"ಸಂತ ರಾಜಕಾರಣಿ ಡಿ. ಆರ್​. ಪಾಟೀಲ' ಗ್ರಂಥ ಬಿಡುಗಡೆ ಕಾರ್ಯಕ್ರಮ

ಡಿ.ಆರ್​. ಪಾಟೀಲ ನಮ್ಮ ಕುಟುಂಬದ ಗೌರವ: ಎಚ್​.ಕೆ. ಪಾಟೀಲ

ವಿಜಯವಾಣಿ ಸುದ್ದಿಜಾಲ ಗದಗ

ನಗರದ ತೊಂಟದಾರ್ಯ ಮಠದಲ್ಲಿ ಬುಧವಾರ "ಸಂತ ರಾಜಕಾರಣಿ ಡಿ.ಆರ್​. ಪಾಟೀಲ' ಗ್ರಂಥ ಬಿಡುಗಡೆ ಕಾರ್ಯಕ್ರಮ ಜರುಗಿತು. "ಡಿ.ಆರ್​. ಪಾಟೀಲ ಅವರಂತಹ ಮೇರು ವ್ಯಕ್ತಿತ್ವದ ರಾಜಕಾರಣಿ ವಿಧಾನ ಮಂಡಲದಲ್ಲಿ ಇರಬೇಕಿತ್ತು' ಎಂದು ವೇದಿಕೆಯಲ್ಲಿದ್ದ ಗಣ್ಯರು ಭಾಷಣದಲ್ಲಿ ಉಲ್ಲೇಖಿಸುದರ ಜತೆಗೆ ಇಂದಿನ ರಾಜಕಿಯ ವ್ಯವಸ್ಥೆಯಲ್ಲಿ ಡಿ.ಆರ್​. ಪಾಟೀಲರಂತಹ ರಾಜಕಾರಣಿಯನ್ನು ವಿಧಾನಮಂಡಲದಲ್ಲಿ ಊಹಿಸುವುದಕ್ಕೂ ಕಷ್ಟ ಎಂಬಂತೆ ವ್ಯವಸ್ಥೆ ಕುಲಗೆಟ್ಟಿದೆ ಎಂದು ಆತ್ಮವಿಮರ್ಶೆ ಮಾಡಿಕೊಂಡರು. ಎಚ್​. ಕೆ. ಪಾಟೀಲರು ತಮ್ಮ ಭಾಷಣದಲ್ಲಿ, ಡಿ.ಆರ್​. ಪಾಟೀಲ ನಮ್ಮ ಕುಟುಂಬದ ಗೌರವ ಎಂದು ಎಚ್​.ಕೆ. ಪಾಟೀಲರು ವೇದಿಕೆಯಲ್ಲಿ ಭಾವನಾತ್ಮಕ ಮಾತುಗಳನ್ನಾಡಿದ್ದು ನೆರೆದ ಜನರನ್ನು ಭಾವುಕಗೊಳಿಸಿತು. ರಾಜಕೀಯ ಜೀವನದಲ್ಲಿ ಪರಸ್ಪರ ತ್ಯಾಗದ ಕುರಿತು, ಎಚ್​.ಕೆ. ಪಾಟೀಲ ಮತ್ತು ಡಿ.ಆರ್​. ಪಾಟೀಲ ಅವರು ತಮ್ಮ ಸಹೋದರತ್ವ ಮತ್ತು ರಾಜಕೀಯ ಸಂಬಂಧಗಳ ಒಳಪುಟಗಳ ಕುರಿತು ಲೋಕಾಭಿಮಾನರಾಗಿ ಹಂಚಿಕೊಂಡರು. ಇದರಿಂದ ವೇದಿಕೆಯ ಕಳೆ ಮತ್ತಷ್ಟು ವ್ಯಾಪಿಸಿತು.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿದ ಸಚಿವ ಎಚ್​.ಕೆ. ಪಾಟೀಲ, ತಂದೆಯವರಾದ ಕೆ.ಎಚ್​. ಪಾಟೀಲರು ದಿವಂಗತರಾದ ನಂತರ ನಮ್ಮ ಮನೆತನದ ಗೌರವವನ್ನು ಮತ್ತಷ್ಟು ಹಿರಿಮೆಗೊಳಿಸಿದವರು ಸಹೋದರ ಡಿ.ಆರ್​. ಪಾಟೀಲರು. ಅವರ ನಾಯಕತ್ವ ಬಳುವಳಿಯಾಗಿ ಬರುವುದು ಕಷ್ಟಸಾಧ್ಯ. ನಮ್ಮನ್ನು ಪರೀಕ್ಷೆಗೆ ಒಳಪಡಿಸಿ, ನಮಗೆ ಯಶಸ್ಸು ತಂದುಕೊಟ್ಟು, ನಮ್ಮ ಯಶಸ್ಸಿನಲ್ಲಿ ಅವರು ಯಶಸ್ಸು ಕಾಣುತ್ತಾರೆ. ದಿವಂಗತ ಕೆ.ಎಚ್​. ಪಾಟೀಲ ಅವರ ನಿರ್ದೇಶನಗಳನ್ನು ಅನುಷ್ಠಾನ ಮಾಡಲು ಡಿ.ಆರ್​. ಪಾಟೀಲ ಅವರು ತಮ್ಮ ಅರ್ಧ ಜೀವನವನ್ನೇ ಮುಡಿಪಾಗಿಟ್ಟರು. ಜಿಲ್ಲೆಯಲ್ಲಿ ಅಭಿವೃದ್ಧಿಪರ ಬದಲಾವಣೆ ತರಲು ಹಿರಿಯ ಸಹೋದರ ಡಿ.ಆರ್​. ಪಾಟೀಲ ಅವರ ಶ್ರಮ ಮತ್ತು ಲಿಂಗೈಕ್ಯ ತೋಂಟದಾರ್ಯ ಸಿದ್ಧಲಿಂಗ ಶ್ರೀಗಳ ಆಶೀರ್ವಾದ ಇದೆ. ರೈತರನ್ನು ಶೋಷಣೆಯಿಂದ ಮುಕ್ತಗೊಳಿಸಲು, ಎಪಿಎಂಸಿಗಳಲ್ಲಿ ಭ್ರಷ್ಟಾಚಾರ ಮುಕ್ತಮಾಡಲು ಡಿ.ಆರ್​. ಪಾಟೀಲ ಮಾದರಿ ಕೆಲಸ ಮಾಡಿದ್ದಾರೆ. ಗ್ರಾಮಸ್ವರಾಜ್ಯ ನೀತಿ ಜಾರಿಗೆ ಅವರ ಆಗ್ರಹ ಮೊದಲಿನಿಂದಲೂ ಇದೆ ಎಂದರು. ಅವರ ಮಾರ್ಗದರ್ಶನ, ಸರಳತೆ ನಮಗೆ ಆದರ್ಶ ಎಂದರು.

