ವಿಜಯವಾಣಿ ವಿಶೇಷ ಗದಗ
ಚುನಾವಣಾ ಗುಂಗಿನಿಂದ ಇನ್ನೂ ಹೊರ ಬಾರದ ನಗರಸಭೆ, ಪುರಸಭೆ, ಪಟ್ಟಣ ಪಂಚಾಯತಿ ಹಾಗೂ ಗ್ರಾಪಂ ಸದಸ್ಯರು ತಮ್ಮ ಜವಾಬ್ದಾರಿಯಿಂದ ಕಳಚಿಕೊಳ್ಳುತ್ತಿದ್ದಾರೆ. ಕಸ ವಿಲೇವಾರಿಯಲ್ಲೆ ಎಡುವುತ್ತಿರುವ ಸದಸ್ಯರು ಸಾರ್ವಜನಿಕ ಸೇವೆಯನ್ನು ಮರೆತಿದ್ದಾರೆ. ಇದರಿಂದ ಗದಗ ಸೇರಿದಂತೆ ಜಿಲ್ಲೆಯ ಪ್ರಮುಖ ಪಟ್ಟಣಗಳಲ್ಲಿ ಎಲ್ಲೆಂದರಲ್ಲಿ ಕಸದ ರಾಶಿ ಕಾಣುತ್ತಿದೆ.
ನಗರದ ಜನ ದಟ್ಟಣಿ ಪ್ರದೇಶದಲ್ಲಿ ಜನರು ಮೂಗು ಮುಚ್ಚಿ ತಿರುಗಾಡುವ ಸ್ಥಿತಿ ಬಂದೊಂದಗಿದೆ. ಕೇವಲ ಸ್ಥಾಯಿ ಸಮಿತಿ ಅಧ್ಯಕ್ಷರು ಸ್ವಚ್ಚತೆಯ ಉಸ್ತುವಾರಿಗಳು, ನಮಗೆ ಅದರ ಹೊಣೆಯಿಲ್ಲ ಎಂದು ಇತರೆ ಸದಸ್ಯರ ನಡೆದುಕೊಳ್ಳುತ್ತಿದ್ದಾರೆ. ಹಾಗಾಗಿ ರಾಜಕಾಲುವೆ, ಒಳಚರಂಡಿಗಳು ಕಸದಿಂದ ತುಂಬಿ ತುಳುಕುತ್ತಿವೆ. ಪ್ರಮುಖ ವೃತ್ತಗಳಲ್ಲಿ ಕಸದರಾಶಿ ಕಾಣುತ್ತಿದೆ. ಸಾರ್ವಜನಿಕರ ದೂರುಗಳನ್ನು ಸಹ ಸ್ಥಳಿಯ ಸಂಸ್ಥೆಗಳು ಗಂಭೀರವಾಗಿ ಪರಿಗಣಿಸುತ್ತಿಲ್ಲ. ಜಿಲ್ಲೆಯಾದ್ಯಂತ ಮುಂಗಾರು ಆರಂಭಗೊಂಡಿದೆ. ಮಳೆಯಿಂದ ಚರಂಡಿಯ ಕಸದ ರಾಶಿ ರಸ್ತೆಗೆ ತೂರಿ ಬೀಳುವ ದೃಶ್ಯ ಸಾಮಾನ್ಯ.
ಗದಗ ನಗರದಲ್ಲಿ ಪ್ರತಿ ದಿನ 75 ಟನ್ ಕಸದ ವಿಲೇವಾರಿ ಮಾಡಲಾಗುತ್ತಿದೆ ಎಂದು ಇಲಾಖಾ ಮೂಲಗಳು ತಿಳಿಸಿವೆ. ಆದರೆ, ಪ್ರತಿನಿತ್ಯ 140 ಟನ್ ಗೂ ಅಧಿಕ ತ್ಯಾಜ್ಯ ಮನೆಯಿಂದ ಹೊರ ಬರುತ್ತದೆ. ಅಧಿಕಗೊಳ್ಳುತ್ತಿರುವ ನಗರೀಕರಣದಿಂದ ಖಾಸಗಿ ಮಾಲೀಕತ್ವದ ಜಮೀನುಗಳು ಕಸದ ಅಡ್ಡ ಆಗಿ ಮಾರ್ಪಟ್ಟಿವೆ. ತ್ಯಾಜ್ಯದ ನಿರ್ವಹಣೆಯಲ್ಲಿ ನಗರಸಭೆ ಗಂಭೀರ ಕಾರ್ಯ ಮಾಡಬೇಕಿದೆ.
16 ಟ್ರ್ಯಾಕ್ಟರ್, 33 ಟಾಟಾ ಎಸ್ ವಾಹನ್, 4 ಕಾಂಪ್ಯಾಕ್ಟ್ಗಳು, 242 ಸಿಬ್ಬಂದಿಗಳು, 133 ಸ್ವಸಹಾಯ ಗುಂಪುಗಳು, 61 ಜನ ಚಾಲಕರಿದ್ದು ಕೂಡ ಕಸದ ವಿಲೇವಾರಿ ಸಮರ್ಪಕ ನಡೆಯುತ್ತಿಲ್ಲ. ಕೇವಲ ಮನೆ ಮನೆ ಕಸ ಸಂಗ್ರಹಕ್ಕೆ ಒತ್ತು ನಿಡಲಾಗುತ್ತಿದ್ದು, ಮಾರುಕಟ್ಟೆಯಲ್ಲಿನ ತ್ಯಾಜ್ಯ ಬಗ್ಗೆ ಮೀನಾ ಮೇಷ ಎನಿಸಲಾಗುತ್ತಿದೆ.
