ರಾಸುಗಳಿಗೆ ನೊಣಗಳ ಕಾಟ

ಹಗಲು - ರಾತ್ರಿ ದನಗಳ ಮೈ ಗಾಯಗೊಳಿಸುತ್ತಿರುವ ಕೀಟಗಳು

ಕೋಲಾರ: ಜಿಲ್ಲೆಯಲ್ಲಿ ಇತ್ತೀಚೆಗೆ ಸೊಳ್ಳೆಗಳ ಜತೆಗೆ ನೊಣಗಳ ಹಾವಳಿ ಹೆಚ್ಚಾಗಿದ್ದು, ಜಾನುವಾರುಗಳ ಮೇಲೆ ಅಡ್ಡಪರಿಣಾಮ ಉಂಟಾಗಿ, ಪಶುಪಾಲಕರು ಆತಂಕ ಪಡುವಂತಾಗಿದೆ.

ಪ್ರತಿವರ್ಷ ನವೆಂಬರ್​-&ಡಿಸೆಂಬರ್​ ಮತ್ತು ಜನವರಿಯಲ್ಲಿ ಹಸಿರು ಹೆಚ್ಚಾಗುವ ಕಾರಣ ಸೊಳ್ಳೆ ಮತ್ತು ನೊಣಗಳ ಸಂತಾನೋತ್ಪತ್ತಿ ಹೆಚ್ಚಾಗುತ್ತದೆ. ಜನರು ನೊಣ ಮತ್ತು ಸೊಳ್ಳೆಗಳ ನಿಯಂತ್ರಣಕ್ಕೆ ಹಲವು ಕ್ರಮಗಳನ್ನು ಕೈಗೊಳ್ಳುತ್ತಾರೆ. ಜಾನುವಾರುಗಳಿಗೆ ಯಾವುದೇ ಭದ್ರತೆ ಮಾಡದಿದ್ದರೆ ರಾಸುಗಳ ಮೈ ಮೇಲೆ ಗಾಯಗಳಾಗುವಷ್ಟರ ಮಟ್ಟಿಗೆ ಕಚ್ಚಿ ಹಿಂಸಿಸುತ್ತಿವೆ. ರಾತ್ರಿ ಸೊಳ್ಳೆಗಳ ಕಾಟವಾಗದರೆ ಹಗಲಿನ ವೇಳೆ ನೊಣಗಳ ಕಾಟದಿಂದ ಜಾನುವಾರುಗಳಿಗೆ ಗಾಯಗಳಾಗಿ ಆರೋಗ್ಯ ಹದಗೆಡುತ್ತಿದೆ. ಇದರಿಂದ ಜಾನುವಾರುಗಳ ದೇಹಕ್ಕೆ ವೈರಾಣುಗಳು ಸೇರಿ ರೋಗ ರುಜಿನಗಳಿಗೆ ತುತ್ತಾಗುತ್ತಿವೆ ಎಂದು ಪಶುಪಾಲಕರು ಅಳಲು ತೋಡಿಕೊಂಡಿದ್ದಾರೆ.

ವಿಶೇಷವಾಗಿ ಸೀಮೆ ಹಸುಗಳ ಚರ್ಮ ತೆಳುವಾಗಿರುವ ಕಾರಣ ಬಹುಬೇಗ ಸೇಮೆ ಹಸುಗಳಿಗೆ ರೋಗಗಳು ಸೊಳ್ಳೆ ಮತ್ತು ನೊಣಗಳಿಂದ ಬರುವ ಸಾಧ್ಯತೆ ಹೆಚ್ಚಾಗಿವೆ. ಮೂರು ತಿಂಗಳ ಕಾಲ ಸೊಳ್ಳೆ ಮತ್ತು ನೊಣಗಳಿಂದ ಜಾನುವಾರುಗಳನ್ನು ರಕ್ಷಣೆ ಮಾಡಿಕೊಳ್ಳುವ ಜವಾಬ್ದಾರಿ ಪಶುಪಾಲಕರ ಮೇಲಿದೆ. ಜಾನುವಾರುಗಳಿಗೆ ದನದ ಶೆಡ್ಡುಗಳನ್ನು ನಿಮಾರ್ಣ ಮಾಡಿಕೊಳ್ಳದೆ ಮನೆಗಳ ಮುಂಭಾಗವೇ ಬೀದಿಯಲ್ಲಿ ಕಟ್ಟಿಹಾಕುವವರಿಗೆ ಜಾನುವಾರು ರಕ್ಷಿಸಿಕೊಳ್ಳಲು ಸಾಧ್ಯವಾಗದ ಪರಿಸ್ಥಿತಿ ಉಂಟಾಗಿದೆ.

ಜಿಲ್ಲೆಯಲ್ಲಿ ಕೋಳಿ ಫಾರಂಗಳು ಹೆಚ್ಚಾಗಿರುವ ಕಾರಣ ಕೋಳಿಗಳು ಫಾರಂನಲ್ಲಿ ಖಾಲಿಯಾದಾಗ ಅಲ್ಲಿನ ನೊಣಗಳು ಗ್ರಾಮಗಳೊಳಗೆ ಪ್ರವೇಶ ಮಾಡುತ್ತವೆ. ಮನೆಗಳ ಮುಂಭಾಗ ಕಟ್ಟಿಹಾಕಿರುವ ಜಾನುವಾರುಗಳ ಮೇಲೆ ಕುಳಿತು ಗಾಯಗೊಳಿಸುವಂತಹ ಕೆಲಸ ಮಾಡುತ್ತಿರುವುದರಿಂದ ರೈತರು ಆತಂಕಕ್ಕೆ ಒಳಗಾಗಿದ್ದಾರೆ.

ರೋಗ ಲಕ್ಷಣಗಳು ಸೊಳ್ಳೆ ಮತ್ತು ನೊಣದ ಕಾಟಕ್ಕೆ ಬಲಿಯಾಗುವ ಜಾನುವಾರುಗಳ ಬೆಳವಣಿಗೆ ಕ್ಷೀಣಿಸುತ್ತದೆ. ಸೊಳ್ಳೆ ಕಚ್ಚಿದ ಗಾಯದ ಮೇಲೆ ನೊಣವೂ ಕುಳಿತು ಗಾಯಗೊಳಿಸುವುದರಿಂದ ಆ ಜಾನುವಾರಿಗೆ ಜ್ವರ ಕಾಣಿಸಿಕೊಳ್ಳುತ್ತದೆ. ಹಾಲು ಕರೆಯುವ ಹಸುವಿನಲ್ಲಿ ಕಾಣಿಸಿಕೊಂಡರೆ ಹಾಲು ಕಡಿಮೆಯಾಗುತ್ತದೆ. ವಿಶೇಷವಾಗಿ ಸೀಮೆ ಹಸುಗಳಿಗೆ ಬೂಸ, ಇಂಡಿ ಇಂತಹ ಪದಾರ್ಥಗಳಲ್ಲಿ ಸಿಹಿ ಮಿಶ್ರಣವಾಗುವುದರಿಂದ ನೊಣಗಳು ಜಾನುವಾರುಗಳ ಮೇಲೆ ಹೆಚ್ಚಾಗಿ ಕುಳಿತುಕೊಳ್ಳುತ್ತವೆ.