ಇತ್ತೀಚೆಗೆ ಅರಕಲಗೂಡು ತಾಲೂಕಿನ ರಾಮನಾಥಪುರ ಹೋಬಳಿ ಬಸವನಹಳ್ಳಿ ಗ್ರಾಮದ ಕೆರೆಯಲ್ಲಿ ನೀರಿಲ್ಲದ ಕಾರಣ ಮೀನುಗಳು ಕೆರೆಯ ಮೇಲ್ಭಾಗದಲ್ಲಿ ಒದ್ದಾಡುತ್ತಿದ್ದವು. ಇದನ್ನು ಕಂಡು ಗ್ರಾಮಸ್ಥರು ಈ ಮೀನುಗಳನ್ನು ಹಿಡಿದು ಸಾರು ಮಾಡಿ ಸೇವಿಸಿದ್ದರು. ಬಳಿಕ 20ಕ್ಕೂ ಹೆಚ್ಚು ಜನರು ಅಸ್ವಸ್ಥರಾಗಿ, ಇಬ್ಬರು ಮೃತಪಟ್ಟರು. ಘಟನೆಗೆ ಆಹಾರ ಸೇವನೆ ಅಥವಾ ಕುಡಿಯುವ ನೀರು ಕಾರಣವೇ ಎಂಬ ಬಗ್ಗೆ ಪರಿಶೀಲಿಸಿ ವರದಿ ನೀಡಲು ಹಾಸನ ಜಿಲ್ಲಾಧಿಕಾರಿ ಸತ್ಯಭಾಮಾ ಸೂಚಿಸಿದ್ದಾರೆ. ಈ ನಡುವೆ ವೈದ್ಯರು ಕೆರೆಯಲ್ಲಿ ಸತ್ತ ಮೀನುಗಳಿಗೆ ಬ್ಯಾಕ್ಟೀರಿಯಾಗಳು ಬೇಗ ಮುತ್ತಿಕೊಳ್ಳುತ್ತವೆ. ಸತ್ತು ಕೊಳೆತ ನಂತರ ವಿಷಕಾರಕ ಅಂಶಗಳನ್ನು ಒಳಗೊಂಡಿರುತ್ತದೆ. ಹಾಗಾಗಿ ಇಂತಹ ಮೀನುಗಳನ್ನು ತಿಂದರೆ ಪ್ರಾಣಕ್ಕೆ ಸಂಚಕಾರ ಎಂಬ ಎಚ್ಚರಿಕೆಯನ್ನೂ ವೈದ್ಯರು ನೀಡಿದ್ದಾರೆ.
