ಅನಿಶ್ಚಿತತೆಯಲ್ಲಿ ಮೀನುಗಾರಿಕೆ ಋತು

ಪ್ರಕಾಶ್ ಮಂಜೇಶ್ವರ ಮಂಗಳೂರು

ವಾರ್ಷಿಕ ಲೆಕ್ಕಾಚಾರ ಪ್ರಕಾರ ಜುಲೈ ಅಂತ್ಯಕ್ಕೆ ಮೀನುಗಾರಿಕೆ ರಜೆ ಮುಗಿಯುತ್ತಿದೆ. ಆದರೆ ಈ ಬಾರಿ ವರ್ಷಂಪ್ರತಿ ನಡೆಯುವಂತೆ ಆಗಸ್ಟ್ ಮೊದಲ ವಾರದಲ್ಲಿ ಹೊಸ ಮೀನುಗಾರಿಕೆ ಋತು ಆರಂಭಗೊಳ್ಳುವುದು ಅನಿಶ್ಚಿತತೆಯಲ್ಲಿದೆ.

ಮಂಗಳೂರು ದಕ್ಕೆಯಲ್ಲಿ ಪರ್ಸೀನ್, ಟ್ರಾಲ್ ಸೇರಿ ಒಟ್ಟು 1200 ಹಾಗೂ ಮಲ್ಪೆಯಲ್ಲಿ 1800 ಬೋಟುಗಳಿವೆ. ಈ ಬೋಟುಗಳಲ್ಲಿ ಶೇ.90 ಜನರು ಆಂಧ್ರಪ್ರದೇಶ, ತಮಿಳುನಾಡು, ಜಾರ್ಖಂಡ್, ಒಡಿಶಾ ರಾಜ್ಯಗಳ ಜನರು ದುಡಿಯುತ್ತಿದ್ದಾರೆ. ಶೇ.10 ಜನರಷ್ಟೇ ಸ್ಥಳೀಯರು ಇರುವುದು.

ಲಾಕ್‌ಡೌನ್ ಸಂದರ್ಭ ಊರಿಗೆ ತೆರಳಿರುವ ಕಾರ್ಮಿಕರು ಈ ತಿಂಗಳೊಳಗೆ ವಾಪಸ್ ಬಂದರೂ 14 ದಿನ ಹೋಂ ಕ್ವಾರಂಟೈನ್‌ನಲ್ಲಿರಬೇಕು. 4,000ದಷ್ಟು ಇರುವ ಹೊರರಾಜ್ಯದ ಕಾರ್ಮಿಕರನ್ನು ಕರೆತಂದು, ಅವರ ಕ್ವಾರಂಟೈನ್ ಅವಧಿಯ ವೆಚ್ಚ ಭರಿಸಿ ಮೀನುಗಾರಿಕೆ ನಡೆಸುವುದು ಸುಲಭದ ಮಾತಲ್ಲ.

ಅಂತರ ಪಾಲನೆ ಕಷ್ಟ

ಮೀನುಗಾರ ಮುಖಂಡರೇ ಒಪ್ಪಿಕೊಳ್ಳುವಂತೆ ಒಮ್ಮೆ ಮಂಗಳೂರು ದಕ್ಕೆ ಅಥವಾ ಮಲ್ಪೆಯಲ್ಲಿ ಮೀನುಗಾರಿಕೆ ವ್ಯವಹಾರ ಶುರುವಾದರೆ, ಅಲ್ಲಿ ಸಾಮಾಜಿಕ ಅಂತರ ಪಾಲಿಸುವುದು ಕಷ್ಟ. ಜಾತ್ರೆಯಂತೆ ಜನ ಸೇರುತ್ತಾರೆ. ಮೀನುಗಾರಿಕೆ ಶುರುವಾದ ಮೇಲೆ ಮೀನುಗಾರಿಕಾ ಬಂದರು ಪ್ರದೇಶ ಸೀಲ್‌ಡೌನ್ ಆದರೆ ಬೋಟು ಮಾಲೀಕರು, ಕಾರ್ಮಿಕರು ಭಾರಿ ನಷ್ಟ ಅನುಭವಿಸಬೇಕಾಗುತ್ತದೆ.

29ರಂದು ನಿರ್ಧಾರ: ಹೊಸ ಮೀನುಗಾರಿಕೆ ಋತು ಆರಂಭಿಸಲು ಇರುವ ಸವಾಲುಗಳ ಬಗ್ಗೆ ಜುಲೈ 29ರಂದು ಮಂಗಳೂರಿನಲ್ಲಿ ವಿವಿಧ ಮೀನುಗಾರಿಕೆ ಸಂಘಟನೆಗಳ ಸಭೆ ಏರ್ಪಡಿಸಲಾಗಿದೆ. ಟ್ರಾಲ್‌ಬೋಟ್, ಪರ್ಸೀನ್ ಬೋಟ್ ಮಾಲೀಕರು, ಹಸಿ ಮೀನು ವ್ಯಾಪಾರಸ್ಥರು, ಮೀನು ರಫ್ತು ನಡೆಸುವ ಸಂಸ್ಥೆ, ಫಿಶ್‌ಮಿಲ್ ಪ್ರತಿನಿಧಿಗಳು ಭಾಗವಹಿಸಲಿದ್ದಾರೆ.