ಗಾಂಜಾ ಟೆರೇಸ್ ಗಾರ್ಡನಿಂಗ್ - ಹೈಟೆಕ್ ಗಾಂಜಾ ದಂಧೆಗಿಳಿದ ಐವರು ಪದವೀಧರ ವಿದ್ಯಾರ್ಥಿಗಳು ಅರೆಸ್ಟ್

ಬೆಂಗಳೂರು: ಪದವಿ ವ್ಯಾಸಂಗ ಮುಗಿಸಿದ ಮಕ್ಕಳು ಕೆಲಸಕ್ಕೆ ಸೇರಿ ಸಂಪಾದನೆಗೆ ತೊಡಗಿ ಮನೆಯ ಜವಾಬ್ದಾರಿ ಹೊರುತ್ತಾರೆಂಬ ಪಾಲಕರ ಕನಸಿಗೆ ಕೊಳ್ಳಿ ಇಟ್ಟು ಹೈಟೆಕ್ ಡ್ರಗ್ಸ್ ಪೆಡ್ಲರ್‌ಗಳಾಗಿದ್ದ ಐವರು ಪದವೀಧರ ವಿದ್ಯಾರ್ಥಿಗಳೀಗ ಪೊಲೀಸರ ಅತಿಥಿಗಳಾಗಿ ಕಂಬಿ ಎಣಿಸುತ್ತಿದ್ದಾರೆ! ವಿದೇಶದಿಂದ ಹೈಡ್ರೋ ಗಾಂಜಾ ಬೀಜ ತರಿಸಿಕೊಂಡು ಮನೆಯ ಟೆರೆಸ್ ಮೇಲಿನ ಹೂಕುಂಡದಲ್ಲಿ ಬೆಳೆಸುತ್ತಿದ್ದರೆಂಬ ಸಂಗತಿ ತನಿಖೆಯಲ್ಲಿ ಬಯಲಾಗಿದೆ.

ಜೆ.ಪಿ.ನಗರದ ಅತಿಥ್ಯಾ ವೋರಾ (23), ಜಯನಗರದ ಪ್ರಶಾಂತ್ (21), ಪುನೀತ್ ಕೊಠಾರಿ (22), ಬನಶಂಕರಿ ನಿವಾಸಿ ನಚಿಕೇತ್ (19) ಹಾಗೂ ನಾಗರಾಜ್‌ನನ್ನು (22) ಸೆ.4ರಂದು ತಿಲಕ್‌ನಗರ ಪೊಲೀಸರು ಬಂಧಿಸಿದ್ದಾರೆ. ಕೋರ್ಟ್ ಅನುಮತಿ ಮೇರೆಗೆ ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ ಹಲವು ಸ್ಫೋಟಕ ಮಾಹಿತಿ ಹೊರಬಿದ್ದಿದೆ.

ಪ್ರತಿಷ್ಠಿತ ಕಾಲೇಜುಗಳಲ್ಲಿ ಇಂಜಿನಿಯರಿಂಗ್, ಬಿ.ಕಾಂ ಹಾಗೂ ಬಿಸಿಎ ವ್ಯಾಸಂಗ ಮಾಡುತ್ತಿದ್ದರು. ಡಾರ್ಕ್‌ವೆಬ್ ಬಳಸಿ ಜರ್ಮನ್‌ನಿಂದ ಹೈಡ್ರೋ ಗಾಂಜಾ ಬೀಜ ಖರೀದಿಸಿ ತರಿಸಿದ್ದರು. ಮನೆಯ ಟೆರೆಸ್ ಮೇಲೆ ಹೂಕುಂಡದಲ್ಲಿ ಬೆಳೆಸಿ, ಡೆಲಿವರಿ ಬಾಯ್‌ಗಳ ಮೂಲಕ ಕಾಲೇಜು ವಿದ್ಯಾರ್ಥಿಗಳಿಗೆ ಹಾಗೂ ಟೆಕ್ಕಿಗಳಿಗೆ ಪೂರೈಕೆ ಮಾಡುತ್ತಿದ್ದರು. ಎಂಡಿಎಂಎ ಮಾತ್ರೆ, ಎಲ್‌ಎಸ್‌ಡಿ ಸ್ಟ್ರಿಪ್ಸ್ ಸೇರಿದಂತೆ ಇನ್ನಿತರ ಮಾದಕ ವಸ್ತುಗಳನ್ನೂ ಕೂಡ ವಿದೇಶದಿಂದ ಕಳ್ಳ ಸಾಗಾಣೆ ಮಾಡಿಕೊಂಡಿದ್ದರು ಎಂಬುದು ತನಿಖೆಯಿಂದ ಗೊತ್ತಾಗಿದೆ ಎಂದು ಆಗ್ನೇಯ ವಿಭಾಗದ ಡಿಸಿಪಿ ಶ್ರೀನಾಥ್ ಜೋಷಿ ತಿಳಿಸಿದ್ದಾರೆ.

