ಉಡುಪಿ: ದೇಶದಾದ್ಯಂತ ಹಳೆಯ ಪಾದರಕ್ಷೆಗಳನ್ನು ಪಡೆದು, ಅದನ್ನು ಮರುಬಳಕೆ ಮಾಡಿ, ಹೊಸ ಪಾದರಕ್ಷೆಯನ್ನು ತಯಾರಿಸಿ ಬಡ ಜನರಿಗೆ ಹಾಗೂ ಶಾಲಾ ಮಕ್ಕಳಿಗೆ ವಿತರಿಸುತ್ತಿದ್ದು, ಈಗಾಗಲೇ ಭಾರತದಾದ್ಯಂತ ೬.೭ ಲಕ್ಷ ಚಪ್ಪಲಿ ನೀಡಲಾಗಿದೆ. ಈ ವರ್ಷ ಸಾವಿರಾರು ಮಂದಿಗೆ ಚಪ್ಪಲಿ ಕೊಡಲಾಗಿದ್ದು, ಒಟ್ಟು ೮ ಲಕ್ಷಕ್ಕೆ ಏರಿಕೆಯಾಗಲಿದೆ ಎಂದು ಮುಂಬಯಿಯ ಗ್ರೀನ್ ಸೋಲ್ ಸಂಸ್ಥೆಯ ಸಹಸಂಸ್ಥಾಪಕ ರಮೇಶ್ ಧಾಮಿ ಹೇಳಿದರು.
ಸೋಮವಾರ ಬಡಗಬೆಟ್ಟು ಸೊಸೈಟಿ ಸಭಾಂಗಣದಲ್ಲಿ ಡಾ.ಎ.ವಿ.ಬಾಳಿಗಾ ಸ್ಮಾರಕ ಆಸ್ಮತ್ರೆ, ಸಂಸ್ಕೃತಿ ವಿಶ್ವ ಪ್ರತಿಷ್ಠಾನ ಆಶ್ರಯದಲ್ಲಿ ನಡೆದ ಸಂವಾದ ಕಾರ್ಯಕ್ರಮದಲ್ಲಿ ಮಾತನಾಡಿದರು.
ಪ್ರಪಂಚದಲ್ಲಿ ಪ್ರತೀ ವರ್ಷ ೩೫ ಕೋಟಿ ಪಾದರಕ್ಷೆಗಳನ್ನು ಎಲ್ಲೆಂದರಲ್ಲಿ ಎಸೆಯಲಾಗುತ್ತದೆ. ೧ ಕೆಜಿ ಹಳೆಯ ಚಪ್ಪಲಿಗಳಿಂದ ೨.೫ ಗ್ರಾಂನಷ್ಟು ಕಾರ್ಬನ್ ಉತ್ಪನ್ನವಾಗುತ್ತದೆ. ೧.೮ ಬಿಲಿಯನ್ ಜನರಿಗೆ ಚಪ್ಪಲಿಗಳೇ ಇರುವುದಿಲ್ಲ. ಈ ಸಮಸ್ಯೆ ಬಗೆಹರಿಸುವ ನಿಟ್ಟಿನಲ್ಲಿ ಕೆಲಸ ಮಾಡುತ್ತಿರುವ ಜಗತ್ತಿನ ಏಕೈಕ ಸಂಸ್ಥೆ ನಮ್ಮದಾಗಿದೆ ಎಂದು ತಿಳಿಸಿದರು.
