ನವೆಂಬರ್ ತಿಂಗಳಲ್ಲಿ ಚಿತ್ರಪ್ರೇಮಿಗಳಿಗೆ ವಿಶಿಷ್ಟ ಹಬ್ಬ. ಇದೇ ಮೊದಲ ಬಾರಿಗೆ ಧಾರವಾಡದಲ್ಲಿ ಕರ್ನಾಟಕ ಅಂತಾರಾಷ್ಟ್ರೀಯ ಸಿನಿಮೋತ್ಸವ ಆಯೋಜಿಸಲಾಗುತ್ತಿದೆ. ಮೂರು ದಿನಗಳ ಈ ಸಂಭ್ರಮದಲ್ಲಿ ಕಲಾವಿದರ ಸಮಾಗಮ ಆಗಲಿದೆ. ಧಾರವಾಡದ ನವ ಕರ್ನಾಟಕ ಚಲನಚಿತ್ರ ಅಕಾಡೆಮಿ ವತಿಯಿಂದ ಸತ್ತೂರಿನ ಟ್ರಾವಲ್ ಇನ್ ಹೋಟೆಲ್ನಲ್ಲಿ ನ. 19, 20 ಮತ್ತು 21ರಂದು ಈ ಕಾರ್ಯಕ್ರಮ ಆಯೋಜಿಸಲಾಗಿದೆ. ಮೊದಲ ದಿನ ಉದ್ಘಾಟನೆ, ಎರಡನೇ ದಿನ ಅವಿವಾಹಿತ ಮಹಿಳೆಯರಿಗಾಗಿ (18ರಿಂದ 35 ವಯಸ್ಸಿನೊಳಗೆ) ‘ಮಿಸ್ ಕಿಫ್ ಕ್ವೀನ್ -2021’ ಸ್ಪರ್ಧೆ, ಕೊನೆಯ ದಿನ ಸಮಾರೋಪ ಸಮಾರಂಭದ ಜತೆಗೆ ಸಿನಿಮಾ ಪ್ರದರ್ಶನ, ಪ್ರಶಸ್ತಿ ವಿತರಣೆ ಕಾರ್ಯಕ್ರಮ ನಡೆಯಲಿದೆ. ಈಗಾಗಲೇ ಫೋಕಸ್ ಕಂಟ್ರಿ ಮಾಲ್ಡೀವ್ಸ್ನಿಂದ 11 ಸೆಲೆಬ್ರಿಟಿಗಳು ಆಗಮಿಸಲು ಉತ್ಸಾಹ ತೋರಿದ್ದಾರೆ. ಇಂಡೋ-ಲ್ಯಾಟಿನ್ ಅಮೆರಿಕದಿಂದಲೂ ಬಹಳಷ್ಟು ಕಲಾವಿದರು ಆಗಮಿಸುವ ನಿರಿಕ್ಷೆ ಇದೆ. ತೆಲಂಗಾಣ, ಉತ್ತರಾಖಂಡ, ಅರುಣಾಚಲಪ್ರದೇಶ, ಅಸ್ಸಾಂ, ಮಹಾರಾಷ್ಟ್ರ ಸೇರಿ ಹಲವು ರಾಜ್ಯಗಳ ಕಲಾವಿದರು ಪಾಲ್ಗೊಳ್ಳಲಿದ್ದಾರೆ. ರಾಜ್ಯದ ಜನಪ್ರಿಯ ನಟ-ನಟಿಯರು ಸಹ ಈ ಚಿತ್ರೋತ್ಸವದಲ್ಲಿ ಭಾಗವಹಿಸಲಿದ್ದಾರೆ.
