ಪಾಲಿಕೆಗೆ 14 ಗ್ರಾಪಂಗಳು ಸೇರ್ಪಡೆ !

ಆಯುಕ್ತರ ಹೆಸರಲ್ಲಿ ಫೇಕ್ ಪತ್ರ ಸೃಷ್ಟಿ

ವಿಶೇಷ ವರದಿ

ತುಮಕೂರು: ಮಹಾನಗರ ಪಾಲಿಕೆ ಭೌಗೋಳಿಕ ವ್ಯಾಪ್ತಿ ವಿಸ್ತರಣೆಗೆ 14 ಗ್ರಾಪಂಗಳನ್ನು ಪಾಲಿಕೆ ವ್ಯಾಪ್ತಿಗೆ ಸೇರಿಸಿ ಗಡಿ ವಿಸ್ತರಿಸಲು ನಿರಾಕ್ಷೇಪಣಾ ಪತ್ರವನ್ನು ಜಿಪಂನಿಂದ ಕೋರಲಾಗಿದೆ! ಜಿಪಂ ಸಿಇಒಗೆ ಎನ್​ಒಸಿ ನೀಡುವಂತೆ ಪಾಲಿಕೆ ಆಯುಕ್ತರು ಬರೆದಿರುವ ಈ ಪತ್ರ ಸಾಮಾಜಿಕ ಜಾಲತಾಣಗಳಲ್ಲಿ ಕಳೆದೆರಡು ದಿನಗಳಿಂದ ಹರಿದಾಡುತ್ತಿದೆ. ಈ ಪತ್ರ (!?) ಸಾಕಷ್ಟು ಸಂಚಲನ ಸೃಷ್ಟಿಸಿದ್ದು ನಗರದ ಸುತ್ತಮುತ್ತಲಿನ ರಿಯೆಲ್​ ಎಸ್ಟೇಟ್​ "ಭೂಮ್​'ಗೆ ಪೂರಕವಾಗಿ ಪತ್ರ ಹರಿದುಬಿಡಲಾಗಿದೆ ಎನ್ನಲಾಗಿದೆ.

14 ಗ್ರಾಪಂಗಳ ಎನ್​ಒಸಿ !: ಮಹಾನಗರ ಪಾಲಿಕೆ ಗಡಿ ವಿಸ್ತರಣೆ ವಿಚಾರದಲ್ಲಿ ಗ್ರಾಪಂಗಳ ನಿರಾಕ್ಷೇಪ್ರಣಾ ಪತ್ರ (ಎನ್​ಒಸಿ) ಕೋರಿ ಸೆ.10, 2024ರಂದು ಜಿಪಂ ಸಿಇಒಗೆ ತುಮಕೂರು ಮಹಾನಗರ ಪಾಲಿಕೆ ಆಯುಕ್ತರ ಹೆಸರಲ್ಲಿ ಬರೆದಿರುವ ಪತ್ರ ಸೃಷ್ಟಿಸಲಾಗಿದೆ. ಈ ಪತ್ರದಲ್ಲಿ ಆಯುಕ್ತರ ಸಹಿ ಇಲ್ಲದೇ ಇರುವುದು ಕಂಡು ಬಂದಿದ್ದು ಈ ಪತ್ರದ ಹಿಂದೆ ರಿಯೆಲ್​ ಎಸ್ಟೇಟ್​ ಕುಳಗಳ ಕೈವಾಡವಿರುವುದು ಸ್ಪಷ್ಟವಾಗಿದೆ.

ಗೂಳೂರು, ಹೆಗ್ಗೆರೆ, ಕೆ.ಪಾಲಸಂದ್ರ, ಕೆಸರುಮಡು, ಹಿರೇಹಳ್ಳಿ, ಬೆಳಗುಂಬ, ಸ್ವಾಂದೇನಹಳ್ಳಿ, ಅರಕೆರೆ, ಊರುಕೆರೆ, ಬುಗುಡನಹಳ್ಳಿ, ಮಲ್ಲಸಂದ್ರ, ಮೈದಾಳ, ದೊಡ್ಡನಾರವಂಗಲ, ಹೆತ್ತೇನಹಳ್ಳಿ ಗ್ರಾಪಂಗಳಿಂದ ಎನ್​ಒಸಿ ಕೋರಲಾಗಿದೆ. ಸಹಜವಾಗಿ ಪಾಲಿಕೆ ಗಡಿ ವಿಸ್ತರಣೆ ಚರ್ಚೆ ನಡುವೆಯೇ ಎನ್​ಒಸಿ ಕೋರಿರುವ ಈ ಪತ್ರ ಹರಿದುಬಿಡುವ ಮೂಲಕ ನಗರದ ಸುತ್ತಮುತ್ತ ಭೂಮಿ ಬೆಲೆಯನ್ನು ದುಪ್ಪಟ್ಟು ಮಾಡುವ ಹುನ್ನಾರವಿದೆ.