ಸಂಬಂಧಗಳು ಸುಧಾರಿಸಿದವು:

ಎಚ್​.ಕೆ. ಪಾಟೀಲರು ತಮ್ಮ ಆರಂಭಿಕ ರಾಜಕೀಯ ಜೀವನವನ್ನು ಸ್ಮರಿಸಿ, ಮೊದಲ ಬಾರಿಗೆ ಎಂಎಲ್​ಸಿ ಆದ ಸಂದರ್ಭದಲ್ಲಿ ತೋಂಟದಾರ್ಯ ಸಿದ್ಧಲಿಂಗೇಶ್ವರ ಟ್ರಸ್ಟ್​ ಗೆ ನನ್ನನ್ನು ಸದಸ್ಯರನ್ನಾಗಿ ನೇಮಿಸಲಾಗಿತ್ತು. ಅದಕ್ಕೆ ವಿರೋಧ ವ್ಯಕ್ತವಾಗಿತ್ತು. ಅಂದು ಡಿ.ಆರ್​. ಪಾಟೀಲರು ತೋಂಟದಾರ್ಯ ಶ್ರೀಗಳ ಬಳಿ ನನ್ನನ್ನು ಕರೆದುಕೊಂಡು ಹೋಗಿದ್ದರು ಮತ್ತು ಶ್ರೀಗಳ ಮಾರ್ಗದರ್ಶನದಂತೆ ಟ್ರಸ್ಟ್​ ನಲ್ಲಿ ಕಾರ್ಯನಿರ್ವಹಿಸಲು ಸೂಚಿಸಿದ್ದರು. ಅಂದಿನಿಂದ ತೋಂಟದಾರ್ಯ ಮಠ ಮತ್ತು ನಮ್ಮ ಕುಟುಂಬದ ಸಂಬಂಧ ಸುಧಾರಿಸಿದರು. ತದನಂತರ ಶ್ರೀಗಳು ಯಾವುದೇ ಸಾಮಾಜಿಕ ನಿರ್ಣಯಗಳನ್ನು ತೆಗೆದುಕೊಳ್ಳಲು ನಮ್ಮನ್ನು ಸಂಪಕಿರ್ಸುತ್ತಿದ್ದರು ಎಂದು ತಿಳಿಸಿದರು.

