ಸಾಮರಸ್ಯದಿಂದ ಸ್ವಸ್ಥ ಸಮಾಜ ನಿರ್ಮಾಣ

ಉಡುಪಿ: ಪರಸ್ಪರ ಸೌಹಾರ್ದತೆ ಹಾಗೂ ಸಾಮರಸ್ಯದಿಂದ ಸ್ವಸ್ಥ ಸಮಾಜ ನಿಮಾರ್ಣ ಸಾಧ್ಯ ಎಂದು ಆದರ್ಶ ಆಸ್ಪತ್ರೆ ಆಡಳಿತ ನಿರ್ದೇಶಕ ಡಾ. ಜಿ. ಎಸ್​. ಚಂದ್ರಶೇಖರ್​ ಹೇಳಿದರು.

ಗುರುವಾರ ಶೋಕಮಾತಾ ಚರ್ಚ್​ ಸಭಾಂಗಣದಲ್ಲಿ ಉಡುಪಿ ಕೆಥೊಲಿಕ್​ ಧರ್ಮಪ್ರಾಂತ್ಯ ವತಿಯಿಂದ ಮಾಧ್ಯಮ ಮಿತ್ರರಿದೊಂದಿಗೆ ಸೌಹಾರ್ದ ಕ್ರಿಸ್ಮಸ್​ ಆಚರಣೆಯನ್ನು ಕೇಕ್​ ಕತ್ತರಿಸುವ ಮೂಲಕ ಉದ್ಘಾಟಿಸಿ ಮಾತನಾಡಿದರು.

ಅಭಿವೃದ್ಧೀಶಿಲ ಭಾರತದಲ್ಲಿ ವೈದ್ಯಕಿಯ, ಇಂಜಿನಿಯರಿಂಗ್​ ಸೇರಿದಂತೆ ಎಲ್ಲಾ ಕ್ಷೇತ್ರಗಳಲ್ಲೂ ಕೌಶಲ್ಯಪರರ ಕೊರತೆ ಕಾಡುತ್ತಿದೆ. ಈ ಸಮಸ್ಯೆ ನಿವಾರಣೆಗೆ ಎಲ್ಲರೂ ಗಮನಹರಿಸಬೇಕು. ದೇಶದಲ್ಲಿ 15ರಿಂದ 20 ಕೋಟಿ ಮಂದಿ ಬೊಜ್ಜುತನ ಸಮಸ್ಯೆಯಿಂದ ಬಳಲುತ್ತಿದ್ದು, ಹಿತಮಿತ ಆಹಾರ, ವ್ಯಾಯಾಮ ಕ್ರಮ ರೂಢಿಸಿಕೊಳ್ಳುವಂತೆ ಸಲಹೆ ನೀಡಿದರು.

ಸಿಎಸ್​ ಐ ಕರ್ನಾಟಕ ದಕ್ಷಿಣ ಪ್ರಾಂತ ಧಮಾರ್ಧ್ಯಕ್ಷ ಅತಿ ಹೇಮಚಂದ್ರ ಕುಮಾರ್​ ಮಾತನಾಡಿ, ಸಮುದಾಯದ ಮಧ್ಯೆ ಮನುಷ್ಯತ್ವದ ಕಾರ್ಯವುಳ್ಳ ವ್ಯಕ್ತಿಯಾಗಿ ಯೇಸು ಸ್ವಾಮಿ ಬದುಕುವ ಮೂಲಕ ಮಾದರಿಯಾಗಿದ್ದಾರೆ. ಕ್ರಿಸ್ಮಸ್​ ಹಬ್ಬ ಶಾಂತಿ ಸೌಹಾರ್ದತೆಯ ಜೀವನ ನಡೆಸಲು ಸಹಕಾರಿಯಾಗಲಿ ಎಂದು ಹೇಳಿದರು.

ಉಡುಪಿ ಜಿಲ್ಲಾ ವಾರ್ತಾಧಿಕಾರಿ ಬಿ ಮಂಜುನಾಥ್​, ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘ ಅಧ್ಯಕ್ಷ ರಾಜೇಶ್​ ಶೆಟ್ಟಿ ಶುಭ ಹಾರೈಸಿದರು. ಉಡುಪಿ ಧರ್ಮಪ್ರಾಂತ್ಯದ ಶ್ರೇಷ್ಠ ಗುರು ಮೊನ್ಸಿಂಜ್ಞೊರ್​ ಫರ್ಡಿನಾಂಡ್​ ಗೊನ್ಸಾಲ್ವಿಸ್​, ಶೋಕಮಾತಾ ಇಗರ್ಜಿಯ ಪ್ರಧಾನ ಧರ್ಮಗುರು ಚಾರ್ಲ್ಸ್​ ಮಿನೇಜಸ್​, ಉಡುಪಿ ಪತ್ರಿಕಾ ಭವನದ ಸಹ ಸಂಚಾಲಕ ಅಂಕಿತ್​ ಶೆಟ್ಟಿ, ಡಾ.ರೋಶನ್​ ಡಿಸೋಜಾ, ಆಲ್ವಿನ್​ ಉಪಸ್ಥಿತರಿದ್ದರು. ಉಡುಪಿ ಧಮಾರ್ಧ್ಯಕ ಡಾ.ಜೆರಾಲ್ಡ್​ ಐಸಾಕ್​ ಲೋಬೊ ಸ್ವಾಗತಿಸಿ, ಮಾಧ್ಯಮ ಸಂಯೋಜಕ ಮೈಕಲ್​ ರೊಡ್ರಿಗಸ್​ ವಂದಿಸಿದರು. ಸಾರ್ವಜನಿಕ ಸಂಪರ್ಕಾಧಿಕಾರಿ ಡೆನಿಸ್​ ಡೆಸಾ ಕಾರ್ಯಕ್ರಮ ನಿರೂಪಿಸಿದರು.