ಆಳ ಸಮುದ್ರದ ಮೀನುಗಾರಿಕೆಗೆ ಈ ಬಾರಿ ಹದಿನೈದು ದಿನ ತಡವಾಗಿ ರಜೆ ಘೋಷಣೆಯಾಗಿದ್ದು, ಇನ್ನೆರಡು ತಿಂಗಳ ಕಾಲ ನಾಡದೋಣಿ ಮೀನುಗಾರಿಕೆಗೆ ಮಾತ್ರ ಅವಕಾಶ. ಸಾಂಪ್ರದಾಯಿಕವಾಗಿ ನಡೆಸುವ ಈ ಮೀನುಗಾರಿಕೆ ದ.ಕ ಜಿಲ್ಲೆಯಲ್ಲಿ ಇನ್ನಷ್ಟೇ ಚುರುಕು ಪಡೆಯಬೇಕಿದೆ. ಈಗಾಗಲೇ ಸಣ್ಣ ಪ್ರಮಾಣದಲ್ಲಿ ಮೀನುಗಾರಿಕೆ ಆರಂಭವಾಗಿದೆ. ದೊಡ್ಡ ಮಟ್ಟದಲ್ಲಿ ಇನ್ನಷ್ಟೇ ಶುರುವಾಗಬೇಕಿದೆ. ಜೋರಾಗಿ ಮಳೆ, ಸಮುದ್ರದಲ್ಲಿ ಗಾಳಿ ಎದ್ದು ತೀರ ಪ್ರದೇಶದಲ್ಲಿ ನೀರು ರಾಡಿ(ತೂಫಾನ್) ಎದ್ದರೆ ನಾಡದೋಣಿ ಮೀನುಗಾರರಿಗೆ ಹೆಚ್ಚಿನ ಮೀನು ದೊರೆಯುತ್ತದೆ. ಈ ರೀತಿ ರಾಡಿ ಎದ್ದಾಗ ನೀರಿನ ಅಡಿಭಾಗದಲ್ಲಿರುವ ಮಣ್ಣಿನ ಗಟ್ಟಿಗಳು ಮೇಲಕ್ಕೆ ಬರುತ್ತವೆ(ಮೀನುಗಾರರ ಭಾಷೆಯಲ್ಲಿ ಇವುಗಳಿಗೆ ‘ಬರಂ’ ಎನ್ನುತ್ತಾರೆ) ಅವುಗಳಲ್ಲಿರುವ ಹುಳುಗಳನ್ನು ತಿನ್ನಲು ಮೀನುಗಳು ದಡದತ್ತ ಬರುತ್ತವೆ. ಇವುಗಳನ್ನು ಬಲೆ ಬೀಸಿ ಹಿಡಿಯುತ್ತೇವೆ ಎನ್ನುತ್ತಾರೆ ನಾಡದೋಣಿ ಮೀನುಗಾರ ಸುಕೇಶ್ ಕೋಟ್ಯಾನ್. ಬಲೆ ಮುಹೂರ್ತ: ನಾಡದೋಣಿ ಮೀನುಗಾರಿಕೆ ಪೂರ್ವತಯಾರಿಯಾಗಿ ಶುಕ್ರವಾರ ಸುರತ್ಕಲ್ ವ್ಯಾಪ್ತಿಯ ಮೀನುಗಾರರು ‘ಬಲೆ ಮುಹೂರ್ತ’ ನೆರವೇರಿಸಿದ್ದಾರೆ. ಬೇರೆ ಬೇರೆ ಕಣ್ಣುಗಳಿರುವ ಬಲೆ ಸಿದಟಛಿಗೊಳಿಸುವ ಕಾರ್ಯ ಆರಂಭಿಸಿದ್ದಾರೆ. ಮಂಗಳೂರಿನ ಬೈಕಂಪಾಡಿ, ಕೋಡಿಕಲ್, ಹೊಸಬೆಟ್ಟು, ಕೂಳೂರು, ಕುಳಾಯಿ, ಉಳ್ಳಾಲ ಪ್ರದೇಶದ ಮೀನುಗಾರರು ಈ ಸಾಂಪ್ರದಾಯಿಕ ಮೀನುಗಾರಿಕೆಯಲ್ಲಿ ತಮ್ಮನ್ನು ತೊಡಗಿಸಿಕೊಳ್ಳುತ್ತಾರೆ. ಆದರೆ ಇತ್ತೀಚಿನ ವರ್ಷಗಳಲ್ಲಿ ಸಾಂಪ್ರದಾಯಿಕ ಮೀನುಗಾರಿಗೂ ನಿರೀಕ್ಷಿತ ಪ್ರಮಾಣದಲ್ಲಿ ಮೀನು ದೊರೆಯುತ್ತಿಲ್ಲ. ಉಡುಪಿಯಲ್ಲಿ ಈಗಾಗಲೇ ಸಮುದ್ರ ಪೂಜೆ ನಡೆಸಿ ನಾಡದೋಣಿ ಮೀನುಗಾರಿಕೆ ಆರಂಭಿಸಲಾಗಿದೆ
