ಮೈಸೂರು-ಕೊಡಗು ಲೋಕಸಭಾ ಕ್ಷೇತ್ರಕ್ಕೆ ಸಂಬಂಧಿಸಿದಂತೆ ಗುರುವಾರ (ಮಾ.೨೮) ಚುನಾವಣಾ ಅಧಿಸೂಚನೆ ಹೊರಡಿಸಲಾಗುತ್ತಿದ್ದು, ಅಂದಿನಿಂದಲೇ ನಾಮಪತ್ರ ಸಲ್ಲಿಕೆ ಪ್ರಕ್ರಿಯೆ ಆರಂಭವಾಗಲಿದೆ. ಇದರೊಂದಿಗೆ ಚುನಾವಣಾ ಕಾವು ಕೂಡ ಹೆಚ್ಚಾಗಲಿದೆ. ಲೋಕಸಭೆಗೆ ಮೈಸೂರು ಜತೆ ಸೇರಿಕೊಂಡಿರುವ ಕೊಡಗಿನಲ್ಲಿ ಒಟ್ಟು ೪,೬೬,೧೫೪ ಮತದಾರರು ಇದ್ದು, ಇವರಲ್ಲಿ ಮಹಿಳಾ ಮತದಾರರ ಸಂಖ್ಯೆಯೇ ಅಧಿಕವಾಗಿದ್ದು. ೨,೩೭,೬೬೦ ಮಹಿಳಾ ಮತದಾರರು ಇದ್ದಾರೆ. ೨,೨೮,೪೭೮ ಪುರುಷ ಮತದಾರರು ಮತ್ತು ೧೬ ಇತರೆ ಮತದಾರರು ಮತದಾರರ ಪಟ್ಟಿಯಲ್ಲಿ ನೋಂದಣಿ ಆಗಿದ್ದಾರೆ.
ಕೊಡಗಿನಲ್ಲಿ ಕೇವಲ ೨ ವಿಧಾನಸಭಾ ಕ್ಷೇತ್ರಗಳು ಮಾತ್ರ ಇದ್ದು, ಮಡಿಕೇರಿ ವಿಧಾನಸಭಾ ಕ್ಷೇತ್ರದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಮತದಾರರು ಇದ್ದಾರೆ. ಇಲ್ಲಿ ಒಟ್ಟು ೨,೩೬,೫೬೨ ಮತದಾರರು ಇದ್ದು, ಮಹಿಳಾ ಮತದಾರರ ಸಂಖ್ಯೆಯೇ ಅಧಿಕವಾಗಿದೆ. ೧,೨೧,೩೯೪ ಮಹಿಳಾ ಮತದಾರರು ಇದ್ದರೆ, ೧,೧೫,೧೫೯ ಪುರುಷ ಮತದಾರರು ಮತ್ತು ೯ ಇತರೆ ಮತದಾರರು ಇದ್ದಾರೆ. ವಿರಾಜಪೇಟೆ ವಿಧಾನಸಭಾ ಕ್ಷೇತ್ರದಲ್ಲಿ ಒಟ್ಟು ೨,೨೯,೫೯೨ ಮತದಾರರು ಇದ್ದು, ಇಲ್ಲೂ ಮಹಿಳಾ ಮತದಾರರದ್ದೇ ಪ್ರಾಬಲ್ಯ ಕಂಡುಬರುತ್ತಿದೆ. ಇಲ್ಲಿ ೧,೧೬,೨೬೬ ಮಹಿಳಾ ಮತದಾರರು ಇದ್ದು, ೧,೧೩,೩೧೯ ಪುರುಷ ಮತದಾರರು ಮತ್ತು ೭ ಇತರೆ ಮತದಾರರು ಇದ್ದಾರೆ.
