ಸ್ಪರ್ಧಾತ್ಮಕ ಪರೀಕ್ಷೆಗೆ ಪುಸ್ತಕ ತರಿಸಿಕೊಡಿ

ಕೌಜಲಗಿ: ಸ್ಥಳಿಯ ಗ್ರಂಥಾಲಯ ಶತಮಾನ ಕಂಡರೂ ಸ್ಪರ್ಧಾತ್ಮಕ ಪರೀಕ್ಷೆಗೆ ಬೇಕಾದ ಪುಸ್ತಕಗಳೇ ಇಲ್ಲಿಲ್ಲ ಎಂದು ವಿದ್ಯಾರ್ಥಿಗಳು ಗ್ರಾಪಂ ಅಭಿವೃದ್ಧಿ ಅಧಿಕಾರಿ ಪರಶುರಾಮ ಇಟ್ಟಗೌಡರ, ಅಧ್ಯಕ್ಷ ರಾಮಣ್ಣ ಈಟಿಗೆ ಸೋಮವಾರ ಮನವಿ ಸಲ್ಲಿಸಿದರು.

ಗ್ರಂಥಾಲಯ ನವೀಕರಣಗೊಂಡು ಡಿಜಿಟಲ್​ ಸ್ಪರ್ಶ ಪಡೆದಿದೆ. ನಿತ್ಯ ಬಹಳಷ್ಟು ಓದುಗರು ಬರುತ್ತಾರೆ. ಅವರಿಗೆ ಇಲ್ಲಿ ದಿನಪತ್ರಿಕೆಗಳು ಬಿಟ್ಟರೆ ಮತ್ತೇನೂ ಸಿಗುವುದಿಲ್ಲ. ಗ್ರಾಮದಲ್ಲಿ ಆರು ಪ್ರೌಢಶಾಲೆ, 5 ಪ್ರಾಥಮಿಕ ಹಾಗೂ ಒಂದು ವಸತಿ ಶಾಲೆ ಹಾಗೂ ಪಿಯು ಕಾಲೇಜಿನಲ್ಲಿ ಇದ್ದರೂ ಸಾವಿರಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಓದುತ್ತಿದ್ದಾರೆ. ಗ್ರಾಮ ಪಂಚಾಯಿತಿ ಅಧಿಕಾರಿಗಳು ಸರಿಯಾಗಿ ಸ್ಪಂದಿಸುತ್ತಿಲ್ಲ. ನೇಮಕ ಮಾಡಲಾಗಿರುವ ತಾತ್ಕಾಲಿಕ ಸಿಬ್ಬಂದಿ ಸಂಜೆ 4ರಿಂದ 7 ಗಂಟೆ ವರೆಗೆ ಮಾತ್ರ ಗ್ರಂಥಾಲಯ ತೆಗೆಯುತ್ತಾರೆ ಎಂದು ಆರೋಪಿಸಿದರು. ವೆಂಕಟೇಶ ದಳವಾಯಿ, ಹೊಳೆಪ್ಪ ಲೋಕಣ್ಣವರ, ಶಂಕರ ಜ್ಯೋತೆನ್ನವರ, ಅಶೋಕ ಯಲಿಗಾರ, ರಮೇಶ ಮುನ್ಯಾಳ ಇತರರಿದ್ದರು.