ಸಿದ್ದಾಪುರ: ತಾಲೂಕಿನ 473 ಕೃಷಿಕರಿಗೆ ಒಟ್ಟು 12.78 ಲಕ್ಷ ರೂ. ಹವಾಮಾನ ಆಧಾರಿತ ಬೆಳೆ ವಿಮೆ ಪರಿಹಾರವನ್ನು ಶೇ.8 ರ ಬಡ್ಡಿ ಸೇರಿಸಿ ಪಾವತಿಸಬೇಕು ಹಾಗೂ ಪ್ರತಿ ರೈತರಿಗೆ ತಲಾ 2 ಸಾವಿರ ರೂ.ನಂತೆ ಒಟ್ಟು 9.46 ಲಕ್ಷ ರೂ. ಹೆಚ್ಚುವರಿ ಪರಿಹಾರ ನೀಡಬೇಕು ಎಂದು ಧಾರವಾಡ ಜಿಲ್ಲಾ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗ ತೀರ್ಪು ನೀಡಿದೆ.
2017-18 ನೇ ಸಾಲಿನಲ್ಲಿ ತಾಲೂಕಿನ ಕಂಚಿಕೈ, ಹೆಗ್ಗರಣಿ ಸೇವಾ ಸಹಕಾರಿ ಸಂಘ ಹಾಗೂ ಶಿರಸಿಯ ಟಿಆರ್ಸಿಯಿಂದ ಬೆಳೆಸಾಲ ಪಡೆದ ನಿಲ್ಕುಂದ ಹಾಗೂ ತಂಡಾಗುಂಡಿ ಭಾಗದ ರೈತರು ಹವಾಮಾನ ಆಧಾರಿತ ಬೆಳೆ ವಿಮೆ ಕಂತು ಪಾವತಿಸಿದ್ದು, ಪರಿಹಾರ ಪಡೆಯಲು ಅರ್ಹರಿದ್ದರೂ ವಿಮಾ ಕಂಪನಿ ಅದನ್ನು ಪಾವತಿಸಿರಲಿಲ್ಲ. ಅದನ್ನು ಪ್ರಶ್ನಿಸಿ ಸಹಕಾರ ಸಂಘಗಳ ಮೂಲಕವೇ ರೈತರು 2020 ರಲ್ಲಿ ಕಾರವಾರ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗದ ಮೆಟ್ಟಿಲೇರಿದ್ದರು. ಆದರೆ, ವ್ಯಾಜ್ಯವನ್ನು ಧಾರವಾಡ ಆಯೋಗಕ್ಕೆ ವರ್ಗಾಯಿಸಲಾಗಿತ್ತು.
ನಿರಂತರ 6 ವರ್ಷಗಳ ಹೋರಾಟದ ಬಳಿಕ ಕೃಷಿಕರಿಗೆ ಟರ್ಮ್ ಶೀಟ್ನ ಮಾನದಂಡದ ಪ್ರಕಾರ ಪ್ರತಿ ಗುಂಟೆಗೆ 68.50 ರೂ. ಪರಿಹಾರ ನೀಡಬೇಕು. ಅಲ್ಲದೇ ವ್ಯಾಜ್ಯದ ಖರ್ಚಾಗಿ 30 ಸಾವಿರ ರೂ.ಗಳನ್ನು 45 ದಿನಗಳಲ್ಲಿ ಪಾವತಿಸಬೇಕು ಎಂದು ಆಯೋಗದ ಅಧ್ಯಕ್ಷ ಈಶಪ್ಪ ಕೆ.ಭೂತೆ, ಸದಸ್ಯರಾದ ವಿಶಾಲಾಕ್ಷಿ ಎ. ಬೋಳಶೆಟ್ಟಿ ಮತ್ತು ಪಿ.ಸಿ ಹಿರೇಮಠ ಆದೇಶಿಸಿದ್ದಾರೆ.
