ಹೊಸೂರು: ಗಣೇಶ ಹಬ್ಬದ ವೇಳೆ ಯುವಕರ ನಡುವೆ ನಡೆದ ಜಗಳದಲ್ಲಿ ಯುವಕನೊಬ್ಬನ ಕೊಲೆಯಾಗಿದೆ. ಸರ್ಜಾಪುರ ಸಮೀಪದ ವರ್ತೂರು ಪೊಲೀಸ್ ಠಾಣಾ ವ್ಯಾಪ್ತಿಯ ಸೂಳೆಕುಂಟೆ ನಿವಾಸಿ ರೇವಂತ್ ಕುಮಾರ್ (32) ಮೃತ. ಕೊಲೆ ಆರೋಪದ ಮೇರೆಗೆ ಅದೇ ಗ್ರಾಮದ ಪುನೀತ್(27), ಪ್ರವೀಣ್ ಕುಮಾರ್(26), ನವೀನ್(24) ಮತ್ತು ಶಿವಕುಮಾರ್ (28) ಎಂಬುವವರನ್ನು ತಮಿಳುನಾಡಿನ ಬಾಗಲಕುಂಟೆ ಪೊಲೀಸರು ಬಂಧಿಸಿದ್ದಾರೆ.
ಘಟನೆ ವಿವರ: ಆನೇಕಲ್ ತಾಲೂಕು ಸರ್ಜಾಪುರ ಸಮೀಪದ ಸೂಳಕುಂಟೆಯಲ್ಲಿ ಗಣೇಶ ಚತುರ್ಥಿಯಂದು ರೇವಂತ್ ಹಾಗೂ ಪುನೀತ್ ತಂಡಗಳ ನಡುವೆ ಜಗಳವಾಗಿತ್ತು. ಇದೇ ದ್ವೇಷಕ್ಕೆ ಪುನೀತ್ ಸೇರಿ ನಾಲ್ವರು ರೇವಂತ್ ನನ್ನು ಕಾರಿನಲ್ಲಿ ಅಪಹರಿಸಿ ಕೊಲೆ ಮಾಡಿ, ನಂತರ ಹೊಸೂರು ಸಮೀಪದ ಕೋಲದಾಸಪುರ ರಸ್ತೆ ಬಳಿ ಎಸೆದಿದ್ದರು.
ಯುವಕನ ಶವ ಪತ್ತೆ ಹಿನ್ನೆಲೆಯಲ್ಲಿ ಸೆ.19ರಂದು ಪ್ರಕರಣ ದಾಖಲಿಸಿಕೊಂಡಿದ್ದ ಹೊಸೂರಿನ ಬಾಗಲೂರು ಠಾಣೆ ಪೊಲೀಸರು, ಮರಣೋತ್ತರ ಪರೀಕ್ಷೆಗಾಗಿ ಮೃತದೇಹವನ್ನು ಕೃಷ್ಣಗಿರಿ ಸರ್ಕಾರಿ ವೈದ್ಯಕೀಯ ಕಾಲೇಜಿಗೆ ರವಾನಿಸಿದ್ದರು. ಅಪರಿಚಿತ ಯುವಕ ಶವದ ಬಗ್ಗೆ ಗಡಿಪ್ರದೇಶದ ಎಲ್ಲ ಪೊಲೀಸ್
ಠಾಣೆಗಳಿಗೂ ಮಾಹಿತಿ ನೀಡಿದ್ದರು. ಇದರ ನಡುವೆ, ಯುವಕನ ಪಾಲಕರು ವರ್ತೂರು ಪೊಲೀಸ್ ಠಾಣೆಯಲ್ಲಿ ನಾಪತ್ತೆ ದೂರು ದಾಖಲಿಸಿದ್ದರು. ಪೊಲೀಸರ ಮಾಹಿತಿ ಮೇರೆಗೆ ಸ್ಥಳಕ್ಕೆ ತೆರಳಿದ ಪಾಲಕರು ಯುವಕನ ಗುರುತು ಪತ್ತೆ ಮಾಡಿದ್ದರು. ಇದರ ನಡುವೆ, ಆರೋಪಿಗಳು ಹೊಸೂರು ನ್ಯಾಯಾಲಯದ ನ್ಯಾಯಾಧೀಶರ ಮುಂದೆ ಶರಣಾಗಿದ್ದು, ಎಲ್ಲರನ್ನು ಪೊಲೀಸರು ವಶಕ್ಕೆ ಪಡೆದು ವಿಚಾರಣೆ ಮುಂದುವರಿಸಿದ್ದಾರೆ.
