ಕಳೆದ ಮಾರ್ಚ್ ತಿಂಗಳಲ್ಲಿ ಹಾಡಿಯ 15 ಗುಡಿಸಲು ಬೆಂಕಿಗಾಹುತಿಯಾದವು. ಕುರಿ, ಮೇಕೆ, ಹಸು ಸೇರಿ ಇತರ ಸಾಕುಪ್ರಾಣಿಗಳು, ಮನೆಯಲ್ಲಿನ ದಿನಸಿ, ಬಟ್ಟೆ, ಬರೆ, ದಾಖಲೆಗಳು ಬೆಂಕಿಯಲ್ಲಿ ಸುಟ್ಟುಹೋದವು. ಕೆಲವು ವಯಸ್ಸಾದವರು ಗಾಯಗೊಂಡಿದ್ದರು. ಬೆಂಕಿ ಅವಘಡದಿಂದ ಆಘಾತಕ್ಕೊಳಗಾಗಿದ್ದ ಕುಟುಂಬಗಳಿಗೆ ಮುಂದಿನ ಬದುಕು ಹೇಗಪ್ಪ ಎಂಬ ಪ್ರಶ್ನೆ ಎದುರಾಗಿತ್ತು. ಅಂತಹ ಸಂದರ್ಭದಲ್ಲಿ ಸ್ಥಳೀಯ ಜನಪ್ರತಿನಿಧಿಗಳು, ಗ್ರಾಮಸ್ಥರು, ರಾಮನಗರ ತಾಪಂ, ಗ್ರಾಪಂ ನೆರವಿನ ಹಸ್ತ ಚಾಚಿ ಅವರ ಬದುಕಿಗೆ ಸಹಾಯ ಮಾಡಿದವು. ಇದೇ ಸಂದರ್ಭದಲ್ಲಿ ಸಂಬಂಧಪಟ್ಟ ಇಲಾಖೆಗಳು ಈ ಕುಟುಂಬಗಳ ವಾಸಕ್ಕೆ ಹಕ್ಕುಪತ್ರ ನೀಡುವ ಭರವಸೆಯನ್ನೂ ನೀಡಿದ್ದವು. ಆದರೆ, ಇದುವರೆಗೂ ಸಿಕ್ಕಿಲ್ಲ.
