ಶಿವಾನಂದ ಹಿರೇಮಠ, ಗದಗ
ಜಿಲ್ಲೆಯ ಮುಂಡರಗಿ ಭಾಗದಲ್ಲಿ ನಡೆದ ಅಕ್ರಮ ಮರಳು ಗಣಿಗಾರಿಕೆ ಅಗೆದಷ್ಟು ಆಳಕ್ಕೆ ಇಳಿಯುತ್ತಿದೆ. ತುಂಗಭದ್ರ ನದಿ ದಡದಲ್ಲಿ ಇರುವ ಹಲವು ಮರಳು ಬ್ಲಾಕ್ ಗಳನ್ನು ಸಮೀೆ ನಡೆಸಿರುವ ಗಣಿ ಮತ್ತು ಬೂ ವಿಜ್ಞಾನ ಇಲಾಖೆ ವರದಿಯಲ್ಲಿ ಸರ್ಕಾರಕ್ಕೆ ರಾಜಧನ ಪಾವತಿಸದೇ ಕೋಟ್ಯಂತ ರೂ. ಮರಳು ಲೂಟಿ ಮಾಡಿದ್ದರ ಬಗ್ಗೆ ಉಲ್ಲೇಖಿಸಲಾಗಿದೆ. ವಿವಿಧ ಮರಳು ಬ್ಲಾಕ್ ಮಾಲೀಕರಿಗೆ 34.43 ಕೋಟಿಗೂ ಅಧಿಕ ರಾಜಧನ, ದಂಡ ಪಾವತಿಸುವಂತೆ ಇಲಾಖೆ ನೋಟೀಸ್ ಕೂಡ ನೀಡಿತ್ತು. ಇಲಾಖೆಯ ಆದೇಶ ಪಾಲಿಸದ ಮಾಲೀಕರ ವಿರುದ್ಧ ಇಲಾಖೆ ದೂರು ದಾಖಲಿಸಿದೆ. ಜಾಮೀನು ಪಡೆದ ಆರೋಪಿತರು ಕೋರ್ಟ ಮೊರೆಹೋಗಿದ್ದಾರೆ. ಅಕ್ರಮ ನಡೆಸಿದವರಲ್ಲಿ ಹಲವರು ಪ್ರಮುಖ ರಾಜಕಾರಣಿಗಳಿರುವುದು ವಿಶೇಷ.
ಏನಿದು ಪ್ರಕರಣ?
ಮುಂಡರಗಿ ಭಾಗದಲ್ಲಿ ಕಳೆದ 5 ವರ್ಷದಿಂದ ಮರಳು ಗಣಿಗಾರಿಕೆ ನಡೆಸಲು ಗುತ್ತಿಗೆ ಪಡೆದ ಕೆಲವು ಮಾಲೀಕರಿಂದ ನಡೆದ ಅಕ್ರಮ ಗಣಿಗಾರಿಕೆ ಇದಾಗಿದೆ. ಗಣಿ ಮತ್ತು ಭೂ ವಿಜ್ಞಾನ ಇಲಾಖೆಯ ಹಲವು ನಿಯಮಗಳನ್ನು ಗಾಳಿಗೆ ತೂರಿ ನಡೆದ ಅಕ್ರಮ ನಡೆಸಿದ್ದು ಲೆಕ್ಕಪರಿಶೋಧನ ಇಲಾಖೆಯಲ್ಲಿ ಬಹಿರಂಗಗೊಂಡಿದೆ. ತುಂಗಭದ್ರ ನದಿಯಲ್ಲಿ ರಸ್ತೆ ನಿಮಿರ್ಸಿ ಗಣಿಗಾರಿಗೆ, ನೀರನ್ನು ಕಲುಷಿತಗೊಳಿಸಿರುವುದು, ಲೀಸ್ ಪಡೆದ ನದಿ ವ್ಯಾಪ್ತಿಯಲ್ಲಿ ಗಣಿಗಾರಿಕೆ, ಗುತ್ತಿಗೆ ಪಡೆದಕ್ಕಿಂತಲೂ ಅಧಿಕ ಆಳದ ವರೆಗೆ ಗುಂಡಿತೋಡಿ ಗಣಿಗಾರಿಕೆ, ಓವರ್ ಲೋಡ್, ಮರಳಿನ ಮೇಲೆ ಮಣ್ಣು ಎಳೆದು ಮರಳಿನ ಸಂಗ್ರಹ ಇಲ್ಲವೇಂದು ಸರ್ಕಾರಕ್ಕೆ ತೋರಿಸಿದ ಆರೋಪ ಸೇರಿದಂತೆ ಹಲವು ಅಕ್ರಮ ಎಸಗಿರುವ ಬಗ್ಗೆ ಇಲಾಖೆ ವರದಿಯಲ್ಲಿ ಉಲ್ಲೇಖಿಸಿದೆ. ಈ ಹಿನ್ನೆಲೆ 2017ರಿಂದಲೂ ಪ್ರತಿವರ್ಷ ರಾಜಧನ, ಸ್ಥಿರ ತೆರಿಗೆ, ಮೇಲ್ಮೆ ಬಾಡಿಗೆ, ಉಪ ಕರ, ದಂಡ ಪಾವತಿಸುವಂತೆ ಎಲ್ಲರಿಗೂ ಇಲಾಖೆ ನೋಟೀಸ್ ನೀಡುತ್ತಲೇ ಬಂದಿದೆ. ಬೆರಳೆಣಿಕೆಷ್ಟು ಮಾಲೀಕರು ಪಾವತಿಸಿದ್ದಾರೆಂದು ಇಲಾಖೆ ಮೂಲಗಳು ತಿಳಿಸಿವೆ. ಮುಂಡರಗಿ ತಾಲೂಕಿನ 16 ಮರಳು ಬ್ಲಾಕ್ ನಿಂದ ದಂಡ, ರಾಜಧನ ಪಾವತಿ ಆಗದ ಹಿನ್ನೆಲೆ ಗಣಿ ಇಲಾಖೆ ಆರೋಪಿತರ ವಿರುದ್ಧ ದೂರು ದಾಖಲಿಸಿದೆ. ಆರೋಪಿತ ಮರಳು ಬ್ಲಾಕ್ ಮಾಲೀಕರು ಜಾಮೀನು ಪಡೆದು ಇಲಾಖೆ ವಿರುದ್ಧ ಕೊರ್ಟ್ ಮೆಟ್ಟಿಲೇರಿದ್ದಾರೆ.
