ಎಸ್​ಪಿ, ಡಿವೈಎಸ್​ಪಿ ನೇತೃತ್ವದಲ್ಲಿ ಆಟೋ, ಟಂಟಂಗಳ ವಿಶೇಷ ಕಾರ್ಯಾಚರಣೆ

 140ಕ್ಕೂ ಹೆಚ್ಚು ಆಟೋ, ಟಂಟಂಗಳು ಸೀಜ್​

ವಿಜಯವಾಣಿ ಸುದ್ದಿಜಾಲ ಗದಗ

ಸಂಚಾರಿ ನಿಯಮಗಳನ್ನು ಪಾಲಿಸದಿರುವುದು, ಅಗತ್ಯಕ್ಕಿಂತ ಹೆಚ್ಚನ ಪ್ರಯಾಣಿಕರನ್ನು ಕರೆದೊಯ್ಯವುದು ಸೇರಿ ಟ್ರಾಫಿಕ್​ ನಿಯಮಗಳನ್ನು ಗಾಳಿಗೆ ತೂರುತ್ತಿರುವ ಆಟೋ, ಟಂಟಂಗಳ ವಿರುದ್ಧ ಜಿಲ್ಲಾ ಪೊಲೀಸ್​ ಇಲಾಖೆ ಶುಕ್ರವಾರ ಮತ್ತು ಶನಿವಾರ ವಿಶೇಷ ಕಾರ್ಯಾಚರಣೆ ನಡೆಸಿತು.

ಟ್ರಾಫಿಕ್​ ನಿಯಮಗಳನ್ನು ಗಾಳಿಗೆ ತೂರುತ್ತಿರುವ ಕುರಿತು ಸಾರ್ವಜನಿಕರಿಂದ ಸಾಕಷ್ಟು ದೂರುಗಳು ಬಂದ ಹಿನ್ನೆಲೆಯಲ್ಲಿ ಜಿಲ್ಲಾ ಪೊಲೀಸ್​ ವರಿಷ್ಠಾಧಿಕಾರಿ ಬಿ.ಎಸ್​. ನೇಮಗೌಡ ಅವರ ಮಾರ್ಗದರ್ಶನದಲ್ಲಿ, ಡಿವೈಎಸ್​ಪಿ ಮುರ್ತುಜಾ ಖಾದ್ರಿ ನೇತೃತ್ವದಲ್ಲಿ ನಗರದ ವಿವಿಧೆಡೆ ಆಟೋ, ಟಂಟಂಗಳನ್ನು ಪರಿಶೀಲಿಸಿ ದಂಡ ವಿಧಿಸಲಾಯಿತು.

ಡಿವೈಎಸ್​ಪಿ ಮುರ್ತುಜಾ ಖಾದ್ರಿ ನೇತೃತ್ವದಲ್ಲಿ 5 ತಂಡಗಳನ್ನು ರಚಿಸಿ ನಗರದ ಭೂಮರಡ್ಡಿ ವೃತ್ತ, ರೋಟರಿ ಸರ್ಕಲ್​, ಕೆ. ಎಚ್​. ಪಾಟೀಲ ವೃತ್ತ, ಮಹಾತ್ಮ ಗಾಂಧಿ ವೃತ್ತ ಸೇರಿ ನಗರದ ವಿವಿಧೆಡೆ ಆಟೋ, ಟಂಟಂಗಳ ಪರಿಶೀಲನೆ ಜತೆಗೆ ವಿಶೇಷ ಕಾರ್ಯಾಚರಣೆ ನಡೆಸುವ ಮೂಲಕ 160ಕ್ಕೂ ಹೆಚ್ಚು ಆಟೋ, ಟಂಟಂಗಳನ್ನು ಸೀಜ್​ ಮಾಡಲಾಯಿತು.

ಗದಗ&ಬೆಟಗೇರಿ ಅವಳಿ ನಗರದಲ್ಲಿ ಆಟೋ, ಟಂಟಂಗಳ ಹಾವಳಿ ಹೆಚ್ಚಿದ್ದು, ನಡುರಸ್ತೆಯಲ್ಲಿ ವಾಹನ ನಿಲ್ಲಿಸಿ, ಪ್ರಯಾಣಿಕರನ್ನು ಕರೆದೊಯ್ಯುವುದು, ರಸ್ತೆ ಸಂಚಾರಕ್ಕೆ ಅಡೆತಡೆ ಉಂಟು ಮಾಡುವುದು, ಮ್ಯೂಸಿಕ್​ ಪ್ಲೇಯರ್​ಗಳ ಸೌಂಡ್​ ಹೆಚ್ಚಿಸಿ ಶಬ್ದ ಮಾಲಿನ್ಯ ಉಂಟುಮಾಡುವುದು, ಡೆವರ್​ ಪಕ್ಕದಲ್ಲಿ ಸಹ ಪ್ರಯಾಣಿಕರನ್ನು ಕೂಡಿಸಿಕೊಳ್ಳುವುದು, ವಾಹನದ ಕಾಗದ ಪತ್ರಗಳಿಲ್ಲದೆ ಸಂಚರಿಸುವುದು ಸೇರಿ ಟ್ರಾಫಿಕ್​ ನಿಯಮಗಳನ್ನು ಪಾಲಿಸದಿರುವ ಆಟೋ ಟಂಟಂಗಳನ್ನು ಪತ್ತೆ ಹಚ್ಚಿ, ಪರಿಶೀಲಿಸಿ ಪೊಲೀಸ್​ ಇಲಾಖೆ ವಶಪಡಿಸಿಕೊಂಡಿತು.

