ಹಸಿರು ಇಂಧನ ಉತ್ಪಾದನೆಗೆ ಆದ್ಯತೆ: ಸಚಿವ ಕೆ.ಜೆ. ಜಾರ್ಜ್​

ಉಡುಪಿ: ಪ್ರಸಕ್ತ ವರ್ಷ ಮಳೆ ಕಡಿಮೆಯಾಗಿದ್ದು, ಬೇಡಿಕೆಯಷ್ಟು ವಿದ್ಯುತ್​ ಉತ್ಪಾದನೆ ಸಾಧ್ಯವಾಗಿಲ್ಲ. ಆದರೆ, ವಿದ್ಯುತ್​ನ ಕೊರತೆ ಆಗಿಲ್ಲ. ಆದರೂ ಮುಂದೆ ವಿದ್ಯುತ್​ ಕೊರತೆ ಆಗುವ ಸಾದ್ಯತೆ ಇರುವುದರಿಂದ ಹಸಿರು ಇಂಧನ ಉತ್ಪಾದನೆ ಮಾಡಲು ಸರ್ಕಾರ ಚಿಂತನೆ ನಡೆಸಿದೆ.ವಿದ್ಯುತ್​ ಕೊರತೆ ನೀಗಿಸಲು ಪ್ರಸಕ್ತವಾಗಿ ಉತ್ತರ ಪ್ರದೇಶ ಹಾಗೂ ಪಂಜಾಬ್​ ರಾಜ್ಯದೊಂದಿಗೆ ಒಪ್ಪಂದದ ಮೂಲಕ ವಿದ್ಯುತ್​ ಪಡೆಯಲಾಗುತ್ತಿದೆ. ಕೇಂದ್ರ ಸರ್ಕಾರದಿಂದಲೂ ವಿದ್ಯುತ್​ ಪಡೆಯುತ್ತಿದ್ದೇವೆ. ಸದ್ಯ ವಿದ್ಯುತ್​ ಕೊರತೆ ಇಲ್ಲ ಎಂದು ಇಂಧನ ಸಚಿವ ಕೆ.ಜೆ. ಜಾರ್ಜ್​ ಮಾಹಿತಿ ನೀಡಿದರು.

ಉಡುಪಿಯಲ್ಲಿ ಮಂಗಳವಾರ ಮಾಧ್ಯಮದವರೊಂದಿಗೆ ಮಾತನಾಡಿ, ಬೃಹತ್​ ಪ್ರಮಾಣದಲ್ಲಿ ಗ್ರೀನ್​ ಹೈಡ್ರೋಜನ್​ ಎಂಬ ವಿನೂತನ ಮಾದರಿಯ ವಿದ್ಯುತ್​ ಉತ್ಪಾದನೆಗೆ ಕ್ರಮ ಕೈಗೊಳ್ಳಲಿದ್ದೇವೆ. ಅದರಂತೆ ಸೋಲಾರ್​, ವಿಂಡ್​ ಪವರ್​ ಉತ್ಪಾದನೆಗೆ ಆದ್ಯತೆ ನೀಡಿ, ಯೋಜನೆ ಜಾರಿಗೊಳಿಸಲಾಗುತ್ತದೆ. ಹೈಡ್ರೋಜನ್​ಗೆ ಅಮೋನಿಯಂ ಬೆರೆಸಿ ವಿದ್ಯುತ್​ ಉತ್ಪಾದಿಸಿ ಅದನ್ನು ಬ್ಯಾಗ್​ಗಳಲ್ಲಿ ಸಂಗ್ರಹಿಸಿ ಇಡಬಹುದಾದ ವಿಶೇಷ ಪ್ರಕಾರದ ವಿದ್ಯುತ್​ ಇದಾಗಿದೆ ಎಂದರು.

ಪಂಪ್​ ಸ್ಟೋರೇಜ್​
ವಿದ್ಯುತ್​ ಉತ್ಪಾದನೆಯಲ್ಲಿ ಇನ್ನಷ್ಟು ಹೊಸ ಕ್ರಮ ಅಳವಡಿಸಿಕೊಳ್ಳಲಾಗುತ್ತಿದೆ. ಇದರಲ್ಲಿ ಪಂಪ್​ ಸ್ಟೋರೇಜ್​ ಎಂಬ ಹೊಸ ವಿಧಾನದ ಮೂಲಕ ವಿದ್ಯುತ್​ ಉತ್ಪಾದನೆಗೆ ಬಳಕೆಯಾಗಿ ಹೊರಹೋಗುವ ನೀರನ್ನು ಮತ್ತೆ ಸಂಗ್ರಹಿಸಿ ಅದರಿಂದ ವಿದ್ಯುತ್​ ಉತ್ಪಾದಿಸುವ ಪ್ರಕ್ರಿಯೆ ಇದಾಗಿದೆ. ಅತ್ಯಂತ ಹೆಚ್ಚು ವಿದ್ಯುತ್​ ಬೇಡಿಕೆ ಇರುವ ಸಂದರ್ಭದಲ್ಲಿ ಪಂಪ್​ ಸ್ಟೊರೇಜ್​ ಮೂಲಕ ವಿದ್ಯುತ್​ ಉತ್ಪಾದಿಸಲಾಗುವುದು ಎಂದರು.

