ಕೊಡಗಿನ ಅರಣ್ಯದಲ್ಲಿ ಎಷ್ಟು ಪ್ರಮಾಣದಲ್ಲಿ ಆನೆಗಳು ಇವೆಯೋ ಅಂದಾಜು ಅಷ್ಟೇ ಪ್ರಮಾಣದಲ್ಲಿ ಕಾಫಿ ತೋಟಗಳಲ್ಲಿಯೂ ಆನೆಗಳು ವಾಸವಾಗಿವೆ ಎನ್ನಲಾಗುತ್ತಿದೆ. ಮಳೆ ಕಡಿಮೆಯಾಗಿ ಆನೆಗಳಿಗೆ ಕಾಡಿನೊಳಗೆ ಆಹಾರ ಮತ್ತು ನೀರಿನ ಅಭಾವ ಇರುವ ಕಾರಣದಿಂದ ಆನೆಗಳು ಕಾಫಿ ತೋಟದ ಕಡೆಗೆ ಆಕರ್ಷಿತವಾಗುತ್ತಿವೆ. ಒಮ್ಮೆ ಎಸ್ಟೇಟ್ಗಳಲ್ಲಿ ಸಿಗುವ ಆಹಾರದ ರುಚಿ ನೋಡಿದರೆ ಇವುಗಳು ಮತ್ತೆ ಕಾಡಿನ ಕಡೆಗೆ ಮರಳುವ ಮನಸ್ಸು ಮಾಡುವುದಿಲ್ಲ. ಎಸ್ಟೇಟ್ಗಳಲ್ಲಿ ಋತುಗಳಿಗೆ ಅನುಗುಣವಾಗಿ ಹಲಸಿನಹಣ್ಣು, ಬಾಳೆ ಹಣ್ಣು, ಬಾಳೆ ಗಿಡ, ಬಿದಿರು, ಕಬ್ಬು, ಹುಲ್ಲು ಹೀಗೆ ವೈವಿಧ್ಯಮಯ ಆಹಾರಗಳು ಸಿಗುತ್ತದೆ. ತೋಟದೊಳಗಿನ ಕೆರೆಗಳಲ್ಲಿ ಯಥೇಚ್ಛ ನೀರು ಕೂಡ ಲಭ್ಯವಿರುತ್ತದೆ. ಹಾಗಾಗಿ ಕಾಡಾನೆಗಳು ಎಸ್ಟೇಟ್ ಆನೆಗಳಾಗಿ ಪರಿವರ್ತನೆ ಆಗುತ್ತಿವೆ.
