ತಿಪ್ಪೆಗುಂಡಿಯಾದ ಖಾಲಿ ಸೈಟ್..!

ನರೇಗಲ್ಲ: ಪಟ್ಟಣದ ಎಲ್ಲ ವಾರ್ಡ್‌ಗಳಲ್ಲಿನ ಖಾಲಿ ನಿವೇಶನಗಳು ಕಸದ ತೊಟ್ಟಿಯಾಗಿವೆ. ಮನೆಗಳ ತ್ಯಾಜ್ಯ ಅಲ್ಲಿ ಸಂಗ್ರಹವಾಗುತ್ತಿದೆ. ಮಾಲೀಕರಿಗೆ ನಿವೇಶನ ಆಸ್ತಿಯಾದರೆ, ಪಕ್ಕದ ಮನೆಯವರಿಗೆ ಅದು ತಿಪ್ಪೆಗುಂಡಿಯಂತಾಗಿದೆ. ಪಟ್ಟಣದ ಸೌಂದರ್ಯೀಕರಣ ಕಾಪಾಡುವುದು ಪಟ್ಟಣ ಪಂಚಾಯಿತಿಯ ಜವಾಬ್ದಾರಿಯಾಗಿದೆ. ಆದರೆ ಖಾಲಿ ನಿವೇಶನಗಳಲ್ಲಿನ ತ್ಯಾಜ್ಯದ ನಿರ್ವಹಣೆಯೇ ಪ.ಪಂಗೆ ಸವಾಲಾಗಿವೆ.

ನರೇಗಲ್ಲ ಪಟ್ಟಣ ಪಂಚಾಯಿತಿ ವ್ಯಾಪ್ತಿಯ ಕೋಡಿಕೊಪ್ಪ, ಕೋಚಲಾಪುರ, ದ್ಯಾಂಪೂರ, ಮಲ್ಲಾಪುರ ಗ್ರಾಮಗಳಲ್ಲಿ ಒಟ್ಟು 1,484 ಖಾಲಿ ನಿವೇಶನಗಳಿವೆ. ಆ ನಿವೇಶನಗಳಲ್ಲಿ ಜಾಲಿ ಕಂಟಿ ಬೆಳೆದು ಹಂದಿಗಳ ಆಶ್ರಯ ತಾಣವಾಗಿದೆ. ನಿವೇಶನ ಖರೀದಿಸಿದ ನಂತರ ಮಾಲೀಕರು ತಿರುಗಿಯೂ ನೋಡುವುದಿಲ್ಲ. ಇದರಿಂದಾಗಿ ಖಾಲಿ ನಿವೇಶನಗಳು ಕಸ ಸಂಗ್ರಹದ ತಾಣವಾಗಿವೆ.

ಪಪಂ ಅಧಿಕಾರಿಗಳ ನಿರ್ಲಕ್ಷೃ: ಖಾಲಿ ನಿವೇಶನಗಳ ನಿರ್ವಹಣೆಗೆ ನಿಯಮಗಳಿವೆ. ಅವುಗಳ ಪ್ರಕಾರ ಖಾಲಿ ನಿವೇಶನದ ಮಾಲೀಕರು ನಿವೇಶನವನ್ನು ಸ್ವಚ್ಛವಾಗಿಡಬೇಕು. ಇಲ್ಲದಿದ್ದರೆ, ಸ್ಥಳೀಯ ಸಂಸ್ಥೆಯವರು ನಿವೇಶನದ ಮಾಲೀಕರಿಗೆ ನೋಟಿಸ್ ನೀಡಬೇಕು.

ಆದರೆ, ಪಟ್ಟಣ ಪಂಚಾಯಿತಿಯಿಂದ ಈವರೆಗೆ ಯಾರಿಗೂ ನೋಟಿಸ್ ನೀಡಿಲ್ಲ. ನೋಟಿಸ್‌ಗೆ ನಿವೇಶನದ ಮಾಲೀಕರು ಸ್ಪಂದಿಸದಿದ್ದರೆ ಅಂತಹ ಖಾಲಿ ನಿವೇಶನದಲ್ಲಿನ ಕಸವನ್ನು ಸ್ಥಳೀಯ ಸಂಸ್ಥೆಯವರು ಸ್ವಚ್ಛಗೊಳಿಸಿ, ಅದಕ್ಕೆ ತಗುಲುವ ವೆಚ್ಚವನ್ನು ಖಾಲಿ ನಿವೇಶನದ ಮೇಲೆ ಭೋಜಾ ಕೂಡಿಸುವ ಅಧಿಕಾರ ಸ್ಥಳೀಯ ಸಂಸ್ಥೆಗಳಿಗಿದೆ. ಆದರೆ, ಇಂತಹ ಕ್ರಮ ಜರುಗಿಸಿದ ಒಂದೂ ನಿದರ್ಶನಗಳಿಲ್ಲ.

ಬಹುತೇಕ ನಿವೇಶನಗಳ ಮಾಲೀಕರಿಗೆ ಕಟ್ಟಡ ಕಟ್ಟುವ ಉದ್ದೇಶವೂ ಇಲ್ಲ. ವಾಸಕ್ಕೆ ಮನೆ ಇದ್ದರೂ ಮತ್ತೊಂದು ಸೈಟ್ ಇರಲಿ ಎಂಬ ಕಾರಣಕ್ಕೆ ಆಸ್ತಿ ಖರೀದಿಸಿ ಬೇರೆಲ್ಲೋ ವಾಸವಾಗಿದ್ದಾರೆ. ಇತ್ತ ಮಾರಾಟವೂ ಮಾಡದೆ, ಅತ್ತ ಮನೆಯನ್ನೂ ಕಟ್ಟದೇ ಖಾಲಿ ಬಿಟ್ಟ ಸೈಟ್‌ಗಳು ಈಗ ಕಸದ ತೊಟ್ಟಿಗಳಾಗುತ್ತಿವೆ.

ಚರಂಡಿಗಳೆಲ್ಲ ತ್ಯಾಜ್ಯ

ಪಟ್ಟಣದ ಖಾಲಿ ಪ್ರದೇಶ, ರಸ್ತೆ, ಬದಿಯಲ್ಲಿ ಮಾತ್ರ ಕಸ ತುಂಬಿಲ್ಲ. ಚರಂಡಿಗಳಲ್ಲೂ ಪ್ಲಾಸ್ಟಿಕ್ ಕವರ್, ತ್ಯಾಜ್ಯ ಸುರಿಯುವುದರಿಂದ ಚರಂಡಿ ನೀರು ಸರಾಗವಾಗಿ ಹರಿಯುತ್ತಿಲ್ಲ. ಪರಿಣಾಮ ನೀರು ಅಲ್ಲೇ ನಿಂತು ಸೊಳ್ಳೆಗಳ ಹಾವಳಿ ಹೆಚ್ಚಾಗುತ್ತಿದೆ. ಇದರಿಂದ ಸಾಂಕ್ರಾಮಿಕ ರೋಗಗಳ ಭೀತಿ ಶುರುವಾಗಿದೆ.