ಈ ಬಗ್ಗೆ ಪಾಲಿಕೆ ಆಯುಕ್ತೆ ಬಿ.ವಿ.ಅಶ್ವಿಜರನ್ನು "ವಿಜಯವಾಣಿ' ಸಂಪರ್ಕಿಸಿದಾಗ ಗ್ರಾಪಂಗಳ ಎನ್​ಒಸಿ ಕೋರಿ ಯಾವುದೇ ಪತ್ರ ಬರೆದಿಲ್ಲ ಎಂಬುದನ್ನು ಸ್ಪಷ್ಟಪಡಿಸಿದ್ದಾರೆ. ಇನ್ನೂ ಜಿಪಂ ಸಿಇಒ ಜಿ.ಪ್ರಭು ಅವರು ಅಂತಹ ಯಾವುದೇ ಪತ್ರ ಜಿಪಂಗೆ ಬಂದಿಲ್ಲ ಎಂದಿದ್ದಾರೆ. ಇಂತಹ ನಕಲಿ ಆದೇಶದ ಪತ್ರ ಸೃಷ್ಟಿಸಿ ಸಾಮಾಜಿಕ ಜಾಲತಾಣಗಳನ್ನು ಹರಿಯಬಿಡುತ್ತಿರುವರ ವಿರುದ್ಧ ಎ್​ಐಆರ್​ ಮಾಡಿಸುವ ಎಚ್ಚರಿಕೆ ನೀಡಿದ್ದಾರೆ.

ಸಾಮಾಜಿಕ, ಆರ್ಥಿಕ ಸ್ಥಿತಿಗತಿ ಮಾಹಿತಿಗೆ ಪತ್ರ

ಮಹಾನಗರ ಪಾಲಿಕೆ ಗಡಿ ವಿಸ್ತರಣೆ ಚರ್ಚೆ ಮುನ್ನೆಲೆಗೆ ಬಂದಿದೆ. ಈ ಹಿನ್ನೆಲೆಯಲ್ಲಿ ಪಾಲಿಕೆ ಸುತ್ತಮುತ್ತಲಿನ ಪ್ರದೇಶಗಳ ಸಾಮಾಜಿಕ, ಆರ್ಥಿಕ ಸ್ಥಿತಿಗತಿ ಸೇರಿದಂತೆ ಜನಸಂಖ್ಯೆ ಮಾಹಿತಿಯನ್ನು ಕಲೆಹಾಕುತ್ತಿದೆ. ಹಾಗಾಗಿ, ನಗರಕ್ಕೆ ಹೊಂದಿಕೊಂಡಿರುವ ಹೊರವಲಯದ ಗ್ರಾಪಂಗಳ ಸಾಮಾಜಿಕ, ಆರ್ಥಿಕ ಸ್ಥಿತಿಗತಿ ಹಾಗೂ ಜನಸಂಖ್ಯೆ ಮಾಹಿತಿ ನೀಡಲು ಕೋರಿ ಜಿಲ್ಲಾ ಪಂಚಾಯಿತಿಗೆ ಪತ್ರ ಬರೆಯಲಾಗಿದೆ ಹೊರತು ಎನ್​ಒಸಿ ಕೋರಿ ಯಾವುದೇ ಪತ್ರ ಬರೆದಿಲ್ಲ ಎಂದು ಪಾಲಿಕೆ ಆಯುಕ್ತೆ ಬಿ.ವಿ.ಅಶ್ವಿಜ ಸ್ಪಷ್ಟಪಡಿಸಿದ್ದಾರೆ.

10 ತಿಂಗಳಾದರು ಪಾಲಿಕೆ ಚುನಾವಣೆ ಸದ್ದಿಲ್ಲ !

ಆಗಸ್ಟ್​ 31, 2018ರಲ್ಲಿ ಪಾಲಿಕೆಗೆ ಚುನಾವಣೆ ನಡೆದಿದ್ದು ಸೆ.3ಕ್ಕೆ ಫಲಿತಾಂಶ ಹೊರಬಿದ್ದಿತ್ತು. ಮೊದಲ ಅವಧಿಯ ಮೇಯರ್​, ಉಪಮೇಯರ್​ ಸ್ಥಾನದ ಚುನಾವಣಾ ಮೀಸಲು ನಿಗದಿ ತಡವಾಗಿದ್ದರಿಂದ 2019, ಜ.30ರಂದೇ ನೂತನ ಮೇಯರ್​, ಉಪಮೇಯರ್​ ಆಯ್ಕೆಯೊಂದಿಗೆ ಹೊಸ ಚುನಾಯಿತ ಮಂಡಳಿ ಅಸ್ತಿತ್ವಕ್ಕೆ ಬಂದಿತ್ತು. ಜ.30, 2019ರಂದು ಅಸ್ತಿತ್ವಕ್ಕೆ ಬಂದಿದ್ದ ಚುನಾಯಿತ ಮಂಡಳಿಯ ಆಡಳಿತವು ಜ.29, 2024ಕ್ಕೆ ಅಂತ್ಯಗೊಳ್ಳುವುದರೊಂದಿಗೆ ಕಾಪೋರ್ರೇಟರ್​ಗಳು ಮಾಜಿಗಳಾದರು. ಪಾಲಿಕೆ ಅವಧಿ ಅಂತ್ಯಗೊಂಡು 10 ತಿಂಗಳಾದರು ಈವರೆಗೆ ಸರ್ಕಾರವು ಚುನಾವಣೆ ನಡೆಸುವ ಬಗ್ಗೆ ಚಿಂತನೆ ನಡೆಸಿಲ್ಲ. ಈಗ ಗಡಿ ವಿಸ್ತರಣೆ ನೆಪ ಮುಂದಿಟ್ಟುಕೊಂಡು ಚುನಾವಣೆಯನ್ನು ಮತ್ತಷ್ಟು ಕಾಲ ಮುಂದೂಡುವ ಸಾಧ್ಯತೆಗಳು ಹೆಚ್ಚಿವೆ.