ನಗರದ ತೋಟಗಾರಿಕೆ ಇಲಾಖೆಯ ಆವರಣದಲ್ಲಿ ಸುದ್ದಿಗೋಷ್ಠಿಯಲ್ಲಿ ಶುಕ್ರವಾರ ಈ ಕುರಿತು ಮಾಹಿತಿ ನೀಡಿದ ತೋಟಗಾರಿಕೆ ಇಲಾಖೆ ಉಪನಿರ್ದೇಶಕ ಡಾ. ಬಿ.ಪಿ. ಸತೀಶ, ವಿವಿಧ ಯೋಜನೆಗಳಡಿ ಲಭ್ಯವಿರುವ 13.19 ಲಕ್ಷ ರೂ. ಅನುದಾನ ಬಳಸಿಕೊಂಡು ಈ ಕಾರ್ಯಕ್ರಮ ಆಯೋಜಿಸಲಾಗಿದೆ. ಫಲಪುಷ್ಪ ಪ್ರದರ್ಶನಕ್ಕಾಗಿ ಎಂಟಿರಿಯಂ, ಡಯಾಂತಸ್, ಇಂಪೆಶನ್ಸ್, ವಿವಿಧ ಜಾತಿಯ ಹೂವಿನ ಗಿಡಗಳನ್ನು ಒಳಗೊಂಡಂತೆ ಸುಮಾರು 15 ಸಾವಿರ ಹೂವಿನ ಗಿಡಗಳನ್ನು ತೋಟಗಾರಿಕೆ ಇಲಾಖೆಯ ಆವರಣದಲ್ಲಿ ಬೆಳೆಸಲಾಗಿದೆ. ಪುಷ್ಪಗಳಿಂದ ನಂದಿ- ಈಶ್ವರ ಲಿಂಗದ ಮಾದರಿಯಲ್ಲಿ ಕಲಾಕೃತಿ ರಚಿಸಲಾಗುತ್ತಿದೆ. ಸಿರಿಧಾನ್ಯಗಳಿಂದ ರಚಿಸಿದ ಚೆಸ್ ಪಾಕ, ಸಾವಯವ ಸಿರಿಧಾನ್ಯ ಮಳಿಗೆಗಳು, ದಿ. ತುಳಸಿ ಗೌಡ, ಸುಕ್ರಿ ಗೌಡ ಮತ್ತು ಕುಂಬಮೇಳವನ್ನು ಬಿಂಬಿಸುವ ಪುಷ್ಪ ರಂಗೋಲಿಗಳು, ಬಾಳೆಯಿಂದ ತಯಾರಿಸಿ ಖಾದ್ಯಗಳ ಸ್ಪರ್ಧೆ, ತೋಟಗಾರಿಕೆ ಬೆಳೆಗಳ ಸ್ಥಳೀಯ ತಳಿ, ವಿಶೇಷ ತಳಿಗಳ ಪ್ರದರ್ಶಿಕೆಗಳು, ವಿವಿಧ ವಿನ್ಯಾಸಗಳಲ್ಲಿ ಹೂ ಕುಂಡಗಳ ಜೋಡಣೆ ಈ ವರ್ಷದ ವಿಶೇಷ ಆಕರ್ಷಣೆ ಆಗಲಿವೆ ಎಂದರು.
