ಶ್ರೀರಾಮನವಮಿಯ ವಿಶೇಷವಾಗಿ ಕೋಸಂಬರಿ, ಪಾನಕ, ಮಜ್ಜಿಗೆ ಹೆಚ್ಚು ಬಳಸಲಾಗುತ್ತದೆ. ಮನೆಮನೆಗಳಲ್ಲೂ ಇವು ಕಾಯಂ ಪ್ರಸಾದವಾಗಿ ಬಳೆಯಾಗುತ್ತದೆ ಅದೇ ರೀತಿ ದೇಗುಲಗಳಲ್ಲಿ, ಸಂಘಟನೆಗಳಿಂದಲೂ ಇವು ಪ್ರಮುಖ ಸ್ಥಾನ ಪಡೆಯುತ್ತವೆ. ಆದರೆ ಇವುಗಳ ಬಳಕೆಗೆ ಪ್ರಮುಖವಾಗಿ ಅಗತ್ಯವಿರುವ ಸೌತೇಕಾಯಿ, ನಿಂಬೆಹಣ್ಣು, ಕರ್ಬೂಜಾ ದರಗಳು ದಿಢೀರ್ ಏರಿಕೆ ಕಂಡುಬಂದಿವೆ. ಈಗಾಗಲೇ ರಾಶಿಗಟ್ಟಲೆ ಸೌತೆಕಾಯಿ, ನಿಂಬೆಹಣ್ಣು ಹಾಗೂ ಕರ್ಬೂಜಾ ಹಣ್ಣುಗಳು ಮಾರುಕಟ್ಟೆ ಪ್ರವೇಶಿಸಿದ್ದು ಗ್ರಾಹಕರ ಜೇಬು ಸುಡುತ್ತಿದೆ, ಆದರೆ ಬೆಲೆ ಏರಿಕೆ ಬಿಸಿ ಹಬ್ಬದ ಮೇಲೆ ಯಾವುದೇ ಪರಿಣಾಮ ಬೀರುತ್ತಿಲ್ಲ, ಮಾರುಕಟ್ಟೆಗಳಲ್ಲಿ ಗ್ರಾಹಕರು ಸಡಗರ ಸಂಭ್ರಮದಿಂದಲೇ ಹಬ್ಬದ ಸಾಮಾಗ್ರಿ ಖರೀದಿ ಮಾಡುತ್ತಿರುವ ದೃಶ್ಯ ಕಂಡುಬರುತ್ತಿದೆ. 1 ಕೆ.ಜಿ ಕರ್ಬೂಜ ಖರೀದಿಸಿದರೆ 40ರಿಂದ 50 ರೂಪಾಯಿ ಅದೇ 3 ಕೆ.ಜಿ ಖರೀದಿಸಿದರೆ 100 ರೂಪಾಯಿ ಎಂಬ ಆರ್ಗಳಲ್ಲಿ ಮಾರಾಟ ಮಾಡುತ್ತಿರುವ ದೃಶ್ಯಗಳು ಸಾಮಾನ್ಯವಾಗಿದೆ. ಇದು ವ್ಯಾಪಾರಿಗಳೂ ಹಾಗೂ ಗ್ರಾಹಕರಿಗೂ ಅನುಕೂಲವಾಗಿದ್ದು ಹೆಚ್ಚಿನ ಮಂದಿ ಆರ್ಗಳಲ್ಲಿ ಹಣ್ಣುಗಳನ್ನು ಖರೀದಿ ಮಾಡುತ್ತಿದ್ದಾರೆ. ಸಾಮಾನ್ಯ ಗಾತ್ರದ ನಿಂಬೆಹಣ್ಣಿಗೆ 5 ರಿಂದ 7 ರೂಪಾಯಿ ದರ ಕಂಡುಬಂದರೆ ಐದಾರು ನಿಂಬೆ ಕೊಂಡರೆ ಕಡಿಮೆ ದರದಲ್ಲಿ ಮಾರಾಟ ಮಾಡುವ ವ್ಯಾಪಾರ ಕಂಡುಬರುತ್ತಿದೆ. ಅದೇ ರೀತಿ ಸೌತೆ ಕಾಯಿಗೂ ಹೆಚ್ಚಿನ ಬೇಡಿಕೆ ಬಂದಿದ್ದು ಮಾರುಕಟ್ಟೆಗಳಲ್ಲಿ ತಳ್ಳುಗಾಡಿಗಳಲ್ಲಿ ಸೌತೆಕಾಯಿ ಮಾರಾಟ ಭರ್ಜರಿಯಾಗಿ ನಡೆಯುತ್ತಿದೆ.
