30ರೊಳಗೆ ಪಡಿತರ ಚೀಟಿದಾರರ ಇ&ಕೆವೈಸಿ ಕಡ್ಡಾಯ

ವಿಜಯಪುರ: ಸಾರ್ವಜನಿಕ ವಿತರಣಾ ಪದ್ಧತಿಯ ಅನ್ನಭಾಗ್ಯ ಯೋಜನೆಯಡಿ ಅಂತ್ಯೋದಯ ಅನ್ನ ಯೋಜನೆ ಹಾಗೂ ಬಿಪಿಎಲ್​ ಪಡಿತರ ಚೀಟಿಯಲ್ಲಿನ ಎಲ್ಲಾ ಸದಸ್ಯರುಗಳು ಕಡ್ಡಾಯವಾಗಿ ಜೂ. 30 ರೊಳಗೆ ಇ&ಕೆವೈಸಿ ಮಾಡಿಕೊಳ್ಳುವಂತೆ ಜಿಲ್ಲಾಧಿಕಾರಿ ಟಿ. ಭೂಬಾಲನ್​ ತಿಳಿಸಿದ್ದಾರೆ.

ವಿಜಯಪುರ ಜಿಲ್ಲೆಯಾದ್ಯಂತ ಸದ್ಯ ಚಾಲ್ತಿಯಲ್ಲಿರುವ ಅಂತ್ಯೋದಯ ಅನ್ನ ಯೋಜನೆಯ 40,987 ಹಾಗೂ ಆದ್ಯತಾ ಕುಟುಂಬ (ಬಿಪಿಎಲ್​) ಪಡಿತರ ಚೀಟಿ 4,68,280 ರಿದಂತೆ ಒಟ್ಟಾರೆ, 5,09,267 ಪಡಿತರ ಚೀಟಿಗಳ ಪೈಕಿ 4,82,741 ಪಡಿತರ ಚೀಟಿಗಳಲ್ಲಿನ 18,01,480 ಸದಸ್ಯರ ಇ&ಕೆವೈಸಿ ಆಗಿರುತ್ತದೆ.

ಇನ್ನೂ ಇ&ಕೆವೈಸಿ ಆಗದೇ ಇರುವ 26,526 ಪಡಿತರ ಚೀಟಿಗಳಲ್ಲಿನ 35,162 ಸದಸ್ಯರು ಇ&ಕೆವೈಸಿ ಮಾಡಿಕೊಳ್ಳಬೇಕಿದೆ. ಇ&ಕೆವೈಸಿ ಮಾಡಿಕೊಳ್ಳುವಂತೆ ಕಳೆದ 3 ವರ್ಷಗಳಿಂದ ಸಾರ್ವಜನಿಕವಾಗಿ ಸಾಕಷ್ಟು ಪ್ರಚಾರ ಕ್ರಮಗಳನ್ನು ಕೈಗೊಂಡಿದ್ದರೂ ಸಹ ಇನ್ನೂ ಸುಮಾರು 35,162 ಸದಸ್ಯರು ಇ&ಕೆವೈಸಿ ಮಾಡಿಸಿರುವುದಿಲ್ಲ. ಈ ಹಿನ್ನೆಲೆಯಲ್ಲಿ ನೈಜ ಫಲಾನುಭವಿಗಳು ಪಡಿತರ ಪಡೆಯುವುದರಿಂದ ವಂಚಿತರಾಗಬಾರದೆನ್ನುವ ಉದ್ದೇಶದಿಂದ ಇದು ಕೊನೆಯ ಅವಕಾಶ ಕಲ್ಪಿಸಲಾಗಿದೆ ಎಂದು ಅವರು ತಿಳಿಸಿದ್ದಾರೆ.

ಇ&ಕೆವೈಸಿ ಮಾಡಿಸದೆ ಇರುವ ಸದಸ್ಯರುಗಳು ತಮ್ಮ ಹತ್ತಿರದ ನ್ಯಾಯ ಬೆಲೆ ಅಂಗಡಿಗಳಿಗೆ ತೆರಳಿ ಜೂ. 30 ರೊಳಗಾಗಿ ಇ&ಕೆವೈಸಿ ಮಾಡಿಕೊಳ್ಳುವಂತೆ ಜಿಲ್ಲಾಧಿಕಾರಿಗಳು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.