ಪಪ್ಪಾಯಿ ದರಕುಸಿತಕ್ಕೆ ರೈತ ತತ್ತರ, ಸೂಲಿಬೆಲೆ ವ್ಯಾಪ್ತಿಯಲ್ಲಿ ಬೆಳೆಗಾರರು ಕಂಗಾಲು, ಬುಡಸಹಿತ ಮರಗಳ ಮಾರಣ ಹೋಮ

ಬೆಂ.ಗ್ರಾಮಾಂತರ/ಸೂಲಿಬೆಲೆ: ಮಳೆರಾಯ ಅನ್ನದಾತನ ಜತೆ ಜೂಜಾಟ ಆಡಿದರೆ, ಬೆಲೆ ಕುಸಿತದ ಬರೆ ರೈತಾಪಿ ಜನರನ್ನು ಅಡಕತ್ತರಿಗೆ ಸಿಲುಕಿಸುತ್ತದೆ. ಹವಾಮಾನ ವೈಪರೀತ್ಯದ ನಡುವೆ ಕಾದಾಟ ನಡೆಸುವ ರೈತರು ಬೆಲೆ ಕುಸಿತದ ಹೊಡೆತಕ್ಕೆ ಸಿಲುಕಿ ನಲುಗಿಹೋಗುತ್ತಾರೆ.

ಇಂಥದ್ದೊಂದು ಪರಿಸ್ಥಿತಿಗೆ ಸಿಲುಕಿರುವ ಹೊಸಕೋಟೆ ತಾಲೂಕು ಸೂಲಿಬೆಲೆಯ ಪಪ್ಪಾಯಿ ಬೆಳೆಗಾರರು ದಿಕ್ಕುತೋಚದಂತಾಗಿದ್ದಾರೆ.

ಕರೊನಾ ಲಾಕ್‌ಡೌನ್‌ನಿಂದಾಗಿ ಸಾಕಷ್ಟು ಆರ್ಥಿಕವಾಗಿ ಜರ್ಜರಿತರಾಗಿದ್ದ ತೋಟಗಾರಿಕೆ ಬೆಳೆಗಾರರಿಗೆ ಈಗ ಬೆಲೆ ಕುಸಿತ ಗಾಯದ ಮೇಲೆ ಉಪ್ಪು ಸವರಿದಂತಾಗಿದೆ. ಸೂಲಿಬೆಲೆ ಹೋಬಳಿ ವ್ಯಾಪ್ತಿಯ ಹಲವು ರೈತರು ಪಪ್ಪಾಯಿ ಬೆಳೆದು ಉತ್ತಮ ಇಳುವರಿಯೊಂದಿಗೆ ಆದಾಯದ ನಿರೀಕ್ಷೆಯಲ್ಲಿದ್ದರೆ ಅತ್ತ ಮಾರುಕಟ್ಟೆಯಲ್ಲಿ ಪಪ್ಪಾಯಿಗೆ ಬೆಲೆ ಇಲ್ಲದಂತಾಗಿರುವುದು ಬೆಳೆಗಾರರ ಸಹನೆ ಕಟ್ಟೆಯೊಡೆಯುವಂತೆ ಮಾಡಿದೆ. ಕಣ್ಣಮುಂದೆಯೇ ಪಪ್ಪಾಯಿ ಹಣ್ಣಾಗಿ ನೆಲಕ್ಕುರುಳುತ್ತಿರುವುದನ್ನು ಸಹಿಸಲಾಗದೆ ಮರಗಳ ಬುಡಕ್ಕೆ ಕೊಡಲಿ ಪೆಟ್ಟು ಹಾಕ್ಕುತ್ತಿರುವ ದೃಶ್ಯಗಳು ಕಂಡುಬರುತ್ತಿವೆ.

ಶೇಖರಣೆ ಸಾಧ್ಯವಿಲ್ಲ: ಪಪ್ಪಾಯಿ ಬೆಳೆಯನ್ನು ದೀರ್ಘಕಾಲ ಶೇಖರಿಸಿಡಲು ಸಾಧ್ಯವಿಲ್ಲದ ಕಾರಣ ರೈತರ ಪಾಲಿಗೆ ಕೈಗೆ ಬಂದ ತುತ್ತು ಬಾಯಿಗೆ ಬಾರದಂತಾಗಿದೆ. ಬೆವರು ಸುರಿಸಿ ಬೆಳೆದ ಬೆಳೆ ಕಣ್ಣಮುಂದೆಯೇ ಕೊಳೆತು ಹೋಗುವುದನ್ನು ನೋಡಲಾರದೆ ಕಣ್ಣೀರು ಹಾಕುವ ಪರಿಸ್ಥಿತಿ ನಿರ್ಮಾಣವಾಗಿದೆ.

ರಪ್ತು ಹೆಚ್ಚು: ಬೀದರ್, ಬೆಳಗಾಂ ಸೇರಿ ರಾಮನಗರ ಮತ್ತಿತರ ಜಿಲ್ಲೆಗಳಿಂದ ಈ ಬಾರಿ ಹೆಚ್ಚಿನ ಪಪ್ಪಾಯಿ ಮಾರುಕಟ್ಟೆಗೆ ಬರುತ್ತಿದೆ. ಇದರಿಂದ ಸಹಜವಾಗಿ ಬೆಲೆ ಕುಸಿತ ಕಂಡಿದೆ. ಹೆಚ್ಚಿನ ದರ ಸಿಗುವ ನಿರೀಕ್ಷೆಯಿಂದ ಈ ಬಾರಿ ಜಿಲ್ಲೆ ಸೇರಿ ನೆರೆ ಜಿಲ್ಲೆಯಲ್ಲಿ ಹೆಚ್ಚಿನ ಪಪ್ಪಾಯಿ ಬೆಳೆದಿದ್ದು ಮಾರುಕಟ್ಟೆಯಲ್ಲಿ ಬೆಲೆ ಕುಸಿತಕ್ಕೆ ಕಾರಣವಾಗಿದೆ. ಕರೊನಾ ಕಾರಣದಿಂದ ಹಣ್ಣು ಖರೀದಿಯೂ ಕಡಿಮೆಯಾಗಿದೆ. ಇದೆಲ್ಲ ಕಾರಣದಿಂದ ಬೆಳೆಗಾರರಿಗೆ ನಷ್ಟ ಎದುರಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.