ಮಳೆಗಾಲದ ಸಂದರ್ಭದಲ್ಲಿ ಪ್ರತಿ ವರ್ಷವೂ ವಾರಗಳ ಕಾಲ ದ್ವೀಪವಾಗಿ ಪರಿವರ್ತನೆ ಆಗುವ ಭಾಗಮಂಡಲ ನಿವಾಸಿಗಳ ಸಂಕಷ್ಟ ತಪ್ಪಿಸಲು ಶಾಶ್ವತ ಪರಿಹಾರಕ್ಕಾಗಿ ಸ್ಥಳೀಯರು ಸರ್ಕಾರದ ಮುಂದೆ ಬೇಡಿಕೆ ಇಡುತ್ತಲೇ ಬಂದಿದ್ದರು. ಇದರ ಫಲವಾಗಿ ೨೦೧೮ರಲ್ಲಿ ಅಂದಿನ ಮುಖ್ಯಮಂತ್ರಿ ಸಿದ್ದರಾಮಯ್ಯ ನೇತೃತ್ವದ ಸರ್ಕಾರ ಈ ಮೇಲ್ಸೇತುವೆ ಯೋಜನೆ ಕಾಮಗಾರಿಗೆ ಮಂಜೂರಾತಿ ಕೊಟ್ಟಿದಲ್ಲದೆ ಅದೇ ವರ್ಷಾಂತ್ಯಕ್ಕೆ ಕಾಮಗಾರಿಗೆ ಚಾಲನೆ ನೀಡಲಾಗಿತ್ತು.
ಕೆಲಸ ಶುರುವಾದ ಒಂದು ವರ್ಷದಲ್ಲಿ ಮೇಲ್ಸೇತುವೆ ಸಂಚಾರಕ್ಕೆ ಲಭ್ಯವಾಗಬೇಕಿತ್ತು. ಆದರೆ ಗಜಗರ್ಭದಂತಾದ ಕಾಮಗಾರಿಯಿಂದಾಗಿ ೨೦೨೩ರಲ್ಲೂ ಈ ಫ್ಲೈಓವರ್ ಪೂರ್ಣ ಪ್ರಮಾಣದಲ್ಲಿ ಸಾರ್ವಜನಿಕ ಬಳಕೆಗೆ ಸಿಗುವ ಸಾಧ್ಯತೆ ಕಡಿಮೆ ಇದೆ. ಪ್ರತಿ ವರ್ಷವೂ ಕಾಡುತ್ತಿದ್ದ ಪ್ರಾಕೃತಿಕ ವಿಕೋಪ, ಕೊರೊನಾ, ನಿಧಾನಗತಿಯ ಭೂಸ್ವಾದೀನ ಪ್ರಕ್ರಿಯೆ, ವಿದ್ಯುತ್ ಕಂಬಗಳ ವಿಳಂಬ ಹೀಗೆ ಹಲವು ಕಾರಣಗಳಿಂದ ಮೇಲ್ಸೇತುವೆ ಕಾಮಗಾರಿ ಕುಂಟುತ್ತಾ ನಡೆದಿತ್ತು.
