ನೇತ್ರದಾನ ಜಾಗೃತಿ ಜಾಥಾ

ಕೊಪ್ಪಳ: ರಾಷ್ಟ್ರೀಯ ನೇತ್ರದಾನ ಪಾಕ ಅಂಗವಾಗಿ ಎಂಎಂ ಜೋಶಿ ಆಸ್ಪತ್ರೆಯಿಂದ ಸೋಮವಾರ ನಗರದಲ್ಲಿ ಜಾಗೃತಿ ಜಾಥಾ ನಡೆಸಲಾಯಿತು.

ಗವಿಮಠದ ಅಭಿನವ ಗವಿಸಿದ್ದೇಶ್ವರ ಸ್ವಾಮೀಜಿ, ಯಾರ್​ಬಿ ಡೆಪ್ಯೂಟಿ ಕಮಾಂಡೆಂಟ್​, ಮುಖಂಡ ಶಾಂತಣ್ಣ ಮುದಗಲ್​ ಜಾಥಾಗೆ ಚಾಲನೆ ನೀಡಿದರು.

ರೆಡ್​ಕ್ರಾಸ್​, ಇನ್ನರ್​ ವ್ಹೀಲ್​ ಕ್ಲಬ್​, ಅರೆ ವೈದ್ಯಕಿಯ ಕಾಲೇಜು ವಿದ್ಯಾರ್ಥಿಗಳು ಹಾಗೂ ವಿವಿಧ ಆಂಗ್ಲ ಮಾಧ್ಯಮ ಶಾಲಾ ಮಕ್ಕಳು ಜಾಥಾದಲ್ಲಿ ಭಾಗಿಯಾದರು. ಗವಿಮಠದಿಂದ ಎಂಎಂ ಜೋಶಿ ಆಸ್ಪತ್ರೆವರೆಗೆ ಜಾಥಾ ಸಾಗಿತು. ನೇತ್ರದಾನ ಕುರಿತು ಘೋಷಣೆ ಕೂಗಿ ಅರಿವು ಮೂಡಿಸಲಾಯಿತು. ಎಸ್​ಜಿಎಂ ನೇತ್ರ ಭಂಡಾರ ನಿರ್ದೇಶಕ ಡಾ.ಅನಿಕೇತ ಶಾಸ್ತ್ರಿ ಮಾತನಾಡಿ, ಕೊಪ್ಪಳದ ಎಂಎಂ ಜೋಶಿ ಆಸ್ಪತ್ರೆಯಲ್ಲಿ ರೆಡ್​ಕ್ರಾಸ್​ ಸಹಯೋಗದೊಂದಿಗೆ 24*7 ಲಭ್ಯವಾಗುವಂತೆ ನೇತ್ರ ಸಂಗ್ರಹಣಾ ಕೇಂದ್ರ ತೆರೆಯಲಾಗಿದೆ ಎಂದರು.

ಸಿಇಒ ಕುತುದ್ದೀನ್​ ಮುಲ್ಲಾ, ಎಂಎಂ ಜೋಶಿ ಕೊಪ್ಪಳ ಶಾಖೆ ತಜ್ಞ ಡಾ.ವಿಕಾಸ ಐಲಿ, ಡಾ.ವಾಗೀಶ ತೆಗ್ಗಿನಕೇರಿ, ಜಿಲ್ಲಾ ಅಂಧತ್ವ ನಿವಾರಣ ಸಂಸ್ಥೆಯ ಡಾ.ಪ್ರಕಾಶ ಎಚ್​. ಇತರರು ಭಾಗಿಯಾದರು.