ಮಂಜುನಾಥ ಅಂಗಡಿ ಧಾರವಾಡ
`ರೋಹಿಣಿ ಮಳೆಯಾದರೆ ಓಣಿ ತುಂಬ ಕಾಳು' ಎಂಬ ಮಾತು ಹಳ್ಳಿಗಳಲ್ಲಿ ಜನಜನಿತ. ಅಂದರೆ ರೈತರು ಮುಂಗಾರು ಹಂಗಾಮು ಆರಂಭಕ್ಕೆ ಭೂಮಿ ಹಸಿಯಾಗಲು, ತೇವಾಂಶ ಹಿಡಿದಿಟ್ಟುಕೊಳ್ಳಲು ಹಾಗೂ ಬಿತ್ತನೆಗೆ ರೋಹಿಣಿ ಮಳೆ ಅತ್ಯಂತ ಪ್ರಯೋಜನಕಾರಿ. ಆದರೆ, ಈ ಬಾರಿ ರೋಹಿಣಿ ಕೈ ಕೊಟ್ಟ ಕಾರಣ ರೈತರು ಮೃಗಶಿರ (ಮಿರಗ) ಮಳೆಯ ಮೇಲೆ ನಿರೀಕ್ಷೆ ಇಟ್ಟುಕೊಂಡಿದ್ದಾರೆ.
ಶೇAಗಾ, ಸೋಯಾಬಿನ್, ಹೆಸರು, ಉದ್ದು, ಗೋವಿನಜೋಳ, ಭತ್ತ, ಹತ್ತಿ, ಆಲೂಗಡ್ಡೆ ಜಿಲ್ಲೆಯ ಮುಂಗಾರು ಹಂಗಾಮಿನ ಪ್ರಮುಖ ಬೆಳೆಗಳು. ಕೃಷಿ ಇಲಾಖೆಯ ಅಂಕಿ- ಸಂಖ್ಯೆಯ ಅನ್ವಯ ಈ ಬಾರಿ ಜಿಲ್ಲೆಯಲ್ಲಿ ೨.೭೩ ಲಕ್ಷ ಹೆಕ್ಟೇರ್ ಬಿತ್ತನೆ ಗುರಿ ಹೊಂದಲಾಗಿದೆ. ಇಲಾಖೆಯಿಂದ ರೈತರಿಗೆ ಅನುಕೂಲವಾಗುವಂತೆ ರೈತ ಸಂಪರ್ಕ ಕೇಂದ್ರಗಳಲ್ಲಿ ಅಗತ್ಯ ಬಿತ್ತನೆ ಬೀಜ ಹಾಗೂ ರಸಗೊಬ್ಬರ ದಾಸ್ತಾನು ಮಾಡಿಕೊಳ್ಳಲಾಗಿದೆ. ಕಡಿಮೆ ಖರ್ಚಿನ ಬೆಳೆ ಎನ್ನಲಾಗಿರುವ ಸೋಯಾಬಿನ್ ಹೆಚ್ಚು ಬಿತ್ತನೆಯಾಗುವ ನಿರೀಕ್ಷೆ ಇದೆ. ಹೀಗಾಗಿ ಕೃಷಿ ಇಲಾಖೆ ೧೫,೦೦೦ ಕ್ವಿಂಟಲ್ ಸೋಯಾಬಿನ್ ಬೀಜ ದಾಸ್ತಾನು ಮಾಡಿಕೊಂಡಿದೆ. ೧,೬೦೦ ಕ್ವಿಂಟಲ್ ಹೆಸರು, ೨,೦೦೦ ಕ್ವಿಂಟಲ್ ಮೆಕ್ಕೆಜೋಳ, ೫೦೦ ಕ್ವಿಂಟಲ್ ಉದ್ದು ಬೀಜ ಸೇರಿ ವಿವಿಧ ಬೆಳೆಗಳ ಅಂದಾಜು ೨೦,೦೦೦ ಕ್ವಿಂಟಲ್ ಬಿತ್ತನೆ ಬೀಜ ಹಾಗೂ ೩೫,೬೯೬ ಟನ್ ರಸಗೊಬ್ಬರ ದಾಸ್ತಾನಿದೆ.
ಕೆಲ ರೈತರು ಈಗಾಗಲೇ ಬಿತ್ತನೆಗೆ ಬೀಜ ಹಾಗೂ ರಸಗೊಬ್ಬರ ದಾಸ್ತಾನು ಮಾಡಿಕೊಂಡಿದ್ದಾರೆ. ಮೇ ಅಂತ್ಯಕ್ಕೆ ಜಮೀನು ಹದಗೊಳಿಸುವ ಕಾರ್ಯ ಮಾಡಿದ್ದಾರೆ. ಆದರೆ, ರೋಹಿಣಿ ಮಳೆ ಭೂಮಿಯನ್ನು ಹದಗೊಳಿಸುವಷ್ಟು ಪ್ರಮಾಣ ಆಗಿಲ್ಲ. ಅಲ್ಲದೆ, ಭೂಮಿ ತೇವಾಂಶ ಹಿಡಿದಿಟ್ಟುಕೊಂಡಿಲ್ಲ. ಹೀಗಾಗಿ ಬಿತ್ತನೆಗೆ ಸಮರ್ಪಕ ಮಳೆಯಾಗಿಲ್ಲ. ರೋಹಿಣಿ ಮಳೆಯ ಅವಽ ಜೂ. ೮ರವರೆಗೆ ಇದ್ದು, ನಂತರ ಮೃಗಶಿರ ಮಳೆಯ ಆಗಮನವಾಗಲಿದೆ. ಅದು ೧೫ ದಿನ ಇರಲಿದ್ದು, ಭೂಮಿ ಹಸಿಯಾಗಲು ಹಾಗೂ ಬಿತ್ತನೆಗೆ ಪೂರಕ ಮಳೆಯಾಗಲಿ ಎಂದು ರೈತರು ನಿರೀಕ್ಷಿಸುತ್ತಿದ್ದಾರೆ.
