ಮೊದಲ ಬಾರಿಗೆ ಬೆಂ.ನಗರ ವಿವಿ ಪಿಎಚ್.ಡಿ. ಪ್ರವೇಶಾತಿಗೆ ಒಪ್ಪಿಗೆ: ಎಷ್ಟು ಅಭ್ಯರ್ಥಿಗಳಿಗೆ ಅವಕಾಶ? ಇಲ್ಲಿದೆ ಮಾಹಿತಿ...

ಬೆಂಗಳೂರು ಬೆಂಗಳೂರು ನಗರ ವಿಶ್ವವಿದ್ಯಾಲಯವು ಇದೇ ಮೊದಲ ಬಾರಿಗೆ ಪಿಎಚ್.ಡಿ. ಪ್ರವೇಶಾತಿಯನ್ನು ಆರಂಭಿಸುತ್ತಿದೆ.

ಸೆ.27ರಂದು ನಡೆದ ವಿವಿ ಸಿಂಡಿಕೇಟ್ ಸಭೆಯಲ್ಲಿ ಒಪ್ಪಿಗೆ ನೀಡಲಾಗಿದ್ದು, ಸದ್ಯದಲ್ಲಿಯೇ ಆಕಾಂಕ್ಷಿಗಳಿಂದ ಅರ್ಜಿ ಅಹ್ವಾನಿಸಲಿದೆ.

ಬೆಂಗಳೂರು ವಿಶ್ವವಿದ್ಯಾಲಯವನ್ನು 2017-18ರಲ್ಲಿ ಮೂರು ಭಾಗವಾಗಿ ವಿಂಗಡಣೆ ಮಾಡಲಾಯಿತು. ಬಳಿಕ ಬೆಂ.ನಗರ ವಿವಿಯು ಅಧಿಕೃತವಾಗಿ 2018-19ರಿಂದ ಕಾರ್ಯಾರಂಭ ಮಾಡಿದೆ. ವಿವಿ ಆರಂಭವಾಗಿ 5 ವರ್ಷ ಕಳೆದ ಬಳಿಕ ಇದೇ ಮೊದಲ ಬಾರಿಗೆ ಪಿಎಚ್.ಡಿ. ಪ್ರವೇಶಾತಿ ಆರಂಭಿಸುತ್ತಿದೆ. ಕಳೆದ ವರ್ಷ ಕೂಡ ಅರ್ಜಿ ಕರೆದು ಕೊನೇಸಮಯದಲ್ಲಿ ರದ್ದುಗೊಳಿಸಲಾಗಿತ್ತು.

33 ವಿಭಾಗ, 300 ಅಭ್ಯರ್ಥಿಗಳಿಗೆ ಸೀಟು:

ವಿಶ್ವವಿದ್ಯಾಲಯದಲ್ಲಿ ಕಲಾ, ವಿಜ್ಞಾನ ಮತ್ತು ವಾಣಿಜ್ಯ ವಿಭಾಗಗಳು ಸೇರಿ ವಿವಿಧ 33 ವಿಭಾಗಗಳಿವೆ. ಈ ವಿಭಾಗಗಳಲ್ಲಿ ಸಂಶೋಧನಾ ಅಭ್ಯರ್ಥಿಗಳಿಗೆ ಅವಕಾಶ ಮಾಡಿಕೊಡಲಾಗುತ್ತದೆ. ಅಂದಾಜು 120ಕ್ಕೂ ಹೆಚ್ಚಿನ ಮಾರ್ಗದರ್ಶಕರಿದ್ದು, 300ಕ್ಕೂ ಹೆಚ್ಚಿನ ಸಂಶೋಧನಾ ಅಭ್ಯರ್ಥಿಗಳಾಗಿ ಅವಕಾಶ ಪಡೆಯುವ ಸಾಧ್ಯತೆಗಳಿವೆ. ಅಂತಿಮವಾಗಿ ಪ್ರಕಟಣೆ ಹೊರಡಿಸಿದ ಬಳಿಕ ನಿಖರವಾಗಿ ಎಷ್ಟು ಸೀಟುಗಳು ದೊರೆಯಲಿವೆ ಎಂಬ ಮಾಹಿತಿ ಲಭ್ಯವಾಗಲಿದೆ.