ಚುನಾವಣೆ ವೇಳೆ ಬರೀ ಅಭಿವೃದ್ಧಿ, ಪರಸ್ಪರ ಟೀಕೆ, ಆರೋಪ-ಪ್ರತ್ಯಾರೋಪ ಮಾಡುವುದರಲ್ಲೇ ಕಾಲಹರಣ ಮಾಡಲಾಗುತ್ತಿದೆ. ಚುನಾವಣೆ ಎನ್ನುವುದು ಅಷ್ಟಕ್ಕೆ ಸೀಮಿತವಾಗಿದೆ. ಇಲ್ಲಿನ ನೀರು, ಗಾಳಿ, ಅರಣ್ಯ, ಪರಿಸರ ಸಂರಕ್ಷಣೆಗೆ ಯಾರೋಬ್ಬರೂ ಒತ್ತು ನೀಡುತ್ತಿಲ್ಲ. ಹಾಗಾಗಿ ಪರಿಸರಾಸಕ್ತರ ತಂಡವು ಲೋಕಸಭಾ ಅಭ್ಯರ್ಥಿಗಳಿಗೆ 12 ಅಂಶಗಳ ಬಹಿರಂಗ ಪತ್ರವನ್ನು ಸಿದ್ಧಪಡಿಸಿದೆ ಎಂದು ಗುರುವಾರ ಸುದ್ದಿಗೋಷ್ಠಿಯಲ್ಲಿ ಹೇಳಿದರು.
ಶಿವಮೊಗ್ಗ ಜಿಲ್ಲೆಯ ಪರಿಸರ ಸೂಕ್ಷ್ಮ ಪ್ರದೇಶದಲ್ಲಿದೆ. ಪ್ರಸ್ತುತ ಜಿಲ್ಲೆಯ ಸಮಸ್ಯೆಯನ್ನು ಸೂಕ್ಷ್ಮವಾಗಿ ಅವಲೋಕನ ಮಾಡಿದಾಗ ಎಲ್ಲ ಜೀವರಾಶಿಗಳಿಗೂ ಅತ್ಯಗತ್ಯವಾದ ಜೀವಜಲದ ಕೊರತೆಯಾಗುತ್ತಿರುವುದು ಮತ್ತು ವರ್ಷದಿಂದ ವರ್ಷಕ್ಕೆ ಉಷ್ಣತೆ ಏರಿಕೆ ಆಗುತ್ತಿರುವುದು ಗೋಚರಿಸುತ್ತಿದೆ. ಪರಿಸ್ಥಿತಿ ಹೀಗೆ ಮುಂದುವರಿದರೆ ಮಲೆನಾಡು ಪ್ರಾಕೃತಿಕ ವಿಕೋಪಗಳಿಂದ, ರೋಗ ರುಜಿನಗಳಿಂದ ವಿಷಮಯ ತಾಣವಾಗಿ ಬದಕಲಸಾಧ್ಯ ಆಗುವುದಕ್ಕೆ ಹೆಚ್ಚಿನ ಸಮಯ ಬೇಕಿಲ್ಲ. ಆ ಕಾರಣಕ್ಕೆ ನಾವು ಈಗಲಾದರೂ ಎಚ್ಚೆತ್ತುಕೊಳ್ಳಬೇಕಿದೆ ಎಂದು ಮನವಿ ಮಾಡಿದರು. ಘಟಕದ ಸದಸ್ಯರಾದ ಪ್ರೊ. ಬಿ.ಎಂ.ಕುಮಾರಸ್ವಾಮಿ, ರಮೇಶ್ ಹೆಗಡೆ, ಎಂ.ಶಂಕರ್, ಜಿ.ಎಲ್.ಜನಾರ್ಧನ್, ಎಸ್.ಪಿ.ಅಶೋಕ್ಕುಮಾರ್ ಸುದ್ದಿಗೋಷ್ಠಿಯಲ್ಲಿದ್ದರು.