ಈ ವೇಳೆ ಪೋಲೀಸರುಮ, ಆಟೋ ಟಂಟಂ ಚಾಲಕರಿಗೆ ಹಾಗೂ ಮಾಲೀಕರಿಗೆ ವಾಹನಾ ಚಾಲನಾ ನಿಯಮಗಳನ್ನು ಪಾಲಿಸಬೇಕು, ಸರಿಯಾಗಿ ಕಾಗದ ಪತ್ರಗಳನ್ನು ಹೊಂದಿರಬೇಕು, ಚಾಲನಾ ಸಮವಸ್ತ್ರ ಧರಿಸಬೇಕು, ಅಗತ್ಯಕ್ಕಿಂತ ಹೆಚ್ಚಿನ ಪ್ರಯಾಣಿಕರನ್ನು ಕರೆದೊಯ್ಯುವುದನ್ನು ನಿಯಂತ್ರಿಸಬೇಕು, ಚಾಲಕನ ಪಕ್ಕದಲ್ಲಿ ಪ್ರಯಾಣಿಕರನ್ನು ಕೂಡಿಸಿಕೊಳ್ಳುವುದು, ಸೌಂಡ್​ ರೆಕಾರ್ಡರ್​ಗಳನ್ನು ಹೆಚ್ಚಿಗೆ ಇಟ್ಟು ಟ್ರಾಫಿಕ್​ ನಿಯಮಗಳನ್ನು ಉಲ್ಲಂಘಿಸದಂತೆ ಎಚ್ಚರಿಕೆ ವಹಿಸಬೇಕು ಪೊಲೀಸರು ಎಚ್ಚರಿಕೆ ನೀಡಿದರು.

ಕೋಟ್​

ಆಟೋ ಹಾಗೂ ಟಂಟಂಗಳಲ್ಲಿ ವಾಹನ ಚಾಲನಾ ಮಿತಿ ಹಾಗೂ ಕಾನೂನು ಬಾಹಿರವಾಗಿ ಅಧಿಕ ಸಂಖ್ಯೆಯಲ್ಲಿ ಪ್ರಯಾಣಿಕರನ್ನು ಕರೆದುಕೊಂಡು ಹೋಗುವುದು, ಕಾಗದ ಪತ್ರಗಳಿಲ್ಲದೆ ಸಂಚರಿಸುವ ಕುರಿತು ಸಾರ್ವಜನಿಕರಿಂದ ಸಾಕಷ್ಟು ದೂರುಗಳು ಬಂದಿದ್ದವು. ಡಿವೈಎಸ್​ಪಿ ನೇತೃತ್ವದಲ್ಲಿ 5 ತಂಡಗಳನ್ನು ರಚಿಸಿ ವಿಶೇಷ ಕಾರ್ಯಾಚರಣೆ ಮೂಲಕ ಆಟೋ, ಟಂಟಂಗಳನ್ನು ಸೀಜ್​ ಮಾಡಲಾಗಿದೆ. ಟ್ರಾಫಿಕ್​ ನಿಯಮಗಳನ್ನು ಉಲ್ಲಂಘಿಸಿದ ಹಾಗೂ ಕಾಗದ ಪತ್ರಗಳು ಸರಿಯಾಗಿರುವ ಆಟೋ ಟಂಟಂಗಳಿಗೆ ದಂಡ ಹಾಕಿ ಬಿಡುಗಡೆ ಗೊಳಿಸಲಾಗುವುದು. ಕಾಗದ ಪತ್ರಗಳಿರದ ಆಟೋ&ಟಂಟಂಗಳನ್ನು ಸಂರ್ಪೂಣವಾಗಿ ಸೀಜ್​ ಮಾಡಲಾಗುವುದು.

ಬಿ. ಎಸ್​. ನೇಮಗೌಡ, ಎಸ್ಪಿ ಗದಗ