ಕಳೆದ ವಾರ ಕೆಲ ನಾಗರಿಕರು ಸೋಲದೇವನಹಳ್ಳಿ ಉಪ ವಿಭಾಗದ ಕುಂಬಾರಹಳ್ಳಿಯಲ್ಲಿ ಹೊಸ ಮನೆಗೆ ವಿದ್ಯುತ್ ಸಂಪರ್ಕ ಕೋರಿ ಅರ್ಜಿ ಸಲ್ಲಿಸಿದ್ದರು. ಅರ್ಜಿ ಪರಿಶೀಲಿಸಿದ ಇಂಜಿನಿಯರ್ಗಳು ಮೇಲಾಧಿಕಾರಿಗಳ ಗಮನಕ್ಕೆ ತಂದು ಬಳಿಕ ಸೌಲಭ್ಯ ಕಲ್ಪಿಸುವುದಾಗಿ ಅರ್ಜಿದಾರರಿಗೆ ಹಿಂಬರಹ ನೀಡಿದ್ದರು. ಇದೀಗ ಸಂಸ್ಥೆಯು ಪಾಲಿಸಿಕೊಂಡು ಬಂದಿರುವ ನಿಯಮದಂತೆ ಮುಂದುವರಿಯಲು ಆಯಾ ಉಪ ವಿಭಾಗಗಳ ಅಧಿಕಾರಿಗಳಿಗೆ ಸೂಚನೆ ನೀಡಿದ ಬಳಿಕ ಸಾರ್ವಜನಿಕರು ನಿಟ್ಟಿಸಿರು ಬಿಟ್ಟಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಶಿವರಾಮ ಕಾರಂತ ಬಡಾವಣೆ ಭಾಗದ ರೈತ ಮುಖಂಡ ರಮೇಶ್ ರಾಮಗೊಂಡನಹಳ್ಳಿ, ನಾಗರಿಕರು ನಿರ್ಮಿಸುವ ಮನೆಗಳಿಗೆ ಪವರ್ ಸಪ್ಲೈ ಮಾಡದಂತೆ ಬಿಡಿಎ ಆಯುಕ್ತರು ಬೆಸ್ಕಾಂಗೆ ನಿರ್ದೇಶಿಸುವ ಅಧಿಕಾರ ಇಲ್ಲ. ಆದರೂ ಇಂಥದ್ದೊಂದು ಪತ್ರ ಬರೆದು ವಿವಾದವನ್ನು ಮೈಮೇಲೆ ಎಳೆದುಕೊಂಡಿದ್ದ ಪ್ರಾಧಿಕಾರದ ಆಯುಕ್ತರಿಗೆ ತಮ್ಮ ತಪ್ಪಿನ ಅರಿವಾದಂತಿದೆ. ಬೆಸ್ಕಾಂ ಕೂಡ ತನ್ನ ಆಡಳಿತದಲ್ಲಿ ಅನ್ಯ ಸಂಸ್ಥೆ ಆಡಳಿತದಲ್ಲಿ ಮೂಗು ತೂರಿಸುವುದಕ್ಕೆ ಅವಕಾಶ ನೀಡದೆ ಎಂದಿನಂತೆ ವಿದ್ಯುತ್ ಸಂಪರ್ಕ ಒದಗಿಸಲು ಮುಂದಾಗಿದೆ ಎಂದಿದ್ದಾರೆ.
