ಮಳೆ ಆರ್ಭಟಕ್ಕೆ ಐವರು ಬಲಿ

ಬೆಂಗಳೂರು: ರಾಜ್ಯದಲ್ಲಿ ಮುಂಗಾರು ಆರ್ಭಟ ಮುಂದುವರಿದಿದ್ದು, ಮಳೆ ಸಂಬಂಧಿತ ಅವಘಡಗಳಿಗೆ ಐವರು ಬಲಿಯಾಗಿದ್ದಾರೆ.

ರಾಯಚೂರು ಜಿಲ್ಲೆ ದೇವದುರ್ಗ ತಾಲೂಕಿನ ಸತತ ಎರಡು ದಿನಗಳಿಂದ ಸುರಿದ ಮಳೆಗೆ ಗೌರಂಪೇಟೆ ಗುಡ್ಡದ ಕಲ್ಲು ನೆನೆದು, ಉರುಳಿಬಿದ್ದಿದ್ದರಿಂದ ಇಬ್ಬರು ಬಾಲಕರು ಶುಕ್ರವಾರ ಸಾವಿಗೀಡಾಗಿದ್ದಾರೆ. ವೀರೇಶ ಹನುಮಂತ (13) ಮತ್ತು ರಮೇಶ ಶಿವರಾಜ (10) ಮೃತರು. ತೀವ್ರ ಗಾಯಗೊಂಡ ಮೌನೇಶ ಶಿವರಾಜ ಚಿಕಿತ್ಸೆ ಪಡೆಯುತ್ತಿದ್ದಾನೆ.

ರಾಯಚೂರಿನ ಸಿಂಗನೋಡಿ ಗ್ರಾಮದ ಹೊರವಲಯದಲ್ಲಿ ಶುಕ್ರವಾರ ಸಂಜೆ ಸಿಡಿಲು ಬಡಿದು ಅಣ್ಣ ಮತ್ತು ತಮ್ಮ ಮೃತಪಟ್ಟಿದ್ದಾರೆ. ರವಿಚಂದ್ರ (23) ಮತ್ತು ವಿಷ್ಣು (18) ಮೃತರು. ತಾಯಿ ಮಹಾದೇವಿಗೆ ಸಣ್ಣಪುಟ್ಟ ಗಾಯಗಳಾಗಿವೆ.

ಹಳ್ಳದಲ್ಲಿ ಕೊಚ್ಚಿ ಹೋದ ವ್ಯಕ್ತಿ: ಯಳಸಂಗಿ- ನಿಂಬಾಳದಲ್ಲಿ ಹಳ್ಳದ ನೀರು ರಸ್ತೆ ಸೇತುವೆ ಮೇಲೆ ರಭಸದಿಂದ ಹರಿಯುತ್ತಿದ್ದರೂ ಲೆಕ್ಕಿಸದೆ ದಾಟಲು ಯತ್ನಿಸಿದ ಪ್ಲಾಸ್ಟಿಕ್ ಕೊಡಗಳ ವ್ಯಾಪಾರಿ, ನಿಯಂತ್ರಣ ಕಳೆದುಕೊಂಡು ಕೊಚ್ಚಿ ಹೋಗಿದ್ದಾನೆ.

ಇಂದು ಮಳೆ: ಕರಾವಳಿ, ದಕ್ಷಿಣ ಒಳನಾಡು ಹಾಗೂ ಉತ್ತರ ಒಳನಾಡಿನಲ್ಲಿ ಇಂದು ಭಾರಿ ಮಳೆಯಾಗಲಿದೆ. ದಕ್ಷಿಣ ಕನ್ನಡ, ಉತ್ತರ ಕನ್ನಡ ಹಾಗೂ ಉಡುಪಿಯಲ್ಲಿ ಜು.25ರಂದು ಆರೆಂಜ್ ಅಲರ್ಟ್ ಹಾಗೂ ಜು.26ರಂದು ಯೆಲ್ಲೋ ಅಲರ್ಟ್ ಘೋಷಿಸಲಾಗಿದೆ.

https://www.vijayavani.net/acp-sathish-donated-plasma/