ಪುರಸಭೆ ಅಧ್ಯಕ್ಷ ಎ.ಆರ್.ಅಶೋಕ್ ಮಾತನಾಡಿ, ಕಟ್ಟಡ ಹಳೆಯದಾಗಿ ಸಜ್ಜಾ ಕುಸಿದ ಪರಿಣಾಮ ಇಬ್ಬರು ಮೃತಪಟ್ಟಿದ್ದು, ಇನ್ನುಕೆಲವರ ಸ್ಥಿತಿ ಚಿಂತಾಜನಕವಾಗಿದೆ. ಇದು ಗಂಭೀರ ವಿಷಯವಾಗಿದ್ದರಿಂದ ನಾವು ಅವರಿಗೆ ಪರಿಹಾರ ಹೇಗೆ ಕೊಡಬೇಕು ಎಂದು ಚರ್ಚಿಸಲು ಪುರಸಭೆಯಿಂದ ತುರ್ತು ಸಭೆ ಕರೆಯಲಾಗಿದೆ. ಸರ್ಕಾರದ ಮಟ್ಟದಲ್ಲಿ ಅವರಿಗೆ ನೆರವು ನೀಡುವ ಕೆಲಸ ಆಗಬೇಕಿದೆ. ಕುಸಿದ ಸಜ್ಜಾ ಪುರಸಭೆಗೆ ಸೇರಿಲ್ಲ. ಮೃತಪಟ್ಟವರು ಬೇಲೂರಿನವರೇ ಆಗಿದ್ದರಿಂದ ಜಾಗದ ಮಾಲೀಕರನ್ನು ಕರೆಸಿ ಪರಿಹಾರ ಕೊಡಿಸುವ ಕೆಲಸ ಆಗಬೇಕಿದೆ. ಈ ಬಗ್ಗೆ ಸದಸ್ಯರೊಂದಿಗೆ ಚರ್ಚಿಸಿ ಸರ್ಕಾರದ ಗಮನಕ್ಕೆ ತರಬೇಕು. ಈ ಪ್ರಕರಣ ನ್ಯಾಯಾಲಯದಲ್ಲಿದೆ. ಈಗಾಗಲೇ ಶಾಸಕರು 50 ಲಕ್ಷ ರೂ. ಪರಿಹಾರಕ್ಕೆ ಸದನದಲ್ಲಿ ಒತ್ತಾಯಿಸಿದ್ದಾರೆ. ಪುರಸಭೆಯಿಂದ 50 ಸಾವಿರ ರೂ. ನೀಡಲಾಗಿದೆ. ಇನ್ನು ಕಟ್ಟಡ ಹಿಂದೆ ಇದ್ದ ಹಳೆಯ ಚಿತ್ರಮಂದಿರ ಅನೈತಿಕ ಚಟುವಟಿಕೆ ಹಾಗೂ ಮದ್ಯ ವ್ಯಸನಿಗಳ ತಾಣವಾಗಿದೆ. ಈಗಿರುವ ಚನ್ನಕೇಶವ ಸ್ವಾಮಿ ದೇವಸ್ಥಾನದ ಪಕ್ಕದಲ್ಲಿರುವ ರಂಗಮಂದಿರ ಸಹ ಶಿಥಿಲಾವಸ್ಥೆಯಲ್ಲಿದ್ದು, ಸಂಬಂಧಿಸಿದ ಅಧಿಕಾರಿಗಳಿಗೆ ಪತ್ರ ಬರೆದು ಈ ಬಗ್ಗೆ ಚರ್ಚಿಸಲಾಗುವುದು ಎಂದರು. ಪುರಸಭೆ ಉಪಾಧ್ಯಕ್ಷೆ ಉಷಾ, ಮುಖ್ಯಾಧಿಕಾರಿ ಸುಜಯ್ ಕುಮಾರ್ ಇದ್ದರು.
