ್ಕರ, ಹನುಮಂತ ಕಾಡಪ್ಪನವರ, ಬಸ್ಸು ಸವದತ್ತಿ, ಸುರೇಶ ಸವದತ್ತಿ ಇತರರು ಉಪಸ್ಥಿತರಿದ್ದರು.