ಥರ್ಮಲ್​ ವಿದ್ಯುತ್​
ರಾಜ್ಯದಲ್ಲಿರುವ ಥರ್ಮಲ್​ ಸ್ಥಾವರಗಳಿಂದ 4000 ಮೆ.ವ್ಯಾ. ವಿದ್ಯುತ್​ ಉತ್ಪಾದಿಸುವ ಗುರಿ ಹೊಂದಿದ್ದೇವೆ. ಇದಲ್ಲದೆ, ಕಲ್ಲಿದ್ದಲು ವಿದ್ಯುತ್​ ಉತ್ಪಾದನೆಯನ್ನೂ ಮಾಡಲು ಯೋಜಿಸಿದ್ದು, ಇದರಲ್ಲಿ ಶೇ.45ರಷ್ಟು ಬೂದಿ ಉಳಿಕೆ ಆಗುತ್ತದೆ. ಬಳಿಕ ಆ ಬೂದಿಯನ್ನು ಬೇರೆಡೆ ಸಾಗಿಸುವುದಕ್ಕೆ ಹೆಚ್ಚಿನ ವೆಚ್ಚ ಆಗಲಿದೆ. ಹೀಗಾಗಿ ಸೋಲಾರ್​, ಹೈಡ್ರೋಜನ್​, ಹಾಗೂ ವಿಂಡ್​ ಪವರ್​ಗೆ ಹೆಚ್ಚಿನ ಆದ್ಯತೆ ನೀಡಲಿದ್ದೇವೆ ಎಂದರು.

10 ಯುನಿಟ್​ ಹೆಚ್ಚಳ
ರಾಜ್ಯದಲ್ಲಿ 70 ಲಕ್ಷದಷ್ಟು ಭಾಗ್ಯಜ್ಯೋತಿ ಗ್ರಾಹಕರಿದ್ದು, ಅವರಿಗೂ ಈ ಹಿಂದೆಯೇ ಉಚಿತ ವಿದ್ಯುತ್​ ನೀಡಲಾಗುತ್ತಿದೆ. ಅವರಿಗೆ 48 ಯುನಿಟ್​ ವಿದ್ಯುತ್​ ಉಚಿತ ಇದೆ. ನಿಗದಿತ ಯುನಿಟ್​ಗಿಂತ ಕೆಲವರು ಕಡಿಮೆ ಬಳಕೆ ಮಾಡುತ್ತಿದ್ದು, ಅವರಿಗೂ ಉಚಿತ ವಿದ್ಯುತ್​ ಯೋಜನೆಯ ಲಾಭ ಸಿಗುವಂತಾಗಲು 10 ಯುನಿಟ್​ ಹೆಚ್ಚಳ ಮಾಡಲಾಗುವುದು ಎಂದರು.

