ಅಂಗನವಾಡಿ ಕಾರ್ಯಕರ್ತೆಯರಿಗೆ ಹೊರೆಯಾದ ಮೊಟ್ಟೆ ; ಬಿಡುಗಡೆಯಾಗದ ಸರ್ಕಾರದ ಅನುದಾನ

| ಪಿ.ಎಸ್.ಹರೀಶ್ ಕೋಲಾರ

ಅಪೌಷ್ಟಿಕತೆ ಹೋಗಲಾಡಿಸುವ ಉದ್ದೇಶದಿಂದ ಸರ್ಕಾರ ಅಂಗನವಾಡಿ ಮಕ್ಕಳು, ಗರ್ಭಿಣಿಯರು, ಬಾಣಂತಿಯರಿಗೆ ಮೊಟ್ಟೆ ನೀಡುತ್ತಿದ್ದು, ಹಲವು ತಿಂಗಳುಗಳಿಂದ ಅಂಗನವಾಡಿ ಕಾರ್ಯಕರ್ತೆಯರ ಜಂಟಿ ಖಾತೆಗೆ ಹಣ ಜಮಾ ಆಗದಿರುವುದರಿಂದ ಮೊಟ್ಟೆ ಹೊರೆಯಾಗಿದೆ.

ಜಿಲ್ಲೆಯಲ್ಲಿ 2080 ಅಂಗನವಾಡಿಗಳಿದ್ದು, 85,000ಕ್ಕೂ ಅಧಿಕ ಮಕ್ಕಳು, ಗರ್ಭಿಣಿ, ಬಾಣಂತಿಯರು ಸೇರಿ ಸುಮಾರು 1.08 ಲಕ್ಷ ಫಲಾನುಭವಿಗಳಿದ್ದಾರೆ. ನಿಯಮದಂತೆ ಪ್ರತಿ ಕೇಂದ್ರ ವ್ಯಾಪ್ತಿಯ 3ರಿಂದ 6 ವರ್ಷದೊಳಗಿನ ಮಕ್ಕಳಿಗೆ ವಾರಕ್ಕೆ ಎರಡು ದಿನ ಹಾಗೂ ಮಾತೃಪೂರ್ಣ ಯೋಜನೆಯಡಿ ಗರ್ಭಿಣಿ ಮತ್ತು ಬಾಣಂತಿಯರಿಗೆ ತಿಂಗಳಿಗೆ 25 ಮೊಟ್ಟೆ ವಿತರಿಸಬೇಕು. ಪ್ರತಿ ಮೊಟ್ಟೆಗೆ ಸರ್ಕಾರ 5 ರೂ. ನೀಡುತ್ತದೆ.

ಸರ್ಕಾರ 2017ರ ಡಿಸೆಂಬರ್‌ನಲ್ಲಿ ಒಂದು ಮೊಟ್ಟೆಗೆ 6.50 ರೂ. ನಿಗದಿಪಡಿಸಿತ್ತು. 2019ರ ಸೆಪ್ಟೆಂಬರ್‌ನಲ್ಲಿ ಮೊಟ್ಟೆ ದರ ಪರಿಷ್ಕರಿಸಿ 5 ರೂ.ಗೆ ನಿಗದಿ ಮಾಡಿತ್ತು. ನಂತರ ಪರಿಷ್ಕರಣೆ ಮಾಡಿಲ್ಲ. ಮೊಟ್ಟೆ ದರದಲ್ಲಿ ಏರಿಳಿತ ಕಾಣುತ್ತಿದ್ದು, ಕರೊನಾ ಆರಂಭದ ದಿನಗಳಲ್ಲಿ ಕುಕ್ಕುಟೋದ್ಯಮ ನೆಲಕಚ್ಚಿದ ಸಂದರ್ಭದಲ್ಲಿ ಒಂದು ಮೊಟ್ಟೆ ಬೆಲೆ ಗರಿಷ್ಠ 7 ರೂ. ಆಗಿದ್ದಿದೆ. ದರ ಹೆಚ್ಚಾದಾಗ ಅಂಗನವಾಡಿ ಕಾರ್ಯಕರ್ತೆ, ಸಹಾಯಕಿಯರು ಸ್ವಂತ ಹಣದಿಂದ ಮೊಟ್ಟೆ ಕೊಟ್ಟಿದ್ದು, ಪ್ರತಿ ಅಂಗನವಾಡಿ ಕೇಂದ್ರಕ್ಕೆ ಮಾಸಿಕ 1200 ರೂ. ಹೆಚ್ಚು ಹೊರೆಯಾಗಿದೆ.

