ಪ್ರತಿ ಗ್ರಾಮದ ಮನೆಗಳಿಗೆ ನೀರೊದಗಿಸುವ ಉದ್ದೇಶದಿಂದ ಕೇಂದ್ರ ಸರ್ಕಾರ ಜಲ ಜೀವನ್ ಮಿಷನ್ ಯೋಜನೆ ಜಾರಿಗೊಳಿಸಿದೆ. ತಾಲೂಕು ವ್ಯಾಪ್ತಿಯಲ್ಲಿ ಮೊದಲ ಹಂತವಾಗಿ 2020-21ರ 52 ಕಾಮಗಾರಿಗಳ ಪೈಕಿ 37 ಪೂರ್ಣಗೊಂಡಿವೆ. 8 ಕಾಮಗಾರಿಗಳ ಡಿಪಿಆರ್ ಸಿದ್ಧಗೊಂಡಿದೆ. 6 ಕಾಮಗಾರಿಗಳು ಪ್ರಗತಿ ಹಂತದಲ್ಲಿದೆ. ಒಂದು ಕಡೆ ಇನ್ನೂ ಆರಂಭವಾಗಿಲ್ಲ. ಎರಡನೇ ಹಂತದ 2021-22ರ 20 ಜೆಜೆಎಂ ಕಾಮಗಾರಿಗಳಲ್ಲಿ 9 ಮುಕ್ತಾಯವಾಗಿದ್ದು, 7 ಪ್ರಗತಿಯಲ್ಲಿವೆ. ಇನ್ನುಳಿದ 4 ಕಡೆ ಕಾರ್ಯ ಪ್ರಾರಂಭವಾಗಬೇಕಿದೆ. ಜೆಜೆಎಂ ಕಾಮಗಾರಿ ಬಗ್ಗೆ ಹಲವು ಆರೋಪಗಳು ಕೇಳಿಬಂದಿವೆ. ಕೆಲಸ ಸರಿಯಾಗಿ ಮಾಡಿಲ್ಲ, ರಸ್ತೆ ಅಗೆದು ಹಾಗೆ ಬಿಟ್ಟಿದ್ದಾರೆ ಎನ್ನುವುದು ಸೇರಿ ಇತರ ವಿಷಯಗಳ ಬಗ್ಗೆ ಗ್ರಾಪಂ, ತಾಪಂ, ಆರ್ಡಬ್ಲುೃಎಸ್ ಇಲಾಖೆಗೆ ಜನರಿಂದ ಅನೇಕ ದೂರುಗಳು ಸಲ್ಲಿಕೆಯಾಗಿವೆ. ತಾಲೂಕಿನ ಸಿದ್ದಾಪುರ, ಮೈಲಾಪುರ, ನಂದಿಹಳ್ಳಿ ಹಾಗೂ ಸಿಂಗನಾಳ ಗ್ರಾಮದಲ್ಲಿ ಕಾಮಗಾರಿ ಆರಂಭವಾಗಬೇಕಿದೆ. ಮೈಲಾಪುರದಲ್ಲಿ ಡಿಪಿಆರ್ ತಪ್ಪಾಗಿರುವ ಮರು ಟೆಂಡರ್ ಮಾಡಬೇಕಿದೆ. 10 ಕಿಮೀ ಪೈಪ್ಲೈನ್ ಕಾಮಗಾರಿಯನ್ನು 5 ಕಿಮೀ ಕಾಮಗಾರಿ ಎಂದು ನಮೂದಿಸಲಾಗಿದೆ. ಒಟ್ಟು 1100 ಮನೆಗಳ ಪೈಕಿ 350 ಮನೆಗಳಿಗೆ ಸಂಪರ್ಕ ಕಲ್ಪಿಸಲಾಗಿದೆ. ಇನ್ನುಳಿದ ಮನೆಗಳಿಗೆ ಸಂಪರ್ಕ ಕಲ್ಪಿಸಲು ಗುತ್ತಿಗೆದಾರ ಹೆಚ್ಚುವರಿ ಹೊರೆಯಾಗುವ ಕಾರಣ ಕೈ ಬಿಟ್ಟಿದ್ದಾರೆ ಎನ್ನಲಾಗಿದೆ.
