ನ.8 ರಂದು ಚೆನ್ನಮ್ಮ ವಿಜಯೋತ್ಸವದ

Gadag: ಭಾರತದ ಇತಿಹಾಸದಲ್ಲಿ ಮೊದಲ ಸ್ವಾತಂತ್ರ್ಯ ಹೋರಾಟಗಾರ್ತಿ ಕಿತ್ತೂರು ಚೆನ್ನಮ್ಮ ಅವರ ಹೋರಾಟದ ಕುರುಹಾಗಿ ನಗರದಲ್ಲಿ ನ.8 ರಂದು ಚೆನ್ನಮ್ಮ ವಿಜಯೋತ್ಸವದ ಸಮಾರಂಭ ಹಮ್ಮಿಕೊಳ್ಳಲಾಗಿದೆ ಎಂದು ಪಂಚಮಸಾಲಿ ಮುಖಂಡ ಎಂ.ಎಸ್. ಕರೀಗೌಡರ ಹೇಳಿದರು.

ನಗರದ ಪತ್ರಿಕಾ ಭವನದಲ್ಲಿ ಸುದ್ದಿಗೋಷ್ಟಿ ನಡೆಸಿ ಮಾತನಾಡಿದ ಅವರು, ನ.08 ರಂದು ಬೆಳಗ್ಗೆ ಕಿತ್ತೂರು ಚೆನ್ನಮ್ಮ ವೃತ್ತದಿಂದ ಮೆರವಣಿಗೆ ಆರಂಭಗೊಳ್ಳುವುದು. ಮೆರವಣಿಗೆಯಲ್ಲಿ ಡಿಜೆ ನಿಷೇಧಿಸಿ, ಗ್ರಾಮೀಣ ಭಾಗದ ಡೊಳ್ಳು, ಕೋಲು ನೃತ್ಯಗಳನ್ನು ಬಳಸಿಕೊಳ್ಳಲಾಗಿದೆ. ಮೆರವಣಿಗೆ ನಂತರ ಮಧ್ಯಾಹ್ನ 3 ಕ್ಕೆ ನಗರದ ಬಸವೇಶ್ವರ ವೃತ್ತದಲ್ಲಿ ಬಹಿರಂಗ ಸಮಾವೇಶ ನಡೆಸಲಾಗುವುದು. ಬಸನಗೌಡ ಪಾಟೀಲ ಯತ್ನಾಳ, ವಿಜಯಕುಮಾರ ಗಡ್ಡಿ ಸೇರಿದಂತೆ ಕೂಡಲಸಂಗಮ ಶ್ರೀಗಳು, ಹರಿಹರ ಪೀಠದ ಶ್ರೀಗಳು, ಶಾಸಕ ಸಿ.ಸಿ. ಪಾಟೀಲ, ಮಾಜಿ ಸಚಿವ ಕಳಕಪ್ಪ ಬಂಡಿ ಕಾರ್ಯಕ್ರಮದಲ್ಲಿ ಭಾಗವಹಿಸಲಿದ್ದಾರೆ ಎಂದರು.

ಬಸನಗೌಡ ಪಾಟೀಲ ಯತ್ನಾಳ ನಗರಕ್ಕೆ ಬಂದನಂತರ ಬೈಕ್ ರ್ಯಾಲಿ ಮೂಲಕ ಅವರನ್ನು ನಗರಕ್ಕೆ ಕರೆತರಲಾಗುವುದು. ಕಳಕಪ್ಪ ಬಂಡಿ ಮತ್ತು ಶಾಸಕ ಸಿ.ಸಿ. ಪಾಟೀಲ ಅವರು ಈ ಸಮಯದಲ್ಲಿ ಚೆನ್ನಮ್ಮ ವೃತ್ತದಲ್ಲಿ ಚೆನ್ನಮ್ಮ ಮೂರ್ತಿಗೆ ಮಾಲಾರ್ಪಣೆ ಮಾಡುವರು ಎಂದು ತಿಳಿಸಿದರು.

ಶಿವು ಹಿರೇಮನಿ ಪಾಟೀಲ, ಅಯ್ಯಪ್ಪ ಅಂಗಡಿ, ಬಸವಣ್ಣೆಪ್ಪ ಚಿಂಚಲಿ, ವಸಂತ ಪಡಗದ, ಸಂತೋಷ ಕಬಾಡರ, ರಾಜು ಖಾನಪ್ಪನ್ನವರ ಇತರರು ಇದ್ದರು.