ಸಚಿವ ಕೃಷ್ಣ ಬೈರೇಗೌಡ ಮಾತನಾಡಿ, ಗದಗ ಮಣ್ಣಿನ ಸಂಪ್ರದಾಯದ ರಾಯಭಾರಿಯಂತೆ ಡಿ.ಆರ್​. ಪಾಟೀಲ ಇದ್ದಾರೆ. ಗಾಂಧಿವಾದಿ, ಧರ್ಮ ಶ್ರದ್ಧತೆ, ನಾಯಕತ್ವ ಗುಣ ಸೇರಿದಂತೆ ಎಲ್ಲವನ್ನು ಒಳಗೊಳ್ಳುವ ಪ್ರತಿರೂಪವೇ ಡಿ.ಆರ್​. ಪಾಟೀಲರು. ಹೊಸ ಮತ್ತು ಹಳೆಯ ರಾಜಕಾರಣಕ್ಕೆ ಕೊಂಡಿಯಂತಿರುವ ಬೆರಳಣಿಕೆಯಷ್ಟು ರಾಜಕಾರಣಿಗಳಲ್ಲಿ ಡಿ.ಆರ್​. ಪಾಟೀಲರು ಒಬ್ಬರು ಎಂದರು.

ಗ್ರಂಥ ಬಿಡುಗಡೆಗೊಳಿಸಿ ಮಾತನಾಡಿದ ಬೆಂಗಳೂರಿನ ಗಾಂಧೀ ಸ್ಮಾರಕನಿಧಿ ಅಧ್ಯಕ್ಷ ವೂಡೆ ಕೃಷ್ಣ ಅವರು, ಡಿ.ಆರ್​. ಪಾಟೀಲ ರಾಜಕೀಯ ಜೀವನದಲ್ಲಿ ಎಂದಿಗೂ ತಮ್ಮ ತತ್ವದಿಂದ ಹಿಂದೆ ಸರಿದಿಲ್ಲ. ಬಹುತ್ವವು ನಮ್ಮ ಶಕ್ತಿಯೇ ವಿನಃ ನಮ್ಮ ದೌರ್ಭಲ್ಯವಲ್ಲ ಎಂಬುದನ್ನು ಡಿ.ಆರ್​. ಪಾಟೀಲ ಅವರು ಅಳವಡಿಸಿಕೊಂಡು ಬಂದಿದ್ದಾರೆ. ಇನ್ನೊಬ್ಬರಿಗಾಗಿ ಮರುಗುವ ಜೀವ ಅವರದ್ದು. ತುಂಬ ಸರಳ ಜೀವನ ಪದ್ದತಿ, ಪಾರದರ್ಶಕ ಬದುಕು, ಅಜಾತ ಶತ್ರು ಅವರಾಗಿದ್ದಾರೆ. ಸಾರ್ವಜನಿಕ ಪರಿಶುದ್ಧತೆಗೆ ಪ್ರತಿರೂಪವೇ ಡಿ.ಆರ್​. ಪಾಟೀಲ ಎಂದರು.