ಕಳೆದ ಕೆಲ ತಿಂಗಳುಗಳಿಂದ ಸರ್ಕಾರದಿಂದ ಸರಿಯಾಗಿ ಹಣ ಬಿಡುಗಡೆಯಾಗಿಲ್ಲ. ಕೋಲಾರದಲ್ಲಿ 3 ತಿಂಗಳು, ಬಂಗಾರಪೇಟೆ 5 ತಿಂಗಳು, ಮಾಲೂರಿನಲ್ಲಿ 3 ತಿಂಗಳ ಹಣ ಬಾಕಿ ಇದೆ. ಬೇತಮಂಗಲ, ಮುಳಬಾಗಿಲು, ಶ್ರೀನಿವಾಸಪುರದಲ್ಲೂ ಅಂಗನವಾಡಿ ಕೇಂದ್ರಗಳಿಗೆ ಹಣ ಬಿಡುಗಡೆ ಆಗದಿರುವುದರಿಂದ ಮೊಟ್ಟೆ ಖರೀದಿಸಿ ಮಕ್ಕಳಿಗೆ ನೀಡುವುದು ಹೊರೆಯಾಗಿದೆ.

ಈಗಾಗಲೆ ಸಾಲ ಮಾಡಿ ಮೊಟ್ಟೆ ತಂದು ಫಲಾನುಭವಿಗಳಿಗೆ ನೀಡಿದ್ದೇವೆ. ನಮ್ಮ ಮೇಲಿನ ನಂಬಿಕೆಯಿಂದ ಅಂಗಡಿಯವರು ಇಷ್ಟು ದಿನ ಸಾಲ ನೀಡಿದ್ದಾರೆ. ಕರೊನಾ ಸಂಕಷ್ಟದ ಸಂದರ್ಭದಲ್ಲಿ ಸಾಲ ಕೇಳಲು ನಮಗೂ ಕಷ್ಟವಾಗುತ್ತಿದೆ ಎಂದು ಕಾರ್ಯಕರ್ತೆಯರು ಅಳಲು ತೋಡಿಕೊಂಡಿದ್ದಾರೆ.

ಪ್ರತಿ ತಿಂಗಳು ಮುಂಚಿತವಾಗೇ ಮೊಟ್ಟೆ ಹಣವನ್ನು ಆಯಾ ಅಂಗನವಾಡಿ ವ್ಯಾಪ್ತಿಯ ಬಾಲಿಕಾ ಸಮಿತಿ ಸದಸ್ಯೆ ಮತ್ತು ಅಂಗನವಾಡಿ ಕಾರ್ಯಕರ್ತೆಯರ ಜಂಟಿ ಖಾತೆಗೆ ಜಮಾ ಮಾಡಿದರೆ ಸಮಸ್ಯೆ ಬರುವುದಿಲ್ಲ. ಮೊಟ್ಟೆ ದರ ಪರಿಷ್ಕರಣೆ ಮಾಡದಿದ್ದರೆ ಕೈಯಿಂದ ಎಷ್ಟು ಹಣ ಹಾಕುವುದು ಎಂದು ಕಾರ್ಯಕರ್ತೆಯರು ಬೇಸತ್ತಿದ್ದಾರೆ. ಸರ್ಕಾರ ನೀಡುವ ಅನುದಾನಕ್ಕೆ ಎಷ್ಟು ಮೊಟ್ಟೆ ಬರುತ್ತದೋ ಅದಕ್ಕೆ ತಕ್ಕಂತೆ ಖರೀದಿಸಿ ನೀಡುವ ಬಗ್ಗೆ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ ಉಪ ನಿರ್ದೇಶಕರ ಬಳಿ ಪ್ರಸ್ತಾವನೆ ಇಡಲು ಅಂಗನವಾಡಿ ಕಾರ್ಯಕರ್ತೆಯರ ಸಂಘಟನೆಗಳು ಮುಂದಾಗಿವೆ.