ಜೆಸಿಎಂ ಭೇಟಿ ನೆಪದಲ್ಲಿ ಕೈ ಅಭ್ಯರ್ಥಿ ಎಸ್ಪಿಎಂ ಉರುಳಿಸಿದ ದಾಳ !

ತುಮಕೂರು: ಲೋಕ ಸಮರ ಜಿದ್ದಾಜಿದ್ದಿನ ಅಖಾಡದಲ್ಲಿ ಕಾಂಗ್ರೆಸ್ ಹೊಸ ದಾಳ ಉರುಳಿಸಿದೆ. ಬಿಜೆಪಿ ಅಭ್ಯರ್ಥಿ ವಿ.ಸೋಮಣ್ಣ ವಿರುದ್ಧ ಮುನಿಸಿಕೊಂಡಿರುವ ಮಾಜಿ ಸಚಿವ ಜೆ.ಸಿ.ಮಾಧುಸ್ವಾಮಿ ಅವರನ್ನು ‘ಕೈ’ ಅಭ್ಯರ್ಥಿ ಎಸ್.ಪಿ.ಮುದ್ದಹನುಮೇಗೌಡ ಭಾನುವಾರ ಭೇಟಿ ಮಾಡಿ ಚುನಾವಣೆಯಲ್ಲಿ ಬೆಂಬಲಿಸುವಂತೆ ಸಹಕಾರಿ ಕೋರಿದ್ದಾರೆ. ಇದೊಂದು ಸೌಜನ್ಯದ ಭೇಟಿ ಇದಕ್ಕೆ ವಿಶೇಷ ಅರ್ಥ ಕಲ್ಪಿಸುವ ಬೇಡ. ಅಭ್ಯರ್ಥಿ ಆದವರು ಬೆಂಬಲ ಕೋರುವುದು ಸಹಜ. ನಾವು ಬೇರೆ ಪಕ್ಷದಲ್ಲಿರುವುದರಿಂದ ಅವರನ್ನು ಬೆಂಬಲಿಸಕ್ಕೆ ಸಾಧ್ಯವಾ ಎಂಬ ವಾದವನ್ನು ಮಾಧುಸ್ವಾಮಿ ಮುಂದಿಟ್ಟಿದ್ದಾರೆ.

ಚಿಕ್ಕನಾಯಕನಹಳ್ಳಿ ತಾಲೂಕಿನ ಜೆ.ಸಿ.ಪುರದಲ್ಲಿರುವ ಮಾಧುಸ್ವಾಮಿ ನಿವಾಸಕ್ಕೆ ಭೇಟಿ ನೀಡಿದ ಮುದ್ದಹನುಮೇಗೌಡ ಚುನಾವಣೆಯಲ್ಲಿ ಬೆಂಬಲಿಸುವಂತೆ ಸಹಕಾರ ಕೋರುವ ಮೂಲಕ ಬಿಜೆಪಿಯಲ್ಲಿನ ಬಂಡಾಯದ ಲಾಭ ಪಡೆಯುವ ನಿಟ್ಟಿನಲ್ಲಿ ಮೊದಲ ಹೆಜ್ಜೆ ಇಟ್ಟಿದ್ದಾರೆ. ಮನೆಗೆ ಬಂದ ಅತಿಥಿಯನ್ನು ಸೌಜನ್ಯಯುತವಾಗಿ ಬರಮಾಡಿಕೊಂಡ ಮಾಧುಸ್ವಾಮಿ ಪರಸ್ಪರ ಕುಶಲೋಪರಿ ವಿಚಾರಿಸಿಕೊಂಡರು.

ಸೀನಿಯರ್ ಮೋಸ್ಟ್ ಲೀಡರ್ !: ಹೂಗುಚ್ಛ ನೀಡಲು ಬಂದ ಮುದ್ದಹನುಮೇಗೌಡರಿಗೆ ನಯವಾಗೇ ಇದೆಲ್ಲಾ ನನಗೇಕೆ ತಂದಿದ್ದೀರಾ ಎಂದ ಮಾಧುಸ್ವಾಮಿ ಅವರನ್ನು ಕುರಿತು ‘ಒಂದು ಮಾತು ಹೇಳಲಾ ಸಾರ್... ನೀವು ‘ರಾಜ್ಯದ ಹಿರಿಯ ನಾಯಕರಲ್ಲೊಬ್ಬರು’ (ಸೀನಿಯರ್ ಮೋಸ್ಟ್ ಲೀಡರ್), ಇದರಲ್ಲಿ ಗೌರವ ತೋರುವ ಉದ್ದೇಶವಷ್ಟೇ ಇದೆ. ಬೇರೆ ಇನ್ನೇನು ನಿಮ್ಮ ಬಳಿ ಬಯಸುವುದಿಲ್ಲ ಎನ್ನುವ ಸ್ಪಷ್ಟನೆ ಕೊಟ್ಟರು. ಈ ವೇಳೆ ಬಿಜೆಪಿ ಮಂಡಲ ಅಧ್ಯಕ್ಷ ಕೇಶವಮೂರ್ತಿ, ಬರಕನಾಳು ವಿಶ್ವನಾಥ್, ಸಿದ್ದಲಿಂಗ ಸ್ವಾಮಿ, ರವಿ ಮತ್ತಿತರರು ಇದ್ದರು.