ಕನಸವಾಡಿ ಮುಖ್ಯರಸ್ತೆಯಲ್ಲಿ ಕಸದ ರಾಶಿ, ಸ್ವಚ್ಛತೆ ಕಾಪಾಡಲು ಗ್ರಾಪಂ ನಿರ್ಲಕ್ಷ್ಯ

ದೊಡ್ಡಬಳ್ಳಾಪುರ ಗ್ರಾಮಾಂತರ: ಮಧುರೆ ಹೋಬಳಿಯ ಕನಸವಾಡಿಯ ಮುಖ್ಯರಸ್ತೆ ಬದಿಯಲ್ಲಿ ಸಂಗ್ರಹವಾದ ಕಸದ ರಾಶಿಯಿಂದ ವಾಹನ ಸವಾರರು ಮೂಗುಮುಚ್ಚಿ ಓಡಾಡುವಂತಾಗಿದೆ.

ಐತಿಹಾಸಿಕ ಶನಿಮಹಾತ್ಮದೇವಾಲಯ ಸಮೀಪದಲ್ಲಿ ಕಸದ ರಾಶಿ ತುಂಬಿದ್ದು, ಭಕ್ತರಿಗೆ ಕಸಿವಿಸಿ ಉಂಟುಮಾಡಿದೆ. ಗ್ರಾಮ ಸಮೀಪದ ಮಾರಸಂದ್ರ ರಸ್ತೆಯ ಮೋರಿ ತುಂಬಾ ರಾಶಿ ರಾಶಿ ಕಸ ಸಂಗ್ರಹವಾಗಿದೆ. ಸುತ್ತ ಮುತ್ತಲಿನ ಅಂಗಡಿಗಳ ತ್ಯಾಜ್ಯ, ನೀರಿನ ಬಾಟಲಿ, ಪ್ಲಾಸ್ಟಿಕ್ ಮೋರಿ ತುಂಬಿವೆ. ಕಸ ನಿರ್ವಹಣೆ ಮಾಡಬೇಕಾದ ಗ್ರಾಪಂ ಅಧಿಕಾರಿಗಳು, ಸದಸ್ಯರು ಕಂಡೂ ಕಾಣದಂತೆ ಮೌನವಾಗಿದ್ದಾರೆ.

ಗೊಬ್ಬರ ಕಂಪನಿಯಿಂದ ಪರಿಸರ ಹಾಳು: ಕನಸವಾಡಿ ಸಮೀಪದಲ್ಲಿ ಅನೇಕ ವರ್ಷಗಳಿಂದ ಗೊಬ್ಬರ ತಯಾರಿಕೆ ಕಂಪನಿ ಕಾರ್ಯನಿರ್ವಹಿಸುತ್ತಿದ್ದು, ನೂರಾರು ಲಾರಿಗಳು ರಸ್ತೆಯಲ್ಲಿ ಸಂಚಾರ ಮಾಡುತ್ತಿರುವ ಕಾರಣ ರಸ್ತೆ ಸಂಪೂರ್ಣ ಹಾಳಾಗಿದೆ. ವಾಹನ ಸಂಚರಿಸುವಾಗ ಧೂಳು ತುಂಬಿ ಜನರು ಓಡಾಡಲು ಕಷ್ಟಪಡುವಂತಾಗಿದೆ. ಈ ಬಗ್ಗೆ ಯಾರೂ ಚಕಾರವೆೆತ್ತದಿರುವುದು ಆಶ್ಚರ್ಯವಾಗಿದೆ.