ಘಾಟಿ ಪ್ರದೇಶದಲ್ಲಿ ಮಂಜಿನ ವಾತಾವರಣ: ಚಾರ್ಮಾಡಿಯಲ್ಲಿ ಪ್ರಕೃತಿ ಸೌಂದರ್ಯ ವೀಕ್ಷಿಸಿದ ಪ್ರಯಾಣಿಕರು

ಬೆಳ್ತಂಗಡಿ: ಚಾರ್ಮಾಡಿ ಘಾಟಿಯಲ್ಲಿ ಶುಕ್ರವಾರ ಇಡೀ ದಿನ ಮಂಜಿನ ವಾತಾವರಣ ಕಂಡುಬಂದಿದ್ದು, ಇದು ಇಲ್ಲಿಂದ ಸಾಗುವ ಪ್ರಯಾಣಿಕರಿಗೆ ಹೆಚ್ಚಿನ ಮುದ ನೀಡಿತು.

ಘಾಟಿ ಪರಿಸರದ 25 ಕಿ.ಮೀ. ವ್ಯಾಪ್ತಿಯಲ್ಲಿ ಮಂಜು ಮುಸುಕಿದ ವಾತಾವರಣವಿದ್ದ ಕಾರಣ ವಾಹನಗಳು ಹೆಡ್‌ಲೈಟ್ ಬೆಳಗಿಸಿ ಚಲಾಯಿಸುವುದು ಅನಿವಾರ್ಯವಾಯಿತು. ಬೆಳಗ್ಗೆಯಿಂದಲೇ ಭಾರಿ ಮಂಜು ಕವಿದ ವಾತಾವರಣವಿದ್ದು ಸಮಯ ಕಳೆಯುತ್ತಿದ್ದಂತೆ ಇದು ಹೆಚ್ಚುತ್ತ ಹೋಗಿ ಸಂಜೆ ವೇಳೆ ರಸ್ತೆ ಕಾಣಿಸದಷ್ಟು ದಟ್ಟವಾಗಿ ಮುಸುಕಿತ್ತು. ಒಂದು ವಾರದಿಂದ ಘಾಟಿ ಪರಿಸರದಲ್ಲಿ ಭಾರಿ ಮಳೆ ಸುರಿಯುತ್ತಿದ್ದು ಶುಕ್ರವಾರ ಕೂಡ ಆಗಾಗ ತುಂತುರು ಮಳೆಯಾಗಿದೆ. ಸೆಕೆಯ ವಾತಾವರಣವಿದ್ದ ಘಾಟಿ ಪ್ರದೇಶದಲ್ಲಿ ಈಗ ತಂಪಿನ ವಾತಾವರಣ ನಿರ್ಮಾಣವಾಗಿದೆ.

ಮಂಜು ಮುಸುಕಿದ ವಾತಾವರಣ, ತುಂತುರು ಮಳೆಯಲ್ಲಿ ಪ್ರಯಾಣಿಕರು ಪ್ರಯಾಣದ ಸಂತಸ ಅನುಭವಿಸಿದರು. ಘಾಟಿಯಲ್ಲಿ ಮಂಜು ಮುಸುಕಿದ್ದರಿಂದ ಇಲ್ಲಿನ ಕಲ್ಲು, ಬಂಡೆ, ಕಣಿವೆ ಪ್ರದೇಶಗಳು ಕೂಡ ಮಂಜಿನಿಂದ ಆವೃತವಾಗಿದ್ದವು. ಇಲ್ಲಿನ ಕೆಲವು ತೊರೆಗಳಲ್ಲೂ ನೀರ ಹರಿವು ಕೂಡ ಆರಂಭವಾಗಿದೆ. ಮಳೆಗಾಲ ಸಂದರ್ಭ ಘಾಟಿಯಲ್ಲಿ ಮಂಜಿನ ವಾತಾವರಣ ಸಾಮಾನ್ಯ. ಆದರೆ ದಿನವಿಡೀ ಈ ವಾತಾವರಣ ಮುಂದುವರಿಯುವುದು ತೀರ ಕಡಿಮೆ. ಮಂಜು ಮುಸುಕಿದ ವಾತಾವರಣದಿಂದ ಕೆಲವು ವಾಹನ ಸವಾರರು ಪರದಾಟ ನಡೆಸಿದರು. ರಸ್ತೆಯ ಎರಡೂ ಬದಿ ಕಾಣದಷ್ಟು ಮಂಜು ದಟ್ಟವಾಗಿ ಹಬ್ಬಿತ್ತು.

https://www.vijayavani.net/puttila-trust-sevashraya

https://www.vijayavani.net/bhajan-mangalothsav-religious-meeting