ಚುನಾವಣಾ ಆಯೋಗ, ಪೊಲೀಸ್ ಇಲಾಖೆ, ಜಿಲ್ಲಾಡಳಿತ ಎಷ್ಟೇ ಮುನ್ನೆಚ್ಚರಿಕೆ ತೆಗೆದುಕೊಂಡು ಗೇಟ್ಗಳಲ್ಲಿ ತಪಾಸಣೆ ನಡೆಸಿದರೂ ಹಣದ ಹರಿವಿಗೆ ಕಡಿವಾಣ ಹಾಕಲು ಸಾಧ್ಯವಾಗಿಲ್ಲ. ಹೊರ ಜಿಲ್ಲೆಯಿಂದ ಮಾತ್ರವಲ್ಲದೆ ಜಿಲ್ಲೆಯೊಳಗೂ ಕೋಟಿಗಟ್ಟಲೆ ಮೊತ್ತ ಮತದಾನದ ಹಿಂದಿನ ದಿನ ಎಲ್ಲೆಂದರಲ್ಲಿ ಹರಿದಾಡಿದೆ. ಸ್ಥಳೀಯ ಮುಖಂಡರಿಂದ ಆರಂಭವಾಗಿ ಕಟ್ಟಕಡೆಯ ಮತದಾರನ ಪೈಕಿ ಬಹುತೇಕರು ಅಭ್ಯರ್ಥಿಗಳ ಕಡೆಯವರು ಕೊಟ್ಟಿರುವ ಗರಿ ಗರಿ ನೋಟು ಜೇಬಿಗಿಳಿಸಿದ್ದಾರೆ.
ಗ್ರಾಮೀಣ ಪ್ರದೇಶ, ಗುಂಪು ಮನೆ, ಕಾಲೋನಿ, ಅಂದಂದಿನ ಜೀವನಕ್ಕೆ ಅಂದದಂದೇ ದುಡಿಯುವವರು… ಹೀಗೆ ಹಣದ ಅವಶ್ಯಕತೆ ಹೆಚ್ಚು ಇದ್ದು, ಕಡಿಮೆ ಮೊತ್ತದಲ್ಲಿ ತೃಪ್ತರಾಗುವವರನ್ನು ಗುರಿಯಾಗಿಸಿಕೊಂಡು ಅಭ್ಯರ್ಥಿಗಳ ಕಡೆಯವರು ಕುರುಡು ಕಾಂಚಾಣವನ್ನು ತಮ್ಮ ಇಷ್ಟದಂತೆ ಕುಣಿಸಿದ್ದಾರೆ. ಕೆಲವು ಕಡೆಗಳಲ್ಲಿ ಮತದಾರರಿಂದ ಆಣೆ, ಪ್ರಮಾಣವನ್ನೂ ಮಾಡಿಸಿಕೊಳ್ಳಲಾಗಿದೆ. ಹಣದ ರುಚಿ ಸಿಕ್ಕಿದ ಕಾರ್ಯಕರ್ತರು, ಸ್ಥಳೀಯ ಮುಖಂಡರು ತಮಗಿಷ್ಟು ಮೊತ್ತ ಕೊಟ್ಟರೆ ಮಾತ್ರ ಅಭ್ಯರ್ಥಿ ಪರ ಕೆಲಸ ಮಾಡುವುದಾಗಿ ಹಠ ಹಿಡಿದು ಹಣ ವಸೂಲಿ ಮಾಡಿರುವ ಪ್ರಸಂಗಗಳೂ ವರದಿಯಾಗಿದೆ.
ಮದ್ಯ ಹಂಚಲು ಕೂಡ ಸಾಕಷ್ಟು ಪ್ರಮಾಣದಲ್ಲಿ ಹಣ ವ್ಯಯಿಸಲಾಗಿದೆ. ಕಾರ್ಮಿಕರು, ದಿನಗೂಲಿಗಳು ಹೆಚ್ಚು ಇರುವ ಪ್ರದೇಶದಲ್ಲಿ ಯಥೇಚ್ಛವಾಗಿ ಮದ್ಯ ಹಂಚಲಾಗಿದೆ. ಮದ್ಯ ಮಾರಾಟಕ್ಕೆ ನಿರ್ಬಂಧ ಇದ್ದರೂ ಅಭ್ಯರ್ಥಿಗಳ ಕಡೆಯವರು ಜಿಲ್ಲೆಯಾದ್ಯಂತ ಯಾವುದೇ ಅಡೆ, ತಡೆ ಇಲ್ಲದೆ ಮದ್ಯ ಸರಬರಾಜು ಮಾಡಿದ್ದಾರೆ.
