ಕಾರವಾರ:ವೇತನ ಪಾವತಿಗೆ ಆಗ್ರಹಿಸಿ ಜಿಲ್ಲೆಯ ಡಯಾಲಿಸಿಸ್ ಘಟಕಗಳ ಸಿಬ್ಬಂದಿ ಮತ್ತೆ ಅನಿರ್ದಿಷ್ಟಾವಧಿ ಪ್ರತಿಭಟನೆಗೆ ಮುಂದಾಗಿದ್ದು, ನ.30 ರಿಂದ ಡಯಾಲಿಸಿಸ್ ಸೇವೆಗಳಲ್ಲಿ ವ್ಯತ್ಯಯವಾಗಲಿದೆ.
ಜಿಲ್ಲೆಯ 11 ತಾಲೂಕು ಆಸ್ಪತ್ರೆಗಳ ಒಟ್ಟು 54 ಸ್ಟಾಪ್ ನರ್ಸ್, ತಂತ್ರಜ್ಞರು, ಸಹಾಯಕರು ಪ್ರತಿಭಟನೆಗೆ ಮುಂದಾಗಿದ್ದಾರೆ. ಅವರಿಗೆ ಕಳೆದ 4 ತಿಂಗಳಿಂದ ವೇತನ ಪಾವತಿಯಾಗಿಲ್ಲ. ಜಿಲ್ಲೆಯ ಸರ್ಕಾರಿ ಆಸ್ಪತ್ರೆಗಳಲ್ಲಿರುವ 28 ಯಂತ್ರಗಳಲ್ಲಿ 300 ಕ್ಕೂ ಅದಿಕ ರೋಗಿಗಳು ನಿರಂತರವಾಗಿ ಡಯಾಲಿಸಿಸ್ ಮಾಡಿಸಿಕೊಳ್ಳುತ್ತಿದ್ದು, ಅವರಿಗೆಲ್ಲ ತೊಂದರೆ ಉಂಟಾಗಲಿದೆ.
ಇದುವರೆಗೆ ಡಯಾಲಿಸಿಸ್ ಸಿಬ್ಬಂದಿಗೆ ಸಂಜೀವಿನಿ ಎಂಬ ಹೊರಗುತ್ತಿಗೆ ಕಂಪನಿಯ ಮೂಲಕ ವೇತನ ಪಾವತಿ ಮಾಡಲಾಗುತ್ತಿತ್ತು. ಕಳೆದ ತಿಂಗಳಿಂದ ಆ ಕಂಪನಿ ಬಿಟ್ಟು ನೇರವಾಗಿ ರಾಷ್ಟ್ರೀಯ ಆರೋಗ್ಯ ಅಭಿಯಾನದಡಿ ವೇತನ ಪಾವತಿ ಮಾಡುವುದಾಗಿ ಆರೋಗ್ಯ ಇಲಾಖೆ ಹೇಳಿತ್ತು. ನೌಕರರಿಗೆ ಹಿಂದಿನ ಸಂಜೀವಿನಿ ಕಂಪನಿ 2 ತಿಂಗಳ ವೇತನ ಪಾವತಿ ಮಾಡುವುದು ಬಾಕಿ ಇದೆ. ಇನ್ನು ಎನ್ಎಚ್ಎಂ ಅಡಿ ಅಕ್ಟೋಬರ್ ಹಾಗೂ ನವೆಂಬರ್ ತಿಂಗಳ ವೇತನ ಪಾವತಿ ಮಾಡುವುದು ಬಾಕಿ ಇದೆ.
