ಪಾಕಿಸ್ತಾನದಲ್ಲಿ ತಯಾರಾಗುತ್ತಿದ್ದ ನಕಲಿ ನೋಟುಗಳನ್ನು ಬಾಂಗ್ಲಾ ಗಡಿ ದಾಟಿಸಿ ರೈಲು ಮೂಲಕ ಮಾದನಾಯಕನಹಳ್ಳಿ ಮತ್ತು ಶ್ರೀರಾಂಪುರದ ಮನೆಯಲ್ಲಿ ಇಟ್ಟುಕೊಂಡು ಬೆಂಗಳೂರು ಸೇರಿ ರಾಜ್ಯದ ವಿವಿಧೆಡೆಗೆ ಸರಬರಾಜು ಮಾಡುತ್ತಿದ್ದರು. ಬಟ್ಟೆ ವ್ಯಾಪಾರದ ಸೋಗಿನಲ್ಲಿ ಶ್ರೀರಾಂಪುರದ ವನಿತಾ, ನಕಲಿ ನೋಟು ದಂಧೆ ನಡೆಸುತ್ತಿದ್ದಳು. ಅಸಲಿ ನೋಟಿಗೆ ಸೆಡ್ಡು ಹೊಡೆಯುವಂತೆ ನಕಲಿ ನೋಟು ಕಾಣುತ್ತಿದ್ದವು. ಸಣ್ಣ ಅಕ್ಷರದ ಸ್ಕ್ರಿಪ್ಟ್, ನೋಟಿನ ಒಳಗಿನ ದಾರದಂತಿರುವ ಥ್ರೆಡ್ ಕಲರ್ ಮತ್ತು ಅಳತೆಯಲ್ಲಿ ಸ್ವಲ್ಪ ಬದಲಾವಣೆ ಉಳಿದಂತೆ ಅಸಲಿ ನೋಟಿನಂತೆ ಇದ್ದು, ಸಾಮಾನ್ಯ ಜನ ಪತ್ತೆಹಚ್ಚುವುದು ಕಷ್ಟವಾಗಿತ್ತು ಎಂದು ಎನ್ಐಎ ಆತಂಕ ವ್ಯಕ್ತಪಡಿಸಿತ್ತು. ಈ ಕೇಸಿನಲ್ಲಿ ಪಶ್ಚಿಮ ಬಂಗಾಳದ ಜಹಿರುದ್ದೀನ್ ಎಂಬಾತ ತಲೆಮರೆಸಿಕೊಂಡಿದ್ದು, ಬಂಧನ ಕಾರ್ಯಾಚರಣೆ ಮುಂದುವರೆಸಿದ್ದಾರೆ.
