ಅರಣ್ಯ ಸೇವೆ ಪರೀಕ್ಷೆ; 90ನೇ ರ‌್ಯಾಂಕ್ ಪಡೆದ ನಿಶಾ

ಕೂಡ್ಲಿಗಿ: ಯುಪಿಎಸ್‌ಸಿ ನಡೆಸಿದ ಭಾರತೀಯ ಅರಣ್ಯ ಸೇವೆ ಪರೀಕ್ಷೆಯಲ್ಲಿ ಪಟ್ಟಣದ ಎಸ್.ಎನ್.ನಿಶಾ 90ನೇ ರ‌್ಯಾಂಕ್ ಪಡೆದು ಸಾಧನೆ ಮಾಡಿದ್ದಾರೆ. ರಾಜ್ಯದಿಂದ 11 ಜನ ಐಎಫ್‌ಎಸ್‌ಗೆ ಆಯ್ಕೆಯಾಗಿದ್ದು, ಇದರಲ್ಲಿ ಇವರೂ ಒಬ್ಬರು.

ಪಿಯುವರೆಗೂ ಪಟ್ಟಣದಲ್ಲಿ ಅಭ್ಯಾಸ ಮಾಡಿರುವ ನಿಶಾ ಅವರು ಎಂಬಿಬಿಎಸ್ ಕನಸು ಹೊಂದಿದ್ದರು. ನಿರೀಕ್ಷಿತ ಅಂಕ ಸಾಧ್ಯವಾಗದ ಕಾರಣ ಒಲ್ಲದ ಮನಸ್ಸಿನಿಂದ ಬಿಎಸ್ಸಿ ಫಾರೆಸ್ಟರಿ ಆಯ್ಕೆ ಮಾಡಿ, ಕೊಡಗು ಜಿಲ್ಲೆ ಪೊನ್ನಂಪೇಟೆಯಲ್ಲಿ ಅಭ್ಯಾಸ ಶುರುಮಾಡಿದರು. ಏನಾದರೂ ಸಾಧಿಸಬೇಕೆಂಬ ಸದಾ ತುಡಿತ ಹೊಂದಿದ್ದ ನಿಶಾಗೆ ಬಿಎಸ್ಸಿಯಲ್ಲೇ ಐಎಫ್‌ಎಸ್ ಮಾಡಬಹುದು ಎಂಬುದನ್ನು ಉಪನ್ಯಾಸಕರು ತಿಳಿಸಿದ್ದರು.

ಅಲ್ಲಿಂದ ಸಾಮಾನ್ಯ ಜ್ಞಾನದತ್ತ ಹೆಚ್ಚಿನ ಅಭ್ಯಾಸ ಮಾಡಿ, ಬಿಎಸ್ಸಿ ಕೊನೇ ವರ್ಷದಲ್ಲಿ ಯುಪಿಎಸ್‌ಸಿಗೆ ತಯಾರಿ ನಡೆಸಿದರು. ನಂತರ ಎರಡು ಕಡೆ ಕೋಚಿಂಗ್ ಪಡೆದರು. ಮೊದಲ ಪ್ರಯತ್ನದಲ್ಲಿ ಅಷ್ಟಾಗಿ ತಯಾರಿ ಇರಲಿಲ್ಲ. ಎರಡನೇ ಪ್ರಯತ್ನದಲ್ಲಿ ಜಿಕೆ-ಸಿಸ್ಯಾಟ್ ಪರೀಕ್ಷೆಗಳಲ್ಲಿ ಹಿನ್ನಡೆಯಾಗಿದೆ. ಛಲ ಬಿಡದೆ ಮೂರನೇ ಪ್ರಯತ್ನ ನಡೆಸಿದಾಗ ಸಂದರ್ಶನದವರೆಗಷ್ಟೇ ಹೋಗಲು ಸಾಧ್ಯವಾಗಿದೆ. ಮನೆಯವರ ನಿರಂತರ ಪ್ರೋತ್ಸಾಹ ಹಾಗೂ ಅಚಲ ಗುರಿಯೊಂದಿಗೆ ನಾಲ್ಕನೇ ಬಾರಿ ಕಠಿಣಾಭ್ಯಾಸ ಮಾಡಿದ ಪರಿಣಾಮ ಈ ಯಶಸ್ಸು ಮುಡಿಗೇರಿದೆ.