ಪವರ್​ಮನ್​ಗಳಿಗೆ ತರಬೇತಿ:
ರಾಜ್ಯದಲ್ಲಿ ಪವರ್​ಮನ್​ಗಳ ಕೊರತೆ ಇದೆ. ಕೊರತೆ ಹೇಗಾಗಿದೆ ಎಂದರೆ, ಜಿಲ್ಲೆಯಲ್ಲಿ ಕೆಲಸ ಮಾಡುತ್ತಿರುವ ಪವರ್​ಮನ್​ಗಳೆಲ್ಲರೂ ಅನ್ಯ ಜಿಲ್ಲೆಯವರು. ಮೂರು ವರ್ಷ ಪ್ರೊಬೆಷನರಿ ಅವಧಿ ಮುಗಿದ ಬಳಿಕ ಅವರು ಒತ್ತಡ ಹಾಕಿ ತಮ್ಮ ಜಿಲ್ಲೆಗೆ ವರ್ಗಾವಣೆ ಮಾಡಿಸಿಕೊಳ್ಳುತ್ತಿದ್ದಾರೆ. ಇದರಿಂದ ಕೆಲ ಜಿಲ್ಲೆಗಳಲ್ಲಿ ಕೊರತೆ ಆಗಿದೆ. ಹೀಗಾಗಿ 6 ಸಾವಿರ ಪವರ್​ಮನ್​ಗಳನ್ನು ನೇಮಿಸಲಿದ್ದು, ಪ್ರಥಮ ಹಂತದಲ್ಲಿ 3 ಸಾವಿರ ಜನರನ್ನು ನೇಮಿಸಿಕೊಳ್ಳಲಾಗುವುದು. ಇದಕ್ಕಾಗಿಯೇ ರಾಜ್ಯಾದ್ಯಂತ ಒಂದು ದಿನ ನಿಗದಿ ಮಾಡಿ ಪವರ್​ಮನ್​ಗಳಿಗೆ ಕೌಶಲ ತರಬೇತಿ ನೀಡಲಿದ್ದೇವೆ. ಇದಕ್ಕೆ ಬೇಕಾದ ಎಲ್ಲ ಸಿದ್ಧತೆ ಮಾಡಿಕೊಂಡು, ಲೋಕಸಭಾ ಚುನಾವಣೆಯ ಬಳಿಕ ಈ ಕಾರ್ಯ ಮಾಡಲಿದ್ದೇವೆ. ಇದರಿಂದ ಸ್ಥಳಿಯ ಜನರೇ ಪವರ್​ಮನ್​ಗಳಾಗಲು ಅನುಕೂಲ ಆಗಲಿದೆ ಎಂದು ಸಚಿವ ಜಾರ್ಜ್​ ತಿಳಿಸಿದರು.

ಮಂಗಳೂರಿನಲ್ಲಿ ಬೃಹತ್​ ಸೋಲಾರ್​ ಸ್ಟೇಶನ್​
ಕರಾವಳಿ ಪ್ರದೇಶದಲ್ಲಿ ಬೆಳಗ್ಗೆಯಿಂದ ಸಂಜೆಯವರೆಗೆ ಬಿಸಿಲು ಲಭ್ಯ ಇರುವುದರಿಂದ ಮಂಗಳೂರಿನಲ್ಲಿ ಖಾಸಗಿ ಸಹಭಾಗಿತ್ವದಲ್ಲಿ ಬೃಹತ್​ ಸೋಲಾರ್​ ಸ್ಟೇಷನ್​ ಸ್ಥಾಪಿಸಲು ಯೋಜಿಸಲಾಗಿದೆ. ಅನೇಕ ಕಂಪನಿಗಳು ಮುಂದೆ ಬಂದಿದ್ದು, ಕರಾರಿನೊಂದಿಗೆ ಆರಂಭಿಸಲಾಗುವುದು. ಸೋಲಾರ್​ ವಿದ್ಯುತ್​ ಉತ್ಪಾದನೆ ಸಮುದ್ರದ ನೀರಿನ ಬಳಕೆಯನ್ನೂ ಮಾಡಬೇಕಿದ್ದರಿಂದ ಮಂಗಳೂರಿನಲ್ಲಿಯೇ ಆರಂಭಿಸಲಾಗುವುದು. ಈ ಯೋಜನೆಗೆ ಸುಮಾರು 30 ಸಾವಿರ ಕೋಟಿ ರೂಪಾಯಿಗೂ ಅಧಿಕ ಬಜೆಟ್​ ಬೇಕಾಗುತ್ತದೆ. ಇನ್ನೊಂದು ಸಮಸ್ಯೆ ಏನೆಂದರೆ, ಈ ಸೋಲಾರ್​ ಸ್ಟೇಷನ್​ ಕಾರ್ಯಾಚರಿಸಲು 5 ಸಾವಿರ ಮೆ.ವ್ಯಾ. ವಿದ್ಯುತ್​ ಬೇಕಾಗುತ್ತದೆ. ಹೀಗಾಗಿ ಅದಕ್ಕೊಂದು ಪರ್ಯಾಯ ವ್ಯವಸ್ಥೆ ಮಾಡಿಕೊಳ್ಳಬೇಕಿದೆ. ಪಾವಗಡದಲ್ಲೂ ಸೋಲಾರ್​ನ ಪೈಲೆಟ್​ ಪ್ರೊಜೆಕ್ಟ್​ ಮಾಡಲಾಗುವುದು ಎಂದು ಸಚಿವ ಜಾರ್ಜ್​ ತಿಳಿಸಿದರು.