ಸಭಾಪತಿ ಬಸವರಾಜ ಹೊರಟ್ಟಿ ಮಾತನಾಡಿ, ಬದ್ಧತೆಯನ್ನು ಅವರಲ್ಲಿ ನೋಡಿ ಕಲಿಯಬೇಕು. ನಾನು ಗ್ರಾಮೀಣಾಭಿವೃದ್ಧಿ ಸಚಿವನಾಗಿದ್ದ ಸಂದರ್ಭದಲ್ಲಿ ಗ್ರಾಪಂಗಳಿಗೆ ನೇರವಾಗಿ ಅನುದಾನ ಒದುಗಿಸುವ ಪ್ರಕ್ರಿಯೆಯನ್ನು ಡಿ.ಆರ್​. ಪಾಟೀಲರ ಸಲಹೆ ಮೇರೆಗೆ ಆರಂಭೀಸಿದ್ದೇನು. ವಿರೋಧಿಗಳಿಲ್ಲದ್ದ ವ್ಯಕ್ತಿತ್ವ ಡಿ.ಆರ್​. ಪಾಟೀಲ ಅವರದ್ದಾಗಿದೆ. ಅವರಿಗೆ ವಿರೋದಿಗಳೇ ಇಲ್ಲ ಎಂದು ಹೊರಟ್ಟಿ ಹೇಳಿದರು.

======

ಅವರಂತಿರಬೇಕು:

ವಿಧಾನಮಂಡಲದಲ್ಲಿ ಡಿ.ಆರ್​. ಪಾಟೀಲ ಅವರಂತಹ ರಾಜಕಾರಣಿ ಅವಶ್ಯಕತೆ ಇದೆ ಎಂಬುದನ್ನು ಗಣ್ಯರು ಒತ್ತಿ ಹೇಳಿದರು. ಸೇವಾ ರಾಜಕಾರಣ ಬದಲಾಗಿ ಸ್ವರಾಜಕಾರಣ ನಡೆಯುತ್ತಿದೆ, ಸೇವಾ ರಾಜಕಾರಣದ ಕೊನೆಯ ಕೊಂಡಿಯಾಗಿ ಡಿ.ಆರ್​. ಪಾಟೀಲ ಇದ್ದಾರೆ. ಆದರೆ, ಅಂತಹ ಸಂತ ರಾಜಕಾರಣಿ ವಿಧಾನ ಮಂಡಲದಲ್ಲಿ ಇರಬೇಕು ಎನ್ನುವ ವಿಚಾರ ಮಾಡಲು ಊಹಿಸಲಾಗದಷ್ಟು ರಾಜಕಾರಣ ಕಲುಷಿತವಾಗಿದೆ ಎಂದು ಕೃಷ್ಣಬೈರೇಗೌಡ ಬೇಸರ ವ್ತಕ್ತಪಡಿಸಿದರು. ವಿಧಾನಮಂಡಲದಲ್ಲಿ ಡಿ.ಆರ್​. ಪಾಟೀಲರು ಬಂದರೆ ಅದೊಂದು ದೇವಸ್ಥಾನಕ್ಕೆ ಸಮಾನ ಆಗುತ್ತದೆ ಎಂದು ಬಸವರಾಜ ಹೊರಟ್ಟಿ ಉಲ್ಲೇಖಿಸಿದರು.

ಕಾರ್ಯಕ್ರಮದಲ್ಲಿ ಗ್ರಂಥ ಲೇಖಕ ಜೆ.ಕೆ. ಜಮಾದಾರ ಒಳಗೊಂಡು ಗಣ್ಯರನ್ನು ಸನ್ಮಾನಿಸಲಾಯಿತು. ತೋಂಟದ ಸಿದ್ಧರಾಮ ಶ್ರೀಗಳು ಮತ್ತು ರಾಮಕೃಷ್ಣ ಆಶ್ರಮದ ನಿರ್ಭಯಾನಂದ ಶ್ರೀಗಳು ಸಾನ್ನಿದ್ಯ ವಹಿಸಿದ್ದರು. ಡಿ.ಆರ್​. ಪಾಟೀಲ ಶಾಸಕ ಜಿ.ಎಸ್​. ಪಾಟೀಲ, ಎಸ್​.ವಿ. ಸಂಕನೂರು, ಐ.ಜಿ. ಸನದಿ, ಬಿ.ಆರ್​. ಯಾವಗಲ್ಲ, ಜಿ.ಎಸ್​. ಗಡ್ಡದೇವರಮಠ, ಜೆ.ಕೆ. ಜಮಾದಾರ, ಉಮೇಶಗೌಡ ಪಾಟೀಲ ಇತರರು ಇದ್ದರು.

===

ಕೋಟ್​:

ಡಿ.ಆರ್​. ಪಾಟೀಲರ ಅವರಿಗೆ ಇರುವಷ್ಟು ಸಮಯಪ್ರಜ್ಞೆ ಮತ್ತೊಬ್ಬರಿಲ್ಲ. ಜಿಲ್ಲೆಯ ಅಭಿವೃದ್ಧಿ ವಿಷಯದಲ್ಲಿ ಯಾವಾಗಲೂ ಸಕಾರಾತ್ಮ ನಿರ್ಧಾರವನ್ನೇ ತೆಗೆದುಕೊಳ್ಳುತ್ತಾರೆ. ಅವರಿಂದ ಯುವ ರಾಜಕಾರಣಿಗಳು ಕಲಿಯುವುದು ಬಹಳಷ್ಟಿದೆ.

-  ಜಿ.ಎಸ್​. ಪಾಟೀಲ, ಶಾಸಕರು

====

ಕೋಟ್​:

ಕಲುಷಿತ ಗೊಂಡ ಇಂತಹ ರಾಜಕೀಯ ವ್ಯವಸ್ಥೆಯಲ್ಲಿ ಡಿ.ಆರ್​. ಪಾಟೀಲ ಅವರಂತಹ ರಾಜಕಾರಣಿಗಳು ರಾಜಕೀಯ ವ್ಯವಸ್ಥೆ ತಿಳಿಗೊಳಿಸಲು ಅಗತ್ಯವಿದೆ. ಅವರು ಸ್ವಂತಕ್ಕಾಗಿ ರಾಜಕೀಯ ಮಾಡಲಿಲ್ಲ. ಅಂತರ್ಜಲ ಹೆಚ್ಚಿಸುವ, ಗ್ರಾಮ ಸ್ವರಾಜ್ಯ ಕಾರ್ಯಕ್ರಮಗಳ ಅನುಷ್ಠಾನದಲ್ಲಿ ಅವರ ಪಾತ್ರ ಹೆಚ್ಚಿದೆ. ನೂರು ವರ್ಷಗಳ ಕಾಲ ಆರೋಗ್ಯವಂತಬದುಕು ಅವರದ್ದಾಗಲಿ.

- ಎಸ್​. ವಿ. ಸಂಕನೂರು

===

ಕೋಟ್​

ಡಿ.ಆರ್​. ಪಾಟೀಲ ಅವರನ್ನು ಕೇಂದ್ರದ ರಾಜಕಾರಣದಲ್ಲಿ ನೋಡಬೇಕೆನ್ನುವುದು ದಿವಂಗತ ಕೆ.ಎಚ್​. ಪಾಟೀಲ ಅವರ ಬಯಕೆ ಆಗಿತ್ತು. ರಾಜ್ಯದಲ್ಲಿ 4 ಜನರನ್ನು ರಾಜ್ಯಸಭೆಗೆ ಕಳುಹಿಸುತ್ತೇವೆ. ಅದರಲ್ಲಿ ಡಿ.ಆರ್​. ಪಾಟೀಲ ಅವರನ್ನು ಒಬ್ಬರಾಗಿ ಕಳುಹಿಸಿದರೆ ಉತ್ತಮ ನಿರ್ಧಾರ.

ಐ.ಜಿ. ಸನದಿ, ಮಾಜಿ ಸಂಸದ

===

ಕೋಟ್​:

ಎಚ್​. ಕೆ. ಪಾಟೀಲರಿಗಾಗಿ ನೀವು ಕ್ಷೇತ್ರವನ್ನು ತ್ಯಾಗ ಮಾಡಿದ್ದೀರಿ ಎಂದು ಕೆಲವರು ಹೇಳುತ್ತಾರೆ. ಆದರೆ, ಎಚ್​. ಕೆ. ಪಾಟೀಲ ನನಗಾಗಿ ತ್ಯಾಗ ಮಾಡಿದ್ದು ಹಲವರಿಗೆ ಗೊತ್ತಿಲ್ಲ.

- ಡಿ.ಆರ್​. ಪಾಟೀಲ, ಮಾಜಿ ಶಾಸಕ.