ಸತೀಶ್ ರಾವ್ ಹುಟ್ಟಿದ್ದು ಉಡುಪಿಯ ಹಿರಿಯಡ್ಕದಲ್ಲಿ. ಬಡ ಕುಟುಂಬ. ಪ್ರಾಥಮಿಕ ಶಿಕ್ಷಣ ಮುಗಿದ ಬಳಿಕ ತಂದೆ ಜೊತೆಯಲ್ಲಿ ಬೆಂಗಳೂರಿನಲ್ಲಿ ಬೆಳೆದರು. ಕಷ್ಟಪಟ್ಟು ಓದುತ್ತಿದ್ದಾಗ, ಸೈಕಲ್ ಓಡಿಸುವ ಹುಚ್ಚು ಹಿಡಿಯಿತು. ಆಸಕ್ತಿಯನ್ನು ಬೆನ್ನಟ್ಟಿ, ವಿವಿಧ ಸ್ಪರ್ಧೆಗಳಲ್ಲಿ ಭಾಗವಹಿಸಿದರು. ಪದಕಗಳ ಮೇಲೆ ಪದಕಗಳು ಬಂದವು. ರಾಜ್ಯ ಚಾಂಪಿಯನ್, ರಾಷ್ಟೀಯ ಚಾಂಪಿಯನ್ ಎನಿಸಿ, 1982ರಲ್ಲಿ ಏಷ್ಯಾಡ್ಗೂ ಆಯ್ಕೆಯಾದರು. ಕಾಲು ನೋವಿನ ಕಾರಣದಿಂದ ಸ್ಪರ್ಧೆಯಿಂದ ಹಿಂದುಳಿಯಬೇಕಾಯಿತು. ಆದರೆ, ಛಲ ಬಿಡದೆ 1983ರಲ್ಲಿ ಸೈಕಲ್ನಲ್ಲಿ ವಿಶ್ವ ಪರ್ಯಟನೆ ಆರಂಭಿಸಿ, 52 ದೇಶ ದಾಟಿ ಒಂದೂವರೆ ವರ್ಷಗಳ ಬಳಿಕ 1984ರಲ್ಲಿ ಅಮೆರಿಕ ತಲುಪಿದರು. ಅಲ್ಲಿ ಜೀವನಕ್ಕಾಗಿ ಹೊಟೇಲ್ನಲ್ಲಿ ಪಾತ್ರೆ ತೊಳೆಯಲು ಸೇರಿ, ರಾತ್ರಿ ಕಲಿಕೆ ಮುಂದುವರಿಸಿದರು. ಏರೋನಾಟಿಕ್ಸ್ ಪದವಿ ಬಳಿಕ ವಿಮಾನ ಕಂಪನಿಯೊಂದರಲ್ಲಿ ಕೆಲಸ. ಅದೇ ಹೊತ್ತಿಗೆ ಹೊಳೆದದ್ದು ಸಸ್ಯಾಹಾರಿ ಹೊಟೇಲ್ ಆರಂಭಿಸುವ ಐಡಿಯಾ. ಭಾರತೀಯರ ಸ್ವಾತಿಕ ಸಸ್ಯಾಹಾರದ ಅಗತ್ಯತೆ ಕಂಡು ಆರಂಭಿಸಿದ ಉಡುಪಿ ಕಫೆಗಳು ಐದರ ಸಂಖ್ಯೆ ತಲುಪಿದವು. ಭಾರತದ ಮಾಜಿ ರಾಷ್ಟ್ರಪತಿ ಡಾ. ಅಬ್ದುಲ್ ಕಲಾಂ ಸೇರಿದಂತೆ ಗಣ್ಯರು, ಕಲಾವಿದರು, ಸಿನಿ ತಾರೆಯರು ಉಡುಪಿ ಕಫೆಯ ಊಟೋಪಾಚಾರ ಸ್ವೀಕರಿಸಿದ್ದಾರೆ.