ಆನ್‌ಲೈನ್‌ನಲ್ಲಿ ಕಲಿತಿದ್ದ  ಆನ್‌ಲೈನ್ ಮೂಲಕ ಹೈಡ್ರೊ ಗಾಂಜಾ ಬೆಳೆಯುವುದನ್ನು ಕಲಿತಿದ್ದ. 8 ರಿಂದ 10 ಕುಂಡಗಳಲ್ಲಿ ಬೀಜ ಹಾಕುತ್ತಿದ್ದರು. ಗೊಬ್ಬರ ಹಾಕಿ, 4 ರಿಂದ 5 ಅಡಿ ಎತ್ತರ ಬೆಳೆಸಿ ಕಟಾವು ಮಾಡುತ್ತಿದ್ದರು. ಎರಡು ತಿಂಗಳಿಗೆ ಗಾಂಜಾ ಬೆಳೆ ಕೈಗೆ ಸಿಗುತ್ತಿತ್ತು. ಕಟಾವು ಮಾಡಿದ ಹೈಡ್ರೋ ಗಾಂಜಾವನ್ನು ಒಣಗಿಸಿ, ಪ್ರಶಾಂತ್, ನಾಗರಾಜ್ ರಾವ್, ಪುನೀತ್, ನಚೀಕೇತ್‌ಗೆ ಕಡಿಮೆ ಬೆಲೆಗೆ ಮಾರುತ್ತಿದ್ದ. ಇವರೆಲ್ಲ ಖಾಯಂ ಗ್ರಾಹಕರನ್ನು ಮಾಡಿಕೊಂಡಿದ್ದು, ಅವರಿಗೆ ಹೆಚ್ಚಿನ ಬೆಲೆಗೆ ಮಾರಾಟ ಮಾಡುತ್ತಿದ್ದರು.

ಡ್ರಗ್ಸ್ ಸೇವನೆಗೆ ಬೆಣ್ಣೆ

ಅತಿಥ್ಯವೋರಾ ಜೆ.ಪಿ.ನಗರದ ಅಪಾರ್ಟ್‌ಮೆಂಟ್‌ವೊಂದರಲ್ಲಿ ಪ್ಲಾಟ್‌ನಲ್ಲಿ ಬಾಡಿಗೆಗೆ ನೆಲೆಸಿದ್ದು, ಇದೇ ಆತನ ಡ್ರಗ್ಸ್ ಚಟುವಟಿಕೆಯ ತಾಣವಾಗಿತ್ತು. ಈ ಮನೆಯಲ್ಲೇ ಪಾರ್ಟಿ ಮಾಡುತ್ತಿದ್ದರು. ಇದಕ್ಕೆ ‘ಸೆಷನ್’ಗೆ ಸೇರೋಣ ಎಂಬ ಕೋಡ್‌ವರ್ಡ್‌ನಿಂದ ವ್ಯಾಟ್ಸ್‌ಆ್ಯಪ್‌ನಲ್ಲಿ ಚರ್ಚಿಸಿದ್ದಾರೆ. ಕಳೆದ ನಾಲ್ಕೈದು ವರ್ಷಗಳಿಂದ ದಂಧೆಯಲ್ಲಿ ತೊಡಗಿದ್ದು, ಪಿಯುಸಿ ಓದುವಾಗ ಡ್ರಗ್ಸ್ ವ್ಯಸನಿಗಳಾಗಿದ್ದಾರೆ. 23 ವರ್ಷ ವಯಸ್ಸಿನ ನಾಗರಾಜ್ ರಾವ್‌ಗೆ ಶ್ವಾಸಕೋಶ ಸಮಸ್ಯೆ ಇದೆ. ಹೊಗೆರೂಪದಲ್ಲಿ ಡ್ರಗ್ಸ್ ಸೇವಿಸಲೂ ಆಗುವುದಿಲ್ಲ. ಹೀಗಾಗಿ ಬೆಣ್ಣೆಯಲ್ಲಿ ಡ್ರಗ್ಸ್ ಇಟ್ಟು ಸೇವನೆ ಮಾಡುತ್ತಿದ್ದ ಎಂಬುದು ವಿಚಾರಣೆಯಿಂದ ಗೊತ್ತಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.