ಕುಡಿಯುವ ನೀರಿಗಾಗಿ ಆಗ್ರಹಿಸಿ ಮನವಿ

ಗದಗ: ನಗರದ ವಾರ್ಡ ನಂ. 33ರಲ್ಲಿ ಕೆಎಚ್​ಬಿ ಕಾಲನಿಗೆ ಶಾಶ್ವತ ತುಂಗಭದ್ರಾ ಕುಡಿಯುವ ನೀರಿನ ಪೂರೈಕೆ ವ್ಯವಸ್ಥೆ ಮಾಡುವಂತೆ ಒತ್ತಾಯಿಸಿ ಸೂರ್ಯ ನಗರ ನಾಗರಿಕ ಹಿತರಕ್ಷಣಾ ಸಮಿತಿ ವತಿಯಿಂದ ಬುಧವಾರ ಜಿಲ್ಲಾಧಿಕಾರಿಗಳಿಗೆ ಮನವಿ ಸಲ್ಲಿಸಲಾಯಿತು.

ಕಳೆದ 11 ವರ್ಷಗಳಿಂದ ನೀರಿನ ಸಮಸ್ಯೆಯನ್ನು ಎದುರಿಸುತ್ತಿದ್ದೇವೆ. ಕೆಎಚ್​ಬಿ ಬಡಾವಣೆಯನ್ನು 2014ರಲ್ಲಿ ನಗರಸಭೆಗೆ ಹಸ್ತಾಂತರ ಮಾಡಲಾಗಿದೆ. ಆದರೆ ಇಷ್ಟು ಕಳೆದರೂ ಇದುವರೆಗೂ ನಗರಸಭೆಯವರು ಶಾಶ್ವತ ಕುಡಿಯುವ ನೀರಿನ ವ್ಯವಸ್ಥೆಯನ್ನು ಮಾಡಿಲ್ಲ. ಈ ಬಡವಾವಣೆಯಲ್ಲಿ ಒಟ್ಟು 830 ನಿವೇಶನಗಳಿದ್ದು, ಈಗಾಗಲೇ 200 ಮನೆಗಳು ನಿರ್ಮಾಣಗೊಂಡು ಜನರು ವಾಸವಾಗಿದ್ದಾರೆ. ಎಲ್ಲ ನಿವಾಸಿಗಳು ನಿಯಮಿತವಾಗಿ ನಗರಸಭೆಗೆ ಭೂಬಾಡಿಗೆ ಪಾವತಿಸುತ್ತಿದ್ದಾರೆ. ಆದರೆ ನಗರಸಭೆಯ ಅಧಿಕಾರಿಗಳು ಮಾತ್ರ ತಮ್ಮ ದಿವ್ಯ ನಿರ್ಲಕ್ಷ$್ಯವನ್ನು ಮುಂದುವರಿಸಿದ್ದಾರೆ ಎಂದು ಆರೋಪಿಸಿದರು.

ಕುಡಿಯುವ ನೀರು ಪೂರೈಕೆ ವ್ಯವಸ್ಥೆಗಾಗಿ ಕರ್ನಾಟಕ ಗೃಹ ಮಂಡಳಿಯವರು ಈ ಹಿಂದೆಯೇ ಗದಗ ನಗರಸಭೆಗೆ ಭರಿಸಿದ ಒಟ್ಟು ಹಣದ ವಿವರವನ್ನೂ ಮನವಿಯಲ್ಲಿ ನಮೂದಿಸಿದ್ದೇವೆ ಬಡಾವಣೆ ನಿವಾಸಿಗಳು ತಿಳಿಸಿದರು.

ಈ ಸಂದರ್ಭದಲ್ಲಿ ಚಂದ್ರಶೇಖರ ಬಾಗಲಕೋಟ, ಮಹಾಂತೇಶ ಹೂಗಾರ, ಉಪಾಧ್ಯಕ್ಷ ಹನಮಂತಪ್ಪ ಸಿಂಗಾಡಿ, ಚನ್ನಬಸಪ್ಪ ನಾಗಾವಿ, ಸಿದ್ದಪ್ಪ ಪಲ್ಲೇದ, ಅಮೃತಾ ಹಬೀಬ ಹಾಗೂ ಇತರ ಸದಸ್ಯರು ಇದ್ದರು.