Assault: ನೀರಘಂಟಿ ಮೇಲೆ ಇದೆಂಥಾ ಪೌರುಷ!

ನರಗುಂದ: ಸಮರ್ಪಕವಾಗಿ ಕುಡಿಯುವ ನೀರು ಪೂರೈಸುತ್ತಿಲ್ಲ ಎಂದು ಆರೋಪಿಸಿ ಗ್ರಾಮಸ್ಥನೊಬ್ಬ ನೀರುಘಂಟಿ ಮೇಲೆ ಹಲ್ಲೆಗೈದ (Assault) ಘಟನೆ ತಾಲೂಕಿನ ಕುರ್ಲಗೇರಿ ಗ್ರಾಮದಲ್ಲಿ ಶುಕ್ರವಾರ ನಡೆದಿದೆ.

ಹುಸೇನಸಾಬ ಮಕ್ತುಂಸಾಬ ಹವಾಲ್ದಾರ ಹಲ್ಲೆಗೊಳಗಾದವರು. ಮೌಲಾಸಾಬ ಮಕ್ತುಂಸಾಬ ಹವಾಲ್ದಾರ ಹಲ್ಲೆಗೈದಿರುವ ಗ್ರಾಮಸ್ಥನಾಗಿದ್ದು, ಈ ಕುರಿತು ನರಗುಂದ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಕುರ್ಲಗೇರಿಯಲ್ಲಿ ನಿರಂತರವಾಗಿ ನೀರಿನ ಸಮಸ್ಯೆ ಕಾಡುತ್ತಿದೆ. ಗ್ರಾಮದಲ್ಲಿ ಇದುವರೆಗೆ ಜೆಜೆಎಂ ಯೋಜನೆ ಅನುಷ್ಠಾನಗೊಂಡಿಲ್ಲ. ಪರಿಣಾಮ ಬೇಸಿಗೆಯಲ್ಲಿ ಗ್ರಾಮಸ್ಥರು ಕುಡಿಯುವ ನೀರಿಗೆ ಪರಿತಪಿಸುವಂತಾಗಿದೆ.

ಕುರ್ಲಗೇರಿ ಗ್ರಾಮಕ್ಕೆ ನೀರು ಪೂರೈಸುತ್ತಿದ್ದ ಹುಸೇನಸಾಬ ಅವರ ಮಗನಿಗೆ ಅನಾರೋಗ್ಯ ಕಾಣಿಸಿಕೊಂಡಿದ್ದರಿಂದ ಜಿಲ್ಲಾಸ್ಪತ್ರೆಗೆ ದಾಖಲಿಸಲಾಗಿತ್ತು. ಹೀಗಾಗಿ ಅಧಿಕಾರಿಗಳ ಗಮನಕ್ಕೆ ತಂದು ನೀರಂಘಟಿ 15 ದಿನ ಕೆಲಸಕ್ಕೆ ಬಂದಿರಲಿಲ್ಲ. ಈ ವೇಳೆ ಕುರ್ಲಗೇರಿ ಗ್ರಾಮಸ್ಥರಿಗೆ ಕುಡಿಯುವ ನೀರಿನ ಸಮಸ್ಯೆಯಾಗದಂತೆ ಶಿವಪ್ಪ ಹುಲಗೂರ, ಯಲ್ಲಪ್ಪ ಚೆಲುವಣ್ಣವರ ಎಂಬುವರನ್ನು ನೀರು ಪೂರೈಕೆಗೆ ನೇಮಿಸಲಾಗಿತ್ತು. ಆದರೆ, ಇವರಿಬ್ಬರಿಗೂ ಸರಿಯಾಗಿ ಮಾಹಿತಿ ಗೊತ್ತಿಲ್ಲದ ಕಾರಣ ಸಮರ್ಪಕ ನೀರು ಪೂರೈಕೆ ಆಗಿರಲಿಲ್ಲ. ಮಗನ ಆರೋಗ್ಯ ಚೇತರಿಸಿಕೊಂಡ ಬಳಿಕ ಕುರ್ಲಗೇರಿಗೆ ಬಂದಿದ್ದ ಕಾಯಂ ನೀರುಘಂಟಿ ಹುಸೇನಸಾಬ ಎಂದಿನಂತೆ ಕರ್ತವ್ಯಕ್ಕೆ ಹಾಜರಾಗಿದ್ದರು. ಸಮರ್ಪಕ ನೀರು ಪೂರೈಸುವ ವಿಚಾರಕ್ಕೆ ಮೌಲಾಸಾಬ ಹಾಗೂ ನೀರುಘಂಟಿ ಹುಸೇನಸಾಬ ನಡುವೆ ಗಲಾಟೆಯಾಗಿದೆ. ಘಟನೆಯಲ್ಲಿ ಹುಸೇನಸಾಬ ಗಾಯಗೊಂಡಿದ್ದರಿಂದ ಅವರನ್ನು ನರಗುಂದದ ಸರ್ಕಾರಿ ತಾಲೂಕು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಘಟನೆ ಖಂಡಿಸಿ ನರಗುಂದ ತಾಲೂಕು ಸರ್ಕಾರಿ ಗ್ರಾಪಂ ನೌಕರರ ಸಂಘದ ಅಧಿಕಾರಿ ಹಾಗೂ ಸಿಬ್ಬಂದಿ ಶನಿವಾರ ಪಟ್ಟಣದಲ್ಲಿ ಪ್ರತಿಭಟನೆ ನಡೆಸಿದರು. ತಪ್ಪಿತಸ್ಥರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದರು.

ಗ್ರಾಪಂ ನೌಕರರ ಸಂಘದ ತಾಲೂಕು ಅಧ್ಯಕ್ಷ ರುದ್ರಪ್ಪ ಐನಾಪೂರ, ಬನಹಟ್ಟಿ ಪಿಡಿಒ ಮಂಜುನಾಥ ಗಣಿ, ಎಂ.ಎಂ.ಪೂಜಾರ, ಶಿವನಪ್ಪ ಕಲ್ಲಾಪೂರ, ರುದ್ರಪ್ಪ ಕಂದಗಲ್ಲ, ಕಲ್ಲಪ್ಪ ಹನಮನೇರಿ, ರಮೇಶ ವಾಸನ, ಯಲ್ಲಪ್ಪ ಪೂಜಾರ, ಸುಭಾಸ ಕಾಳೆ, ಶಿವಪ್ಪ ಯಲಿಗಾರ, ಮಲ್ಲಿಕಾರ್ಜುನ ಭೂಮಣ್ಣವರ, ಉಮೇಶ ಹಿರೇಮಠ, ಬಸವರಾಜ ಕಲ್ಲಾಪೂರ ಇತರರಿದ್